މިސަރުކާރުން ގދ.ތިނަދޫއަށް ވެފައިވާ ވައުދުތައް ކުރިއަށްނުދާ ކަމަށް ތިނަދޫ ދެކުނު ދާއިރާގެ މެމްބަރު ސަނީފް ވިދާޅުވެއްޖެއެވެ.
މިއަދު ރައްޔިތުންގެ މަޖިލީހުގައި ފިނޭންސް މިނިސްޓަރ އިބްރާހީމް އަމީރާ ސުވާލު ކުރައްވަން ލިބުނު ފުރުސަތުގައި ސަނީފް ވަނީ ރައީސް ޞާލިހު ރިޔާސީ އިންތިޚާބުގެ ދުވަސްވަރު ތިނަދޫއަށް ވަޑައިގެން ވެވަޑައިގެންނެވި ވައުދުތައް ތަންފީޒު ވެގެން ނުދާނީ ކަންބޮޑުކަމާއިއެކު އެކަން ފާހަގަކޮށްފައެވެ.
ސަނީފް ވަނީ، ރިޔާސީ އިންތިޚާބުގެ ކެމްޕޭން ދުވަސްވަރު، ރައީސް ޞާލިޙު ތިނަދޫއަށް ވެފައިވާ ވައުދުތައް ތަންފީޒު ކުރުމުގެ ބަދަލުގައި މުޅިން އާ ކަންތައްތަކެއް ފަށައިގެން ކުރިއަށް ގެންދަނީ ކޮން ސަބަބާއި ހެދިތޯ ސުވާލު ކުރައްވާފައެވެ. މީގެ އިތުރުން ދައުލަތުގެ މާލީ ވަޒީރަކީ ރައީސް ޞާލިހުގެ ވައުދުތައް ތަންފީޒު ކުރަން ހުރި އެންމެ މުހިންމު ފަރާތަށްވާއިރު، ވައުދުތައް ފުއްދުމުގައި އެކަށީގެންވާ މަސައްކަތް ނުކުރާ ސަބަބަކީ ކޮބައިތޯވެސް ސަނީފްވަނީ ސުވާލު ކުރައްވާފައެވެ.
ސަނީފުގެ ސުވާލު ކުރެއްވުމުން ފިނޭންސް މިނިސްޓަރ ވަނީ ސަރުކާރުން ހިންގާ މަޝްރޫޢުތައް ޓެންޑާ މަރުހަލާގައާއި އެނޫން މަރުހަލާތަކުގައި ފެންނަން ހުންނާނެކަމަށެވެ. އެހެން ނަމަވެސް އެބޭފުޅާގެ ސުވާލަށް ސީދާ ޖަވާބު ދެއްވާފައެއް ނުވެއެވެ. ސަނީފް ވަނީ މީގެ ކުރިންވެސް މިސަރުކާރުން ތިނަދޫ އަށް ވެފައިވާ ވައުދުތައް ފުއްދާފައިނުވާތީ އެކަމުގެ ކަންބޮޑުވުން ފާޅުކޮށްފައެވެ.
Advertisement
This content is created and paid for by advertisers and does not involve Voice Journalists
