ކުރީގެ ރައީސް އަބްދުﷲ ޔާމީން އަބްދުލްގައްޔޫމު ވިދާޅުވެގެން ބެންކު ރޭޓުން (15.42) ރުފިޔާގެ ރޭޓުން އެއް މިލިއަން ޑޮލަރު ހޯއްދަވާދެއްވުމުގައި މެދުވެރިއެއްގެ ރޯލު އަދާކުރެއްވިކަމަށް މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ވިދާޅުވެއްޖެއެވެ. 

އޭނާ މިފަދައިން ވިދާޅުވެފައިވަނީ ވ. އާރަށުގެ މުއާމަލާތާއު ގުޅުވާ ރައީސް ޔާމީންގެ މައްޗަށް އުފުލާފައވާ ދައުވާތަކާއި ގުޅިގެން މިއަދު ކުރިމިނަލް ކޯޓުގައި ކުރިއަށް ދިޔަ އަޑުއެހުމުގައި ހެކިބަސް ދެއްވަމުންނެވެ. 

މުހައްމަދު އިސްމާއިލް ވިދާޅުވީ 2015 ވަނަ އަހަރުގެ ފަހުކޮޅު ރައީސް ޔާމީން މުހައްމަދު އިސްމާއިލްއަށް ގުޅުއްވާ 15.42 ގެ ރޭޓުން އެއްމިލިއަން ޑޮލަރު ވިއްކާނެ ފަރާތެއް ހޯއްދަވާދެއްވުމަށް އެދިލެއްވިކަމަށެވެ. 

Advertisement

އަދި ރައީސް އެފަދައިން އެދިލެއްވިކަން އެވަގުތު އޭނާގެ އަރިހުގައި އިންނެވި ހުޅުދޫ ދާއިރާގެ ކުރީގެ މެމްބަރު މުހައްމަދު ޝާހިދު (ޝާޑު) އަރިހުގައިވެސް ދެންނެވިކަމަށް މުހައްމަދު އިސްމާއިލް ވިދާޅުވިއެވެ. 

ރައީސް ޔާމީންގެ އެދިލެއްވުމަށް އޭނާ ދަންނަ ވަރަށް ގިނަ ވިތަފާރިވެރިންގެ އަރިހުގައި އެ ވާހަކަ ދަންނަވާފައިވާނެކަމަށް މުހައްމަދު އިސްމާއިލ ވިދާޅުވިއެވެ. އެގޮތުން ޔޫސުފް ނައީމުގެ އަރިހުގައިވެސް ރައީސް ޔާމީން ޑޮލަރު ބައްލަވައިގަންނަވަން ބޭނުންފުޅުވެގެން އުޅުއްވާކަމަށާއި އެކަމުގައި އެހީތެރިވެދެއްވުމަށް އެދިފައިވާނެކަމަށް މުހައްމަދު އިސްމާއިލް ވިދާޅުވިއެވެ. 

އަދި އެފަހުން ވަރަށް ކައިރި ދުވަހެއްގައ ޔޫސުފް ނައީމު ގުޅުއްވާ ރައީސް ޔާމީން ެދިލެއްވިގޮތަށް ބެންކު ރޭޓުން އެއް މިލިއަން ޑޮލަރު ހަމަޖެހިފައިވާކަމަށް ޔޫސުފް ނައީމު ވިދާޅުވެފައިވާކަމަށް މުހައްމަދު އިސްމާއިލް ވަނީ ކޯޓަށް ކިޔައިދެއްވާފައެވެ. އަދި އެވާހަކަ ރައީސް ޔާމީންއާއިވެސް ހިއްސާކުރެއްވިކަމަށް މުހައްމަދު އިސްމާއިލް ވިދާޅުވިއެވެ. 

ރައީސް ޔާމީންއާއި ޔޫސުފް ނައީމާއި ދެމެދު ހިނގާފައިވާ އެއް މިލިއަން ޑޮލަރުގެ މުއާމަލާތުގެ މެދުވެރިއެއްގެ ގޮތުގައި އޭނާ ހަރަކާތްތެރިވެފައިވާކަން މުހައްމަދު އިސްމާއިލްގެ ހެކިބަހުން ހާމަވެއެވެ. 

ދައުލަތުގެ ފަރާތުން ވަނީ ޔޫސުފް ނައީމުގެ ގާތުގައި ޑޮލަރު ގަތުމަށް، ނުވަތަ ޑޮލަރު ހޯދުމަށް އައްސަވަން ޖެހިވަޑައިގަތީ ކީއްވެތޯ ސުވާލުކުރައްވާފައެވެ. 

އެ ސުވާލުގެ ޖަވާބުގައި މުހައްމަދު އިސްމާއިލް ވިދާޅުވީ، ޔޫސުފު ނައީމަކީ ފަތުރުވެރިކަމުގެ ސިނާއަތާއި ގުޅުން އޮންނަ ފަރާތަކަށްވުމުން، ޑޮލަރު ހޯދަން އޭނާއަށް ފަސޭހަވާނެތީއެވެ. އަދި ޔޫސުފު ނައީމަކީ މުހައްމަދު އިސްމާއިލްއާއި ކުޑައިރުއްސުރެ ގާތް ބޭފުޅަކަށްވުމުން، އެފަދަ ކަންކަމުގައި އެހީއަށް އެދުނީކަމަށް އޭނާ ވިދާޅުވިއެވެ. 

ވ. އާރަށުގެ މައްސަލައިގައި މިހާރު ކުރިއަށް ދަނީ ދިފާއުގެ ފަރާތުން ހުށައަޅާ ހެކިންގެ ހެކިބަސް ހެކިބަސް ނެގުމުގެ މަރުހަލާއެވެ. 

މިއަދުގެ އަޑުއެހުމުގައި ޔޫސުފް ނައީމުގެ އަތްޕުޅުން ޑޮލަރު ބައްލަވައިގަތުމަށް ރައީސް ޔާމީން ދެއްވި ފައިސާ ޔޫސުފް ނައީމާއި ހަވާލުކުރެއްވިކަމަށް އަހުމަދު ނަރީޝްއާއެކު އެފައިސާ ގެންގޮސްދިން އަބްދުﷲ ރަޝީދުވެސް ވަނީ ވިދާޅުވެފައެވެ.