ސިޔާސީ މަސައްކަތް ކުރައްވައިގެން ރާއްޖޭގެ ވެރިކަން ހޯދަން ބޭނުން ނަމަ މިއަދު ހުންނަވާނީ އެ މަގާމުގައި ކަމަށާއި ނަމަވެސް ބޭނުން ވަނީ އިސްލާހަށް މަސައްކަތް ކުރައްވަން ކަމަށް ޖުމްހޫރީ ޕާޓީގެ ލީޑަރު އަދި މާމިގިލި ދާއިރާގެ މެމްބަރު ގާސިމް އިބްރާހިމް މިއަދު ވިދާޅުވެއްޖެ އެވެ.

ރާއްޖެ ޓީވީގެ "ފަށާއިރު" ޕްރިގްރާމްގައި ވާހަކަ ދައްކަވަމުން ގާސިމް ވިދާޅުވީ، އޭނާއަކީ ސިޔާސީ ބޭފުޅެއް ނޫން ކަމަށާއި ސިޔާސީ ގޮތުން ކުރި ހޯއްދަވައިގެން ވަޑައިގަންނަވަން ބޭނުން ނުވާ އެތައް ސަބަބެއް އެބަހުރި ކަމަށެވެ. އެހެން ނަމަވެސް އިތުރު ތަފްސީލަކަށް ނުދެއެވެ.

އަންނަ އަހަރުގެ ރިޔާސީ އިންތިހާބުގައި ޖުމްހޫރީ ޕާޓީން ގާސިމް ނޫން އެހެން ބޭފުޅަކު ފެނިދާނެތޯ ޕްރެޒެންޓަރު ސުވާލު ކުރުމުން ވިދާޅުވީ، އެކަމަށް އެއްގޮތަކަށް ވެސް ޖަވާބު ދެއްވަން އެނގިވަޑައި ނުގަންނަވާ ކަމަށެވެ. ގާސިމް ވިދާޅުވީ، އޭނާ މަސައްކަތް ކުރައްވަނީ އިސްލާހަށް ކަމަށާއި، ސިޔާސީ މީހެއް ނަމަ މިހާރުވެސް، މިއަދުވެސް ވެރިކަމުގައި ހުންނަވާނީ އޭނާ ކަމަށެވެ.

ގާސިމް ވިދާޅުވިގޮތުގައި، ރާއްޖޭގައި އިސްލާހީ މަސައްކަތް ކުރުމަށް އަޅުއްވަން ޖެހުނު ކޮންމެ ފިޔަވަޅެއް އަޅުއްވާނެ ކަމަށާއި ހޯއްދަވަން ޖެހުނު މަގާމުތަކެއްވެސް އޭނާ ހޯއްދަވާނެ ކަމަށް ވިދާޅުވި އެވެ. އޭނާ ވިދާޅުވި ގޮތުގައި ރައްޔިތުންގެ މަޖިލީހުގެ މެމްބަރުކަން ވެސް ހޯއްދަވަނީ އެ ބޭނުމަށް ކަމަށާއި މަޖިލީހުގައި ހުންނަވަން ޖެހޭ އެ ނޫން ސަބަބެއް ނެތް ކަމަށް ގާސިމް ވިދާޅުވި އެވެ.

"އަޅުގަނޑުގެ ލެގަސީއެއް ނޫން ކޮންމެ ގޮތެއް ހަދައިގެން ވެސް ވެރިކަން ހޯދުމަކީ. ރައީސުލްޖުމްހޫރިއްޔާގެ މަގާމު ހޯދުމަކީ. އެއީ ކޮންމެހެން ބޭނުންވާ ކަމަކަށް ނުވާތީ އެކަން ނުކުރަނީ،" ގާސިމް ވިދާޅުވި އެވެ.