ކޮންމެ ފަސް އަހަރަކުން ސަރުކާރު ބަދަލުވާއިރު ގެންނަ ބަދަލުތަކުގެ ސަބަބުން ޚަރަދުތައް އިތުރުވަމުން އަންނައިރު އެކަންކަމަކީ މާ ބޮޑު މައްސަލައަކަށް ނުވެފައި، މަޖިލީހުގެ މެމްބަރުންގެ އަދަދު އިތުރުކުރުން މައްސަލައަކަށްވާ ސަބަބު ސާފުކުރަން ޖެހޭކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާޢު ވިދާޅުވެއްޖެއެވެ.
ޝިފާއު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މެމްބަރުންގެ އަދަދު މަދުކޮށް ވަކި ވަރެއްގައި ހިފެހެއްޓުމަށް ގާނޫނު އަސާސީ އިސްލާހުކުރުމަށް މަޖިލީހުގެ މާމިނގިލީ ދާއިރާގެ މެމްބަރު ގާސިމް އިބްރާހިމް ހުށައެޅި އިސްލާހަށް ވާހަކަދައްކަވަމުންނެވެ.
އޭނާ ވިދާޅުވީ، ކޮންމެ ފަސް އަހަރަކުން އެއް އަހަރު ސަރުކާރު ބަދަލުވާއިރު، ގިނަ ޚަރަދުތަކެއް ކުރަން ޖެހޭކަމަށެވެ. އަދި ބަދުވާ ސަރުކާރާއި ގުޅިގެން އާ ވޒާރާތައް ހަދައި އެ ތަންތަނަށް ސިޔާސީ މުވައްޒަފުން ލަމުންދާ ކަމަށެވެ.
އޭގެ އިތުރުން ސަރުކާރުގެ ކުންފުނިތަކަށްވެސް ބޮޑެތި ބަދަލުތަކެއް ގެނެސް، އެތަންތަނަށްވެސް އެކި ނަންނަމުގައި އެތައް ބަޔަކު އައްޔަންކުރަމުންދާކަމަށެވެ. އަދި އެ އެންމެންނަށް މުސާރައާއި އިނާޔަތްތައް ދެނީ ދައުލަތުގެ މާލިއްޔާއިންކަން އޭނާ ފާހަގަކުރެއްވިއެވެ.
އެއާއެކު އޭނާ ވަނީ އެ ޚަރަދުތަކަކީ މައްސަލައަކަށް ނުވާއިރު، ހަމައެކަނި މަޖިލީހުގެ މެމްބަރުންގެ އަދަދު ހިފެހެއްޓަން މަސައްކަތް ކުރާ ސަބަބަށް ބަލާލަން ޖެހޭކަމަށެވެ.
"ސަރުކާރެއް އުފެދޭ ކޮންމެ ފަހަރަކު ވުޒާރާތަކުގެ އަދަދު އެތައް ތަނެއް އިތުރު އެބަވޭ. ވުޒާރާތަކަށް އައްޔަންކުރެވޭ ސްޓޭޓް މިނިސްޓަރުންގެ އަދަދު އެތައް ތަނެއް އިތުރު އެބަ ކުރެވޭ. ޑެޕިއުޓީ މިނިސްޓަރުންގެ އަދަދު އިތުރުވޭ. ކޯޑިނޭޓަރުންނާއި ޑިރެކްޓަރުންނާއި ކިޔާފަ އައްޔަންކުރެވޭ މަގާމުތައް އެތައް ތަނަކުން އެބަ އިތުރުވޭ. އެއީ ހަމަ ދައުލަތުން މުސާރަ ދޭ މަގާމުތައް. އެހެންވީމަ މީ މައްސަލައަކަށް ނުވެ ހަމައެކަނި ރައްޔިތުންގެ މަޖިލީހުގެ މެމްބަރުންގެ އަދަދު ކޮންމެ ފަސް އަހަރަކުން އެއް ފަހަރު އިތުރުވާ އިތުރުވުން އެއީ މާ ބޮޑު މައްސަލައަކަށްވާން ޖެހޭ ސަބަބެއްވެސް ދިރާސާކޮށް ބަލަން ޖެހޭ"
އިހަވަންދޫ ދާއިރާގެ މެމްބަރު ޝިފާޢު
ޝިފާއު ވިދާޅުވީ ގާނޫނު އަސާސީއަށް ހުށައަޅާފައިވާ އިސްލާހަކީ ފުޅާކޮށް ބަހުސް ކުރެވެން ޖެހޭ އިސްލާހެއްކަމަށެވެ.
މެމްބަރުންގެ އަދަދު ކޮންމެވެސް ހިސާބަކުން ހުއްޓުމަކަށް އަންނަން ޖެހޭކަމަށް ގަބޫލުފުޅުކުރައްވާކަމަށާއި، އެހެން ނަމަވެސް އެ ލިމިޓް ގެންނަން ޖެހޭ ހިސާބަކީ ކޮން ހިސާބެއްކަން ދެނެގަތުމަށް ދިރާސާތަކެއް ކުރަން ޖެހޭކަން އޭނާ ފާހަގަކުރެއްވިއެވެ.
މެމްބަރުގެ ވާހަކައިގައި ވިދާޅުވީ ރައްޔިތުންގެ މަޖިލީހުގެ މެމްބަރުންނަކީ ރައްޔިތުން ތަމްސީލުކުރާ މަންދޫބުންކަމަށެވެ. އެހެންކަމުން މެމްބަރުންގެ އަދަދު ލިމިޓްކުރާ ވާހަކަ ދައްކާއިރު، ނުވަތަ އެފަދަ އިސްލާހެއް ގާނޫނު އަސާސީއަށް ގެންނައިރު، ރާއްޖޭގެ އާބާދީ އިތުރުވަމުންދާ ދިއުމާއި، އާބާދީ ދަތުރުކުރަމުންދާ ދިއުމާމެދު ރިއާޔަތްކުރުން މުހިންމުކަން އޭނާ ފާހަގަކުރެއްވިއެވެ.
މިއިން އެއްވެސް ކަމަކަށް ބެއްލެވުމެއް ނެތި ވަކި އަދަދެއް ވިދާޅުވެ، މަޖިލިސް މެމްބަރުން އިތުރު ނުކުރެވޭ ގޮތަށް، ލިމިޓްކުރުމަކީ އެކަމުގައި އޮތް އެންމެ ރަނގަޅު ހައްލުތޯވެސް ބަލަން ޖެހޭނެކަމަށް އޭނާ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
