ޕްރޮސެކިއުޓަރ ޖެނެރަލް ހުސެއިން ޝަމީމަކީ ރައްޔިތުންގެ މަޖިލީހުގެ ވިލިމާލޭ ދާއިރާގެ ކުރީގެ މެމްބަރު އަހުމަދު ނިހާނު ހުސެއިން މަނިކުގެ ހެއްކެއްގެ ގޮތުގައި ކްރިމިނަލް ކޯޓުން ބަލައިގެންފިއެވެ.
ނިހާނުގެ މައްޗަށް ދައުލަތުން ވަނީ ރިޝްވަތު ނެގިކަމުގެ ހަތަރު ދައުވާއަކާއި މަނީ ލޯންޑަރ ކުރިކަމުގެ ދައުވާއެއް އުފުލާފައެވެ. އޭނާގެ މައްޗަށް ދައުވާ އުފުލާފައިވަނީ މަޖިލީހުގެ މެމްބަރުކަމުގެ މަގާމުގައި ހުންނަވާ ކުރީގެ ނައިބުރައީސް އަދި އެމްއެމްޕީއާރުސީގެ ޚިޔާނާތް ހިންގިކަމުގެ ކުށް ސާބިތުވެފައިވާ އަހުމަދު އަދީބުގެ އަތްޕުޅުން ފައިސާ ނެންގެވިކަމުގެ ތުހުމަތުގައެވެ.
އެ މައްސަލައިގެ ޝަރީއަތް ފަށާފައިވާއިރު، ނިހާނުގެ ފަރާތުން ވަނީ ޕީޖީ ޝަމީމު ދިފާއީ ހެއްކެއްގެ ގޮތުގައި ހުށައަޅުއްވާފައެވެ. ޕީޖީ ޝަމީހު ހެއްކެއްގެ ގޮތުގައި ހުށައެޅުއްވީ އަދީބުގެ ލޯޔަރެއްގެ ގޮތުގައި ހުންނެވި އިރު، ޝަމީމު ކުރައްވާފައިވާ ޓްވީޓަކާއި ގުޅިގެންނެވެ.
އަދި މިއީ ޕީޖީގެ މަގާމުގައި ހުރި ފަރާތެއް ދިފާއީ ހެއްކެއްގެ ގޮތުގައި ހުށައަޅައި ބަލައިގަންތ ފުރަތަމަ ފަހަރުކަން ފާހަގަކޮށްލެވެއެވެ. ކްރިމިނަލް ކޯޓުން އެފަދައިން ޝަމީމު ހެއްކެއްގެ ގޮތުގައި ބަލައިގަތުމަށް ނިންމާފައިވާ ދިފާއީ ހެއްކެއްގެ ގޮތުގައި ޝަމީމު ބަލައިނުގަތުމަށް ދައުލަތުގެ ފަރާތުން އެދިފައިވަނިކޮށެވެ.
ޕީޖީ ޝަމީމުގެ އިތުރުން ޔޫތު މިނިސްޓަރު އަހުމަދު މަހުލޫފާއި، ކުރީގެ ޓުއަރިޒަމް މިނިސްޓަރު އަލީ ވަހީދުގެ ނަންވެސް ދިފާއީ ހެކިންގެ ގޮތުގައި ހުށައަޅާފައިވެއެވެ. އެ ދެ ބޭފުޅުންގެ ނަން ހުށައަޅާފައިވަނީ ޕީޕީއެމްގެ ޕާލަމެންޓްރީ ގްރޫޕުގައި މަސައްކަތްކުރަމުން އައި ގޮތް ސާބިތުކުރުމަށާއި، އަދީބުގެ ފޯނުން ނަގާފައިވާ މޯބައިލް ފޮރެންސިކް ހެދުމާމެދު ސުވާލު އުފެދޭކަން ސާބިތުކުރުމަށެވެ.
ދައުލަތުން ވަނީ އެ ދެބޭފުޅުންވެސް ހެކިންގެ ގޮތުގައި ބަލައިގަތުމާމެދު އިއުތިރާޒުކުރައްވާފައެވެ.
އޭގެ އިތުރުން މާލިއްޔަތު ކޮމެޓީގައި ކަންކަން ހިންގައި ދިޔަގޮތް ސާބިތުކުރުމަށް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހުއާއި، ނައިބުރައީސް ފައިސަލް ނަސީމު ދިފާއީ ހެކިންގެ ގޮތުގައިވެސް ހުށައަޅުއްވާފައިވެއެވެ. އެހެން ނަމަވެސް ގާޒީ ވަނީ އެ ބޭފުޅުން ހެކިންގެ ގޮތުގައި ބަލައިނުގަތުމަށް ނިންމަވާފައެވެ.
Advertisement
This content is created and paid for by advertisers and does not involve Voice Journalists
