އެފްކޯންސް ކުންފުނީގެ އިހުމާލުން ވިލިމާލޭ ފަރަށް ލިބުނު ގެއްލުންތަކާއި ގުޅިގެން އެންވަޔަރުމަންޓު ޕްރޮޓެކްޝަން އޭޖެންސީ (އީޕީއޭ) އަށް އިންޑިއާއާއި މަޝްވަރާކުރުމަށް މަޖުބޫރު ކުރުވީ ސަރުކާރުންކަމަށް މަޖިލީހުގެ މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރު މިނިސްޓަރު މުހައްމަދު ސައީދު ވިދާޅުވެއްޖެއެވެ. 

ސައީދު މިފަދައިން ވިދާޅުވެފައިވަނީ ވިލިމާލޭ ފަރަށް ޕްލެޓްފޯމު އެރި މައްސަލައިގައި، ބްރިޖުގެ މަސައްކަތް ކުރަމުން އަންނަ އިންޑިއާގެ އެފްކޮންސް ކުންފުންޏާ މަޝްވަރާ ކުރުމަށް އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) ގެ ޑިރެކްޓާ ޖެނެރަލް އިބްރާހީމް ނައީމް އިންޑިއާއަށް ވަޑައިގެންފައިވާކަމަށް ރާއްޖޭގެ އޮންލައިން ނޫހަކުން ރިޕޯޓު ކުރުމާއި ގުޅިގެން ކުރެއްވި ޓްވީޓެއްގައެވެ. 

ސައީދުގެ ޓްވީޓުގައި ވަނީ އެ ޚަބަރު ހިއްސާކުރައްވާ ގިނަ ސުވާލުތަކެއްވެސް އަމާޒުކުރައްވާފައެވެ.

އެގޮތުން ސައީދު ވަނީ ގޮނޑު ދޮށުން ވެލި ނެގުމުން ނުވަތަ ނުބައި ތަނެއްގައި ޕާކުކުރުމުން ޖޫރިމަނާ ކުރުމުގެ ކުރިން އެކަން ކުރާ ފަރާތްތަކާއި މަޝްވަރާ ކުރޭތޯ އައްސަވާ ސުވާލުކުރައްވާފައެވެ. 

އިންޑިއާގެ އެފްކޯންސް ކުންފުނީގެ އިހުމާލުން ވިލަމާލޭ ފަރަށް ބޮޑެތި ގެއްލުންތަކެއް ލިބުނު ނަމަވެސް، ތިމާވެށި ހިމާޔަތްކުރުމުގެ ކަންކަމާއި ގުޅުންހުރި އިދާރާއިން އެފްކޯންސް ކުންފުނީގެ ފައިބުޑަށް ވެއްޓެން ޖެހުނީ ކީއްވެތޯވެސް ސައީދު އެއްސެވިއެވެ. 

އަދި އީޕީއޭގެ މި ދަތުރަކީ ސަރުކާރުން މަޖުބޫރުކޮށްގެން ކުރާ ދަތުރެއްކަމަށް އޭނާ ވިދާޅުވިއެވެ. އެއާއެކު އޭނާ ވަނީ މިފަދަ ކަންކަން ހިނގަމުން ދިއުމަކީ ވަރަށް ދެރަ ކަމެއްކަންވެސް ފާހަގަކުރައްވާފައެވެ. 

ތިލަމާލެ ބްރިޖު އެޅުމަށްޓަކައި އިންޑިއާގެ އެފްކޯންސް ކުންފުނިން ހެދި ޕްލެޓްފޯމު ހައްޔަރުން ނެއްޓި ފަރަށް އެރުމާއި ގުޅިގެން ވިލިމާލޭ ފަރަށް ލިބުނު ގެއްލުންތަށް ދިރާސާކުރުމަށް އީޕީއޭއިން ވަނީ ސާރވޭއެއް ހަދާފައެވެ. އަދި ހޯދުންތައް އެ އިދާރާއިން ވަނީ އިންޑިއާގެ ކުންފުންޏާއި ހިއްސާކޮށްފައެވެ. 

އެހެން ނަމަވެސް އިންޑިއާ ކުންފުނީގެ އިހުމާލުން ފަރަށް ލިބުނު ގެއްލުންތަކާއި ގުޅިގެން ކުންފުނި ޖޫރިމަނާ ކުރެވޭނެ އަދަދެއް އަދި ހާމަކޮށްފައެވެ. 

މީގެ ކުރިން މިފަދަ ހާދިސާތަކުގައި ވަރަށް ބޮޑެތި އަދަދުތަކުން ކުންފުނިތައް ޖޫރިމަނާކޮށްފައިވާކަން ފާހަގަކޮށްލެވެއެވެ.