ރައްޔިތުންގެ މަޖިލީހުގެ ރައީސް އަދި ސަރުކާރުގެ ހިންގާ މައި ޕާޓީ އެމްޑީޕީގެ ރައީސް މުހައްމަދު ނަޝީދުގެ ކޮއްކޮ ނާޒިމް ސައްތާރުގެ މައްޗަށް އެއްޖިންސުން ގުޅުން ހިންގިކަން ސާބިތުވުމާއި ގުޅިގެން ކުރި ހުކުމުން ފެނުނީ ސަދޫމުގައި އޮތް އިންސާފު ކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު (މޮސްޓާ) ވިދާޅުވެއްޖެއެވެ. 

އެއްޖިންސުން ގުުޅުން ހިންގިކަމުގެ ކުށް ސާބިތުވުމާއެކު ނާޒިމު ސައްތާރު 3 މަހާއި 26 ދުވަހު ގޭ ބަންދުކުރުމަށް ވަނީ ހުކުމްކޮށްފައެވެ. އެހެން ނަމަވެސް އޭނާގެ ބައިވެރިޔާ އަލަމްގިރީގެ މައްޗށް ކުށް ސާބިތުވުމާއި ގުޅިގެން ވަނީ 7 މސް ދުވަހުގެ ޖަލު ހުކުމެއް އައިސްފައެވެ. 

އަދުދު އިންސާފު ގާއިމުކުރުމުގައި އޮތް ތަފާާތުކުރުން ތަކުގެ މައްޗަށް އަލިއަޅުވާލާ މޮސްޓާ ކުރެއްވި ޓްވީޓެއްގައި ވަނީ ނާޒިމް ސައްތާރަކީ ނަޝީދުގެ ކޮއްކޮއަށްވުމުން އޭނާގެ މައްޗަށް ހުކުމް ކުރުމަށް ފަނޑިޔާރު ބިރުފުޅިގަތީތޯ އައްސަވާފައެވެ. 

Advertisement

މީގެ ކުރިން އަދުލު އިންސާފުގެ ވާހަކަ އަޑަށް ބާރުލާފައި ދެއްކި އެމްޑީޕީ މީހުން އެ ޕާޓީގެ ރައީސްގެ ކޮއްކޮގެ މައްޗަށް އެއްޖިންސުން ގުޅުން ހިންގިކަމުގެ ކުށް ސާބިތުވުމާއި ގުޅިގެން ކުރި ހުކުމަށްފަހު، އިތުރަށް އިންސާފުގެ ވާހަކަ ދައްކަން ލަދުގަންނަން ޖެހޭނެކަމަށް އޭނާ ވިދާޅުވިއެވެ. 

މި ވެރިކަމުގައި މިހާރު އޮތީ ސަދޫމުގައި އޮތް އަދުލު އިންސާފުކަމަށް މޮސްޓާ ވަނީ ސިފަކުރައްވާފައެވެ.