ވަގުތީ އަމުރަކާމެދު ގޮތެއް ނިންމުމުގައި ފަރުވާކުޑަކޮށްފައިވާކަމަށް ބުނެ ސިވިލް ކޯޓުގެ ޤާޟީ އަލްއުސްތާޛު ޢަލީ އަށް ސުލޫކީ ފިޔަވަޅު އަޅަން ޖުޑީޝަލް ސަރވިސް ކޮމިޝަން (ޖޭއެސްސީީ) އިން ނިންމައިފިއެވެ. 

ޖޭއެސްސީީ މިއަދު ނެރުނު ބަޔާނެއްގައި ބުނީ، ސިވިލް ކޯޓުގެ ޤަޟިއްޔާއަކާ ގުޅިގެން ގާޒީ އަލީ ވަގުތީ އަމުރަކަށް އެދި ދަޢުވާކުރާ ފަރާތުން ހުށަހެޅުމުން އަޑު އެހުމެއް ބޭއްވުމަށްފަހު އެ މައްސަލައިގެ "ވަގުތީ އަމުރާމެދު ނިންމިގޮތް" ނިންމާފައިވަނީ ވަގުތީ އަމުރަކާމެދު ގޮތެއް ނިންމުމަށް އެދި ހުށަހަޅާ މައްސަލައެއްގައި ގޮތެއް ނިންމުމަށް އެކަށީގެންވާ މިންވަރަށްވުރެ ގިނަ ދުވަހުންކަމަށެވެ.

އެހެންކަމުން ވަގުތީ އަމުރާމެދު ގޮތެއް ނިންމުމުގައި ޤާޟީ ޢަލީ ފަރުވާކުޑަކޮށްފައިވާކަމަށް ގަބޫލުކުރެވޭ ކަމަށާ، އެބޭފުޅާގެ އެ އަމަލަކީ ގާނޫނުއަސާސީއާއި, ފަނޑިޔާރުންގެ ގާނޫނާއި, ފަނޑިޔާރުންގެ ސުލޫކީ މިންގަނޑާ ހިލާފު އަމަލެއްކަމަށް އެ ބަޔާނުގައި ބުނެފައިވެއެވެ.

Advertisement

ވުމާއެކު، ޤާނޫނު ނަންބަރު ޖުޑީޝަލް ސަރވިސް ކޮމިޝަންގެ ޤާނޫނު ގެ ދަށުން ޤާޟީ ޢަލީ އަށް ނަޞޭޙަތް ދިނުމާ އެކު ކޮމިޝަނުން ކަނޑައަޅާ ތަމްރީން ޕްރޮގްރާމެއް ފުރިހަމަ ކުރުމަށް އެންގުމުގެ ފިޔަވަޅު އެޅުމަށް ފެންނަ ކަމަށް 2022 ސެޕްޓެންބަރު 11 ވަނަ ދުވަހު ބޭއްވި މި ކޮމިޝަނުގެ މިއަހަރުގެ 62 ވަނަ ޖަލްސާގައި ނިންމާފައިވާކަމަށް ވެސް ޖޭއެސްސީީގެ ބަޔާނުގައިވެއެވެ.