މަސްވެރިން ފެލިވަރަށް މަސްކިރުމަށްޓަކައި ތިން ކިޔޫ އަށް އަރާ 5 ދުވަސް ހޭދަކުރަން ޖެހޭ ކަމަށް ޕީޕީއެމްގެ ނައިބު ރައީސް އަދި ރައްޔިތުން މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ.

ޝިޔާމް މިހެން ވިދާޅުވެފައިވަނީ އިއްޔެ އޮތް ރައްޔިތުން މަޖިލީހުގެ ޖަލްސާގައި ވާހަކަ ދައްކަަވަމުންނެވެ. މި ވާހަކަތައް ހިއްސާކޮށް އޭނާ ކުރައްވާފައި ޓުވީޓެއްގައި ވިދާޅުވެފައިވަނީ މަސްވެރިން ބުނާގޮތުގައި މިއީ '3 ކިޔޫ ސަރުކާރު' ކަމަށެވެ. 

ރައްޔިތުންގެ މަޖިލީހުގައި ވާހަކަދައްކަވަމުން ޝިޔާމް ވިދާޅުވެފައިވަނީ އޭނާ ނިސްބަތްވާ ނައިފަރުގެ ކެޔޮޅެއް އެބޭފުޅާއަށް މިކަމުގެ ޝަކުވާ ކޮށްފައިވާކަމަށެވެ. އެގޮތުން މަސް ހިފައިގެން ފެލިވަރަށް ދިޔުމުން ތިން ކިޔޫ އަކަށް އަރަންޖެހޭ ކަމަށާއި އެއީ އައިސް ކިޔޫ އާއި ތެޔޮ ކިޔޫއާއި މަސް ކިޔޫ ކަމަށެވެ. މި ތިން ކިޔޫގައި 5 ދުވަސް ހޭދަކުރުމަށްފަހު ބާނާ މަސްކޮޅު ކިރަން ފުރުސަތު ލިބޭއިރު ގެންދާ މަހުގެ އެއްބައި ހުންނަނީ ގޯސްވެފަ ކަމަށެވެ. އެގޮތުން 12 ޓަނުގެ މަސް ހިފައިގެން ފެލިވަރަށް ގޮސް މަސް ކިރޭ ވަރު ވާއިރު ތިން ޓަނުގެ މަސް ގޯސްވެފައި ހުންނަ ކަމަށް ޝިޔާމް ވަނީ ވިދާޅުވެފައެވެ.

މީގެއިތުރުން ޝިޔާމް ވިދާޅުވެފައިވަނީ މަސްކިރުމުން ސަރުކާރުން ދޭން ބުނި ޑޮލަރުގެ ބަދަލުގައި ދެނީ މުއްދަތު ފައިސާގެ ޗިޓެއްކަމަށްވެސް ޝިޔާމް ވަނީ ވިދާޅުވެފައެވެ. ޝިޔާމް އިތުރަށް ވިދާޅުވެފައިވަނީ މިއީ މަސްވެރިކަން ރަނގަޅުނޫން އިރުގެ ހާލަތު ކަމަށާއި ސަރުކާރުން ބޭނުންވާ ސިޔާސަތުތައް ހާސިލް ކުރުމަށް ފައިސާ ޗާޕުކޮށްގެންވެސް ހައްލު ހޯދޭ ކަމަށެވެ.