ރާއްޖެއިން ކޮވިޑާއި ދެކޮޅަށް ކުރަމުންދާ މަސައްކަތައް އެހީވުމަށް ޔުނައިޓެޑް ސްޓޭޓްސް އޭޖެންސީ ފޯ އިންޓަރނޭޝަނަލް ޑިވެލޮޕްމަންޓް (ޔޫ.އެސް.އޭ.އައި.ޑީ)ގެ ފަރާތުން ރާއްޖޭގެ ނޭޝަނަލް ހެލްތު ލެބޯޓަރީގައި ޖީން ސީކުއެންސިން ވަސީލަތް ގާއިމުކުރުމަށް ބޭނުންވާ އާލާތްތަކަާއި އެހެނިހެން ތަކެތި މިނިސްޓްރީ އޮފް ހެލްތަށް ފޯރުކޮށްދީފިއެވެ. 

ރާއްޖޭގެ ނޭޝަނަލް ހެލްތު ލެބޯޓަރީއަކީ ކޮވިޑް-19 ވައިރަސްގެ ޖީން ސީކުއެންސިން ހެދުމުގެ ގާބިލުކަން ލިބިގެންދާ ފުރަތަމަ ޕަބްލިކް ފެސިލިޓީއެވެ. އަދި މި ފެސިލިޓީގެ ސަބަބުން މި ވައިރަސްއަށް އަންނަ ބަދަލުތައް ދެނެގަނެ، އެކަށޭނެ ފިޔަވަޅު އެޅުމަށް އެހީތެރިވެދޭނެއެވެ. މި ފެސިލިޓީއަކީ ކުރިއަށްއޮތް ތަނުގައި އިތުރަށް ފުޅާކޮށް، އެހެނިހެން ޕެތޯޖެން-ބޭސްޑް ޕެންޑެމިކްތަކަށް ޖީން ސީކުއެންސިން ހެދުމަށްޓަކައި ބޭނުންކުރެވިދާނޭ ފެސިލިޓީއެކެވެ. 

"މިއަދު މި ފާހަގަކުރަނީ ކޮވިޑްއާ ދެކޮޅަށް ކުރާ މަސައްކަތް ކުރިއަށްގޮސްފައިވާ ހިސާބު. ސަތޭކަ އެތައް ޒަރޫރީ ތަކެއްޗާއި ސަޕްލައިޒް މި ވަނީ ނޭޝަނަލް ހެލްތު ލެބޯރަޓަރީއަށް ފޯރުކޮށްދީފަ. ޖީން ސީކުއެންސިން ފެސިލިޓީ މި ވަނީ ފުރިހަމައަށް ތަރައްގީކޮށް، ބޭނުންކުރަން ފެށުމަށް ތައްޔާރުވެފަ. ޔޫ.އެސް.އޭ.އައި.ޑީ އަދި ދުނިޔޭގެ ސިއްހަތު ޖަމިއްޔާގެ ފަރާތުން ފޯރުކޮށްދޭ ފަންނީ އެހީތެރިކަމާއެކު މި ލެބޯޓަރީގެ މުވައްޒަފުންނަށް ކޮވިޑް-19ގެ މޮލެކިއުލަރ ޑައިގްނޮސްޓިކްސް އަދި ޖީނޯޓައިޕިންއާ ގުޅުންހުރި ތަމްރީނުތައް ފޯރުކޮށްދީ، މިކަމުގައި އެހީތެރިވެދޭނެ" މި ރަސްމިއްޔާތުގައި ވާހަކަފުޅު ދައްކަވަމުން ޔޫ.އެސް.އޭ.އައި.ޑީގެ ސްރީލަންކާއަށާއި ދިވެހިރާއްޖެއަށް ކަނޑައަޅުއްވާފައި ހުންނަ މިޝަންގެ ގަވަރަންސް އެންޑް ވަލްނަރަބަލް ޕޮޕިއުލޭޝަންގެ އޮފީހުގެ ޑިރެކްޓަރ ކެވިން ޑީން ވިދާޅުވިއެވެ.

Advertisement

މީގެ އިތުރުން ޔޫ.އެސް.އޭ.އައި.ޑީއިން ވަނީ 1.5 މިލިއަން އަންގި މިނިސްޓްރީ އޮފް ހެލްތަށް ފޯރުކޮށްދީފައެވެ. މި ތަކެތީގެ ސަބަބުން ސިއްހީ ދާއިރާގައި މަސައްކަތްކުރާ ފަރާތްތަކުގެ މެދުގައި ބަލި ފެތުރުން މަދުކޮށް، ހުއްޓުވުމަށް އެހީތެރިވެދޭނެއެވެ. 

މާރޗް 2020 ގައި ޕެންޑެމިކް ފެތުރެން ފެށީންސުރެ އެމެރިކާގެ ފަރާތުންވަނީ 639،990 ރައްކާތެރި އަދި އިފެކްޓިވް ފައިޒާ ބަޔޯ-އެން-ޓެކް ވެކްސިން ރާއްޖެއަށް ފޯރުކޮށްދީފައެވެ. އަދި އިމަޖެންސީ ސަޕްލައިގެ ގޮތުގައި ޕަލްސް އޮކްސިމީޓަރާއި، ޕާރސަނަލް ޕްރޮޓެކްޓިވް އިކުއިޕްމަންޓް ފޯރުކޮށްދީފައެވެ. މީގެ އިތުރުން 7 މިލިއަން ޑޮލަރަށްވުރެ ގިނަ ކޮވިޑް-19 ގެ އެހީތެރިކަން ރާއްޖެއަށް ފޯރުކޮށްދީފައެވެ. އަދި 60 ވެންޓިލޭޓަރުވަނީ ރާއްޖެއަށް ހަދިޔާކޮށްފައެވެ. މި އެހީތެރިކަމުގެ ތެރެއިން ފުރާނަ ސަލާމަތްކުރަނިވި ފަރުވާދެވި، އިޖުތިމާއި ރައްކާތެރިކަމުގެ ހިދުމަތްތައް ފުޅާކޮށް، ކޮވިޑާ ދެކޮޅަށް އިގްތިސާދީ އަދި މާލީ ސިޔާސަތުތައް ބައްޓަންރުކުރުމަށް އެހީތެރިކަންވަނީ ފޯރުކޮށްދީފައެވެ.