ޤާނޫނަށް ގެންނަންޖެހޭ ބަަދަލުތައް ގެނެސް ފިގުހު އެކަޑަމީ ވަރަށް އަވަހަށް ހުޅުވިގެންދާނެކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.
އަސްލަމް މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ތިންވަނަ ދައުރުގެ 16 ވަނަ ޖަލްސާއަށް މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު ގައުމީ ފަތުވާ މަޖިލިސް އެކުލަވާލުމަށް ހުށައެޅުއްވި ގަރާރަށް ވާހަކަދައްކަވަމުންނެވެ.
އަސްލަމްގެ ވާހަކައިގައި ވަނީ އާދަމް ޝަރީފު އެ ގަރާރު ހުށައެޅުއްވި މަގްސަދާއި ގުޅިގެން ސުވާލު އުފައްދަވާފައެވެ. އަދި ވިދާޅުވީ އިސްލާމީ ކަންކަމުގައި ސިޔާސީ ގޮތުން ވަކި މަންފާއެއް ހާސިލް ކުރުމަށް މަސައްކަތް ކުރުމަކީ ދެރަ ކަމެއްކަމަށެވެ.
ފުރަތަމަ ފަހަރަށް އިސްލާމިކް މިނިސްޓްރީއެއް އުފެއްދެވީވެސް އެމްޑީޕީގެ 2008 ގެ ވެރިކަމުގައި ކަމަށެވެ. ދީނީ ގޮތުން އުފެދޭ ޚިޔާލް ތަފާތުވުންތަކުގައި ފަތުވާދޭން އޭރު އުފެއްދި "ފިގުހު އެކަޑަމީ" ފަހުން އައި ސަރުކާރުން "ފަތތުވާދޭ މަޖިލީހަށް" ބަދަލުކުރުމަކީ އެކަމުން އެދެވޭ މަސައްކަތްތަކެއް ނުކުރެވި ދިޔަ ކަމެއްކަމަށް އަސްލަމް ވިދާޅުވިއެވެ.
"2008 ވަނަ އަހަރު އުފެދުނު އެމްޑީޕީ ވެރިކަމެއްގައި ފުރަތަ ފަހަރަށް އިސްލާމިކް މިނިސްޓްރީއެއް އުފެއްދީ. މިއަދު މިދެކެވޭ ވާހަތަކާއި ގުޅިގެން ދަންނަވަން އޮތީ ހަގީގަތަކީ އިސްލާމީ ފަތުވާދޭ މަޖިލީހަކަށްވުރެ ރަނގަޅީ ފިގުހު އެކަޑަމީއެއް."
މަޖިލީހުގެ މެޖޯރިޓީ ލީޑަރު މުހައްމަދު އަސްލަމް
އަސްލަމް ވިދާޅުވީ ފަތުވާ ކޮމެޓީގެ މަސްއޫލިއްޔަތުތަކަށް ބަދަލުގެނެސް ފިގުހު އެކަޑަމީ އުފެއްދުމަށްޓަކައި ގާނޫނަށް ގެންނަން ޖެހޭ އިސްލާހު ގެނައުމުގެ މަސައްކަތް މިހާރުވެސް ސަރުކާރުން ކުރަމުންދާކަމަށެވެ.
އަދި ސަރުކާރުން އަމާޒު ހިދާފައިވަނީ މި ދައުރު ނިމެންވާއިރަށް ގާނޫނަށް އިސްލާު ގެނެސް ފިގުހު އެކަޑަމީ އުފެއްދުމަށްކަންވެސް އޭނާ ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
