ދައުރު ހަމަވެފައިވާ ގައުމީ ފަތުވާ މަޖިލިސް އަލުން އެކުލަވާލާއިރު، ސަރުކާރު ކޯލިޝަންގައި ހިމެނޭ އަދާލަތު ޕާޓީ ނުހިމެނޭހެން އެ މަޖިލިސް އެކުލަވާލުމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ގޮވާލައްވައިފިއެވެ. 

ގައުމީ ފަތުވާ މަޖިލީސް އެކުލަވާލުމަށް ހުށައެޅި ގަރާރަށް ވާހަކަދައްކަވަމުން ޝިޔާމު ވަނީ އެ ކަމަކީ ވީ އެންމެ އަވަހަށް ކުރަން ޖެހޭ ކަމެެއްކަމަށް ވިދާޅުވެފައެވެ. 

އާންމު ރައްޔިތުންގެ މެދުގައި ދީނީ ކަންކަމާއި ގުޅޭގޮތުން އުފެދޭ ޚިޔާލު ތަފާތުވުންތައް ނައްތާލައި، ދީނީ އެއްބައިވަންތަކަން އިތުރުކުރުމަށް ފަތުވާ ދޭ މަޖިލިސް އޮތުން މުހިންމުކަމަށް އޭނާ ވިދާޅުވިއެވެ. 

Advertisement

އެއާއެކު އޭނާ ވަނީ އެ މަޖިލިސް އެކުލަވާލާއިރު އަދާލަތު ޕާޓީއާއި، އެ ޕާޓީގައި "ދީނީ ތާޖު" އަޅުއްވައިގެން ތިއްބެވި އިލްމުވެރިންވެސް ނުހިމެނުމަށް ޝިޔާމު ވަނި ގޮވާލައްވާފައެވެ. އަދި އެފަދައިން އޭނާ ހުށައެޅުއްވި ސަބަބުވެސް ޝިޔާމު ވަނީ ބަޔާންކުރައްވާފައެވެ. 

ޝިޔާމު އިތުރަށް ވިދާޅުވީ އަދާލަތު ޕާޓީގެ މައިގަނޑު މަގްސަދު ތެރޭގައި އިސްލާމްދީނުގެ ހައްގުގައި މަސައްކަތްކުރާނެ ވާހަކަ އޮތް ނަމަވެސް އެގޮތަށް އަމަލުކުރަމުން ނުދާކަމަށެވެ. ވަކިން ޚާއްސަކޮށް އަދާލަތު ޕާޓީގެ ރައީސް އަދި ސަރުކާރުގެ ހޯމް މިނިސްޓަރު އިމްރާނު އަބްދުﷲ ގެ އަމަލުތައް ހުންނަނީ ޕާޓީގެ އަސާސީ ގަވައިދުތަކާއިވެސް ޚިލާފަށްކަން އޭނާ ފާހަގަކުރެއްވިއެވެ. 

އެހެންކަމުން ގައުމީ ފަތުވާ މަޖިލީހުގައި އަދާލަތު ޕާޓީ، އޭގެ ތެރެއިންވެސް ސިޔާސީ ވިސްނުން ގެންގުޅުއްވާ ދީނީ އިލްމުވެރިން ނުހިމެނުމަށާއި، އެއިން އެއްވެސް ބޭފުޅަކަށް އެ މަޖިލީހަށް ނުފޫޒުވެސް ނުފޯރުވޭނެ ގޮތަށް އެމަޖިލިސް އެކުލަވާލުމަކީ މުހިންމުކަމެއްކަމަށް ޝިޔާމު ވިދާޅުވިއެވެ. 

އަދި އެފަދައިން އެ މަޖިލިސް އެކުލަވާލުމަށް ޝިޔާމު ވަނީ ގޮވާލައްވާފައެވެ.