‏‏ދިވެހިރާއްޖޭގެ އަދުލުއިންސާފު ވަނީ ވީދި ހަފުސްވެ، ސަދޫމް އިންސާފަށް ވެފައި ކަމަށް ވިދާޅުވެ ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު މުހައްމަދު ނަޝީދު (މޮސްޓާ) ސަރުކާރަށް ފާޑުވިދާޅުވެއްޖެއެވެ. 

ދިވެހިރާއްޖޭގެ ގައުމީ ދިދައިގެ އެއްބައި އިރިފައިވާ ފޮޓޯއެއް ހިއްސާކުރައްވައި މޮސްޓާ ކުރެއްވި ޓުވީޓެއްގައި ވިދާޅުވީ، ދިވެހިރާއްޖޭގެ ހާލަތަކީވެސް ހަމަ އެ އިރައިގެން ގޮސްފައިވާ ގައުމީ ދިދައިގެ ހާލަތު ކަމަށެވެ. 

"ޢިޖުތިމާއީ ފޭރާން ވިދިވިދިގެން ގޮސްފައިވާއިރު އަދުލުއިންސާފުވެސް ވަނީ ވިދިވިދިގެން ހަފުސްވެ ސަދޫމް އިންސާފަށް ވެފައި." މޮސްޓާ ވިދާޅުވިއެވެ.

މިއާއެކު ގައުމުގެ ހާލަތު ބޮއްސުންލައިގެން ގޮސް އަދުލު އިންޞާފު، ސަދޫމް އިންސާފަށްވެ، އެއްޖިންސުން ގުޅުން ހިންގާ މީހުންނަށް އަދަބު ނުދެވޭ އިރު، އަދިވެސް ރައްޔިތުން ހޭވެރިވާން ނުވޭތޯ މޮސްޓާ ވަނީ ސުވާލުކުރައްވާފައެވެ. އަދި ރާއްޖޭގެ ހާލަތު ހުރިގޮތުން، ވަތަނީ ގައުމީ ލޯބި ހުރި ކޮންމެ ލޮލަކުން މިއަދު ހަމަޔަގީނުންވެސް ކަރުނަ އަޅާނެ ކަމަށްވެސް އޭނާ ވިދާޅުވިއެވެ.

ދިވެހި މުޖުތަމައު ގައި އެއްޖިންސުން ގުޅުން ހިންގުމާއި، ހަށި ވިއްކުމާއި، މަސްތުވާތަކެތީގެ މައްސަލަ ތަކާއި މާރާމާރީ އާއި އެނޫންވެސް އެތައް ކުށްތަކެއް އާއްމުވެ، ކުށް ކުރާ މީހުންނަށް ހައްގު އަދަބު ދިނުމަށް ސަރުކާރުން ނުކުޅެދިފައިވާ ކަމަށް ބުނެ ގިނަ ދިވެހިން އަންނަނީ ކަންބޮޑުވުން ފާޅުކުރަމުންނެވެ.