ހދ. ހަނިމާދޫ އެއާޕޯޓު ތަރައްގީ ކުރުމުގެ މަޝްރޫއު އިންޑިއާގެ ޖޭއެމްސީ ޕްރޮޖެކްޓްސްއާ ހަވާލުކޮށްގެން ތިލަދުންމަތީ ރައްޔިތުން ގުނބޯ ހައްދަން ހެޔޮނުވާނެ ކަމަށް ޕީއެންސީގެ ނައިބު ރައީސް އަދި މާލެސިޓީގެ ހުޅުމާލޭ ދާއިރާގެ ކައުންސިލަރު އިބްރާހިމް ޝުޖާއު ވިދާޅުވެއްޖެއެވެ.

ހދ.ހަނިމާދޫ އިންޓަނޭޝަން އެއަރޕޯޓް ތަރައްގީކުރުމަށް އިންޑިއާގެ ޖޭއެމްސީ ޕްރޮޖެކްޓްސްއާ ހަވާލު ކުރުމާއި ގުޅިގެން ޝުޖާއު ކުރެއްވި ޓުވީޓެއްގައި ވިދާޅުވީ، އޭނާގެ ރަށާއި އިންވެގެން ތަރައްޤީވެފަ އޮންނަ އެއަރޕޯޓެއް އޮތުމަކީ ޝައްކެތް ނެތްގޮތުގައި އޭނާވެސް އުފާވާނެ ކަމެއްކަމަށެވެ. އެހެންނަމަވެސް، އެކަން ކުރަން ސަރުކާރުން ހަވާލުކޮށްފައިވަނީ އެއަރޕޯޓު ތަރައްޤީ ކުރެވޭ ވަރުގެ ބަޔަކާއެކު ނޫން ކަން ޔަގީންވާ ކަމަށްވެސް ޝުޖާއު ވިދާޅުވި އެވެ. 

"ނަމަވެސް ތިޔަ ސޮއިކުރީ އެއަރޕޯޓު ތަރައްޤީ ކުރެވޭ ވަރުގެ ބަޔަކާއެކު ނޫންކަން ޔަޤީން. 3 އަހަރު ވަންދެން ރަންވޭ މަތީ ފީތާ ހިފާގެން މިންއަޅަން އުޅުނު ބަޔަކަށް ޒަމާނީ ފެންވަރުގެ އެއަރޕޯޓެއް ތަރައްޤީ ކުރެވިދާނެކަމާ މެދު ވަރަށް ބޮޑަށް ޝައްކު އުފެދޭ. މިވަރަށް އަހަރެމެން ހިސާބު މީހުން ގުނބޯ ހައްދަން ހެޔޮނުވާނެ." ޝުޖާއު ވިދާޅުވިއެވެ. 

ތިލަދުންމަތީ ރައްޔިތުންނަށް މަސައްކަތު އުޅޭއިރު ބޮލުގައި އޮންނަ ސޭފްޓީ ހެލްމެޓްގައި ކޮންކްރީޓް ގަށާ މީހުންނާއި ބިމުއަޑިން ހޮޅިއަޅައި މަތިންދާ ބޯޓުގެ ބަނޑުދަށުން މައްޗަށް ބޯޓަށް ތެޔޮ އަޅާ ހޮޅި ނެރޭ ފެންވަރުގެ މީހުން ވަކިކުރަން އެނގޭ ކަމަށް ވިދާޅުވިއެވެ.

"އެކަން ރައީސް ޔާމީން ވެލާނާ އެއާޕޯޓް ތަރައްގީ ކުރެއްވި އިރު ވަނީ ދައްކުވާފަ. އަހަރެމެން ހިސާބު މީހުންނަށްވެސް އެތަން ފެނުނު." ޝުޖާއު ވިދާޅުވިއެވެ.

ހަނިމާދޫ އެއަރޕޯޓް ތަރައްޤީކުރުމުގެ މަޝްރޫޢުގެ ދަށުން 2.46 ކިލޯމީޓަރުގެ އައު ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ޚިދުމަތްދެވޭނެ ޖާގައިގެ ޓަރމިނަލެއް ޢިމާރާތްކުރެވޭނެ ކަމަށް މިނިސްޓްރީން ބުނެއެވެ. 

މިމަޝްރޫޢު ނިމުމުން ބައިނަލްއަޤްވާމީ ދަތުރުތަކުގައި ބޭނުންކުރާ އެއަރބަސް A320 އާއި ބޮއިންގ 737 މަރުކާގެ ބޯޓުތަކަށް މި އެއަރޕޯޓުން ޚިދުމަތް ދެވޭނެކަމަށް އިކޮނޮމިކް މިނިސްޓްރީން ބުނެއެވެ. އަދި މެދުއިރުމައްޗާއި، ދެކުނު އޭޝިއާ އާއި، ދެކުނު އިރުމަތީ އޭޝިއާ އާއި އިރުމަތީ އެފްރިކާގެ ގައުމުތަކުން ސިދާ ފްލައިޓްތައް ހަނިމާދޫ އަށް އޮޕަރޭޓްކުރުމުގެ ގާބިލުކަން ލިބިގެންދާނެކަމަށާ އަދި ބައިނަލްއަޤްވާމީ ދަތުރުތައް ފުޅާކުރުމަށް ބޭނުންވާ އެހެނިހެން ވަސީލަތްތައްވެސް ޤާއިމުވެގެންދާނެކަމަށް އިކޮނޮމިކް މިނިސްޓްރީން ބުނެއެވެ.