ޓީޗަރުންގެ މުސާރައަށް އައި ހެޔޮ ބަދަލާއެކު ތައުލީމީ ދާއިރާއާއި ގުޅެން ބޭނުންވެފައިވާ މީހުން އިތުރުވެއްޖެކަމަށް އެޑިއުކޭޝަން މިނިސްޓަރު ޑރ އައިޝަތު އަލީ ވިދާޅުވެއްޖެއެވެ. 

އެޑިއުކޭޝަން މިނިސްޓަރު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ތިން ވަނަ ދައުރުގެ 18 ވަނަ ޖަލްސާގައި ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔައުގޫބު ކުރެއްވި ސުވާލަކަށް ޖަވާބުދެއްވަމުންނެވެ. 

މެމްބަރު ޔައުގޫބުގެ ސުވާލަކީ މި ސަރުކާރުން ޓީޗަރުންގެ މުސާރަ ބޮޑުތަކުން ބޮޑުކޮށްދެއްވާފައިވާއިރު، މުސާރައަށް އައި ބަދަލާއެކު ދާއިރާއަށް އައި ކުރިއެރުންތަކަކީ ކޮބައިތޯ އައްސަވާ ކުރެއްވި ސުވާލެވެ. 

Advertisement

އެ ސުވާލަކަށް ޖަވާބުދެއްވަން ފައްޓަވަމުން މިނިސްޓަރު ވިދާޅުވީ ޓީޗަރުންގެ ހުރި ކަންބޮޑުވުންތަކާއި ގުޅިގެން އަދި ތައުލީމީ ދަާއިރާއަށް ހުރި ގޮންޖެހުންތަކާއި ގުޅިގެން ސަރިކާރުން ދިރާސާއެއް ހަދާފައިވާނެކަމަށެވެ. 

އެ ދިރާސާއިން ދައްކާގޮތުގައި އެންމެ ބޮޑު ކަންބޮޑުވުމެއްގެ ގޮތުގައި ފާހަގަކޮށްފައިވަނީ މުސާރައިގެ ކަންބޮޑުވުންކަމަށް މިނިސްޓަރު ވިދާޅުވިއެވެ. 

އެއާއެކު ވިދާޅުވީ ރައީސުލްޖުމްހޫރިއްޔާ ވެ ވަޑައިގެންފައިވާ ވައުދުފުޅާއެކު މިހާރު ޓީޗަރުންގެ މުސާރަ ބޮޑުކުރެވިފައިވާކަމަށް މިނިސްޓަރު ވިދާޅުވިއެވެ. އަދި ވިދާޅުވީ މުސާރަ ބޮޑު ކުރެވުނު ނަމަވެސް ސީދާ ތައުލީމީ ދާއިރާއަށް އެކަމުން އައި "އިމްޕެކްޓު" ދެނެގަންނަން އަދި އަވަސްކަމަށެވެ. 

އެހެން ނަމަވެސް މުސާރައަށް އައި ހެޔޮ ބަދަލާއެކު ތައުލީމީ ދާއިރާއާއި ގުޅިވަޑައިގަތުމުގެ ޝައުގުވެރިކަން ހުރި ފަރާތްތައް އިތުރުވަމުންނ އަންނަކަން މިނިސްޓްރީއަށް ފާހަގަކުރެވިފައިވާކަމަށް މިނިސްޓަރު ވިދާޅުވިއެވެ. 

އެޑިއުކޭޝަން މިނިސްޓްރީގެ ދިރާސާއާއި ގުޅޭގޮތުން މިނިސްޓަރު ވިދާޅުވީ މުސާރައިގެ އިތުރުން ވަޒީފާގެ މާހައުގައި ހުރި ދަތިތަކަކީވެސް ޓީޗަރުންގެ ކަންބޮޑުވުމެއްކަމަށެވެ. އަދި އެކަންކަން ހައްލުކުރުމަށް ސަރުކާރުން މަސައްކަތްކުރަމުންދާކަމަށް މިނިސްޓަރު ވަނީ ވިދާޅުވެފައެވެ. 

ޕްރިންސިޕަލުންނާއި ޓީޗަރުންގެ މުސާރަ ބޮޑުކުރުމާއެކު ޓީޗަރަކަށް އެންމެ ދަށްވެގެން ގެއަށް ގެންދަން 13،000 ރުފިޔާ ލިބޭނެއެވެ. ރާއްޖެ އިގްތިސާދު ދަށްވެފައި ވީ ނަމަވެސް ޓީޗަރުންގެ މުސާރައަށް އައި ގެނައި މި ހެޔޮ ބަދަލަކީ ތައުލީމީ ދާއިރާއަށް ސަރުކާރުން ދޭ އަހަންމިއްޔަތުކަން ދައްކުވައިދިން ކަމެއްކަމަށް އެޑިއުކޭޝަން މިނިސްޓަރުގެ އިތުރުން ސަރުކާރުގެ އެކި ވަޒީރުން ފާހަގަކުރައްވައެވެ.