އަމީނީ މަގުގައި ހުރި ގަސްތައް ކަނޑަމުންދާ މައްސަލައާއި ގުޅިގެން ރައްޔިތުންގެ މަޖިލީހަށް ހުށަހަަޅައިފިއެވެ.

އެ މައްސަލަ މަޖިލީހުން ބެލުމަށް އެދި ހުށަހެޅީ ހެންވޭރު ހުޅަނގު ދާއިރާގެ އެމްޑީޕީގެ މެމްބަރު ހަސަން ލަތީފެވެ.

ހަސަން ލަތީފް ހުށަހެޅުއްވި މައްސަލައިގައި ވަނީ މާލެއަކީ ހިތްފަސޭހަ ތަނަކަށް ހެދުމުގެ ވައުދަކީ އެމްޑީޕީގެ ވައުދެއް ކަމަށާއި އެއީ "ޖަޒީރާ ރާއްޖެ މެނިފެސްޓޯ" ގައި އެމްޑީޕީން މާލޭގެ ރައްޔިތުންނާއި މާލޭގައި ދިިރިއުޅޭ އެންމެހައި ރައްޔިތުންނަށް ވެފައިވާ މުހިންމު ވައުދެއް ކަމަށެވެ.

Advertisement

އެ މައްސަލައިގައި ބުނެފައިވަނީ މާލެއަކީ ހިތްފަސޭހަ ތަނަކަށް ހެދުމަށް ޓަކައި ކުރަން ޖެހޭ އެތައް ކަމެއް ވާ ކަމަށާއި މަލޭގެ މަގުތައް ރަނގަޅު ފެންވަރަކަށް ހެދުމަކީ އޭގެ ތެރެއިން އެއް ކަމެއް ކަމަށްވި ނަމަވެސް، އެ މަގުތައް ހަދާއިރު މާލެއަކީ ހިތްފަސޭހަ ތަނަކަށް ހެދުމުގެ މަހްފޫމާއި ވިސްނުން ނުގެއްލޭ ގޮތަށް އެ މަގުތައް ހެދުމަކީ ކޮންމެހެން ވެސް ބޭނުންކަމެއް ކަމަށެވެ.

އަދި އަމީނީ މަގު ހަދަން ފަށައިފައިވާއިރު އެ މަގުގައި މިހާރު މަސައްކަތްކުރާ ހިސާބުގައި ހުރި ހިޔާ ދޭ ބޮޑެތި ގިނަ ގަސްތައް ކަނޑަލައިފައިފައިވާ ކަމަށާއި އެއީ އިންތިހާއަށް ކަންބޮޑުވުން ހުރި ކަމެއްކަން މައްސަލައިގައި ފާހަގަކުރައްވައިފައެވެ. އަދި އެކަމުން އެތައް ސުވާލެއް އުފެދޭ ކަމަށާއި އަމީނީމަގު ހަދަން ނުފަށައި ބާކީ އޮތް ބޮޑު ބައި ހަދަން ފެށުމާ އެކު އެ ހިސާބުގައި ހުރި އެ ފަދަ ބިޔަ ގަސްތައް ކަނޑާލާނެތޯ ސުވާލު އުފެދޭ ކަމަށް ވިދާޅުވެފައިވެއެވެ.

އަމީނީ މަގުގައި ހުރި ގަސްތައް ކަނޑަމުންދާ މައްސަލަ މަޖިލީހަށް ހުށަހަޅާފައިވާއިރު، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވެސް ވަނީ އެކަމުގެ ކަންބޮޑުވުން ފާޅުކޮށް، އެމައްސަލައާއި ގުޅިގެން ކޯޓަށް މައްސަލަ ހުށަހަޅާނެ ކަމަށް ވިދާޅުވެފައެވެ.