މި ސަރުކާރުގެ އަމާޒަކީ ސްކޫލުތައް ހަމައެކަނި އެއްދަންފަޅިއަކަށް ބަދަލުކުރުން ނޫން ކަމަށާއި، ސަރުކާރުގެ އަމާޒަކީ ވަށާޖެހޭ ތައުލީމު ދަރިވަރުންނަށް ފޯރުކޮށްދިނުން ކަމަށް އެޑިއުކޭޝަން މިނިސްޓަރ ޑރ.އާއިޝަތު އަލީ ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ކުރެންދޫ ދާއިރާގެ މެމްބަރު އަބްދުލް ޣަނީ އަބްދުލްހަކީމް، އެއްދަންފަޅިއަށް ސްކޫލުތައް ބަދަލު ކުރުމާ ގުޅޭގޮތުން ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ އެއްދަންފަޅިއަށް ސްކޫލުތައް ހެދުމުގެ މަސައްކަތް ފަށައިގެން ކުރިއަށް ގޮސް، މިހާތަނަށް 157 ސްކޫލެއް އެއްދަންފަޅިއަށް ބަދަލު ކުރެވިފައިވާ ކަމަށެވެ.

މި ސަރުކާރުގެ އަމާޒަކީ ހަމައެކަނި އެއްދަންފަޅިއަށް ބަދަލު ކުރުން ނޫން ކަން ފާހަގަކުރައްވަމުން މިނިސްޓަރ ވިދާޅުވީ، ވަށާޖެހޭ ތައުލީމެއް ފޯރުކޮށްދިނުމުގެ ކޮންސެޕްޓުގެ ދަށުން 44 ސްކޫލެއް އެގޮތަށް ފަށައިގެން ކުރިއަށްދާ ކަމަށެވެ. މިނިސްޓަރ ވިދާޅުވީ، މުހިންމީ ހަމައެކަނި ސެޝަން ބަދަލުކުރުން ނޫން ކަމަށާއި، މުހިންމީ ރަނގަޅު ތައުލީމެއް ދަރިވަރުންނަށް ދިނުން ކަމަށެވެ.

ރާއްޖޭގެ ހުރިހާ ސްކޫލުތަކެއް އެއްދަންފަޅިއަށް ބަދަލުކޮށްގެން ކިޔަވައިދޭން ނުފެށިވަނީ އެކަމަށް އެކަށީގެންވާ ބަޖެޓު ނެތުމުން ކަން މިނިސްޓަރ ވަނީ ވިދާޅުވެފައެވެ. ރާއްޖޭގައި 157 ސްކޫލެއް އެއްދަންފަޅިއަކަށް ބަދަލުކުރެވިފައިވާ އިރު، މާލޭގައި އެއްދަންފަޅުއަކަށް ހިންގަމުންދަނީ ދެސްކޫލެކެވެ. އެއީ އިއްޒުއްދީން ސްކޫލާއި، ވިލިމާލޭ މުޙިއްދީން ސްކޫލެވެ.