އިސްލާމީ ފަތުވާ ދޭ މަޖިލިސް އެކުލަވައިލުމުގެ މަސައްކަތް ކުރަމުން އަންނަކަމަށް އިސްލާމިކް މިނިސްޓްރީން މިއަދު ބުނެފިއެވެ.

ބައިނަލްއަގުވާމީ ޔޯގާ ދުވަސް ފާހަގަކުރުމަށް މިދިޔަ ޖޫން މަހުގެ 21 ވަނަ ދުވަހު ގަލޮޅު ދަނޑުގައި ބޭއްވި ޔޯގާ ހަރަކާތާއި ގުޅިގެން އިސްލާމިކް މިނިސްޓްރީން ފުލުހަށް ފޮނުވި ސިޓީގެ މައްސަލައާ ބެހޭގޮތުން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް އިސްލާމިކް މިނިސްޓަރ ވަނީ ހާޒިރުކޮށްފައެވެ.

މިއަދުގެ ކޮމިޓީ ބައްދަލުވުމުގައި މަހިބަދޫ ދާއިރާގެ މެންބަރު އަހުމަދު ތާރިގް ވަނީ މިނިސްޓަރާއި ސުވާލުކުރައްވާފައެވެ. ޠާރިޤުވަނީ ފުލުހަށް ފޮނުވި އެ މައްސަލައިގައި އިސްލާމިކް މިނިސްޓްރީން ފޮނުވި ސިޓީގައި ހިމެނޭ މައުލޫމާތުގައި ނުރަނގަޅު ވާހަކައެއް ހިމެނޭތޯ އާއި، ފަތުވާ މަޖިލީހުގެ ގިނަ މެންބަރުންގެ މުއްދަތު ހަމަވެފައިވާއިރު ފަތުވާ މަޖިލިސް އެކުލަވައިލުމުގެ މަސައްކަތް ނުކުރައްވަނީތޯވެސް ސުވާލުކުރައްވާފައެވެ.

Advertisement

ޠާރިގުގެ ސުވާލަށް ޖަވާބު ދެއްވަމުން މިނިސްޓަރ ވިދާޅުވީ، ޔޯގާގެ މައްސަލައަކީ މީގެ ކުރިންވެސް އިލްމުވެރިންގެ މެދުގައި ދެބަސްވުން އޮތް މައްސަލައެއް ކަމަށާއި އިލްމުވެރިންވެސް ޔޯގާއަކީ ހަރާމްކަމެއް ކަމުގައި ވިދާޅުވާއިރު އަނެއްބައި އިލްމުވެރިން ދެކެވަޑައިގަންނަވާ ގޮތުގައި ޔޯގާއަކީ ކަނޑައެޅިގެން ހަރާމްކަމެއް ކަމުގައި ނުބުނެވޭނެ ކަމަށެވެ.

ފަތުވާ މަޖިލީހާ ގުޅިގެން ޠާރިޤު ކުރެއްވި ސުވާލަށް ޖަވާބުދެއްވަމުން މިނިސްޓަރު ވިދާޅުވީ ފަތުވާ މަޖިލިސް އެކުލަވައިލުމުގެ މަސައްކަތް ކުރަމުންދާ ކަމަށާއި ފަތުވާ މަޖިލީހުގެ ބަދަލުގައި ފިޤުހު އެކަޑެމީ އެކުލަވައިލި ނަމަވެސް، އެ އެކަޑަމީ އެކުލަވައިލެވެންދެންވެސް ފަތުވާ މަޖިލީހެއް އޮންނަންޖެހޭތީ ފަތުވާ މަޖިލިސް އެކުލަވައިލައްވަން މަސައްކަތްކުރައްވަމުންދާ ކަމުގައި އޭނާ ވިދާޅުވިއެވެ.