ޕްރޮސެކިއުޓަރ ޖެނެރަލް ހުސެއިން ޝަމީމު ބަނގުރާ އިސްތިހާކުރެއްވުމުންވެސް ފުލުހުންގެ މުއައްސަސާ ހަނު އޮންނަކަމަށް ފާހަގަކުރައްވާ ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު ފާޑުވިދާޅުވެއްޖެއެވެ. 

ހުސެއިން ޝަމީމް ބަނގުރާ ފުޅިއެއް ހިއްޕަވައިގެން ހުރި ފޮޓޯއެއް އޭނާގެ އިންސްޓަގްރާމު ސްޓޯރީގައި ވަނީ އާންމު ކުރައްވާފައެވެ. ޝަމީމްގެ އިންސްޓަގްރާމް ސްޓޯރީގައި ހިއްސާކޮށްފައިވަނީ މަރަނީ ބްރޭންޑުގެ ބަނގުރާ ފުޅިއެއް އެއް އަތުން ހިއްޕަވައިވެގެން އަނެއް އަތުން ނަންގަވާފައިވާ ފޮޓޯއެކެވެ. އަދި އެ ފޮޓޯގައި "ވެލްކަމް ޓު ޖޯޖިއާ" މިހެން ޖަހާފައިވެއެވެ.

އެހެން ނަމަވެސް މިހާތަނަށް އެކަމާއި ގުޅިގެން ފުލުހުން އެއްވެސް ފިޔަވަޅެއް އަޅާފައެއް ނުވެއެވެ. 

އެކަންކަން ފާހަގަކުރައްވާ މޮސްޓާ ވިދާޅުވީ، އެއީ އާދައިގެ ރައްޔިތަކު ކުރި ކަމެއް ނަމަ މިހާރު ގޮޅިއަށް ލާނެކަމަށެވެ. އެހެން ނަމަވެސް ޕީޖީ ޝަމީމު ކުރެއްވުމުން ފުލުހުންނަށް އެއްވެސް އެއްޗެއް ވިދާޅުވާން ކެރިވަޑައިނުގަންނަވީނަމަށް މޮސްޓާ ވަނީ ވިދާޅުވެފައެވެ. 

ބަގުރާ އިސްތިހާރުކުރެއްވި މައްސަލައިގައި ޕީޖީ ޝަމީމަށް ބޮޑެތި ފާޑުކިޔުންތަކެއް ވަނީ އަމާޒުވެފައެވެ. އަދި އޭނާގެ މައްސަލަ ބަލާ ދައުވާކޮށްދިނުމަށް އިދިކޮޅުގެ ބައެއް މަޖިލިސް މެމްބަރުންނާއި ގަނޫނީ ވަކީލުންވެސް ގެންދަވަނީ ގޮވާލަމުންނެވެ. 

އެހެން އެކަން އޮތް އިރު ބަނގުރާ އިސްތިހާރުކުރުމަކީވެސް ގާނޫނުލް އުގޫބާތުގައި ޖިނާއީ ކުށެއްގެ ގޮތުގައި ބަޔާންކޮށްފައިވާކަމަކެވެ. އަދި ދިވެހި ރައްޔިތުންކަން އޮންނަ މީހުން ރާއްޖެއިން ބޭރުގައި ކުރާ ކުށްތަކަށްވެސް އަދަބު ދެވޭނެކަން ގާނޫނުލް އުފޫބާތުގައި ވަނީ ބަޔާންކޮށްފައެވެ. 

އޭގެ އިތުރުން ބަނގުރާ އިސްތިހާރުކުރުމަކީ ޕީޖީގެ މަގާމުގައި ހުންނަވާ ބޭފުޅެއްގެ އަޚުލާގީ މިންގަނޑާއިވެސް ޚިލާފުކަމެކެވެ.