ކ. މާފުށި ޖަލުގައި ޑިއުޓީގައި ހުރި ޕްރިޒަން އޮފިސަރަކު ކުއްލި ގޮތަކަށް ނިޔާވެއްޖެއެވެ.
ނިޔާވެފައި ވަނީ މާފުށީ ފުންގިރި، އާދަމް ނައުޝާދު، 32އ. އެވެ.
ކޮމިޝަނާ އޮފް ޕްރިޒަންސް އަހުމަދު މުހައްމަދުފުޅު ރޭ ފޭސްބުކްގައި ކުރެއްވި ޕޯސްޓެއްގައި ވިދާޅުވީ މާފުށީ ޖަލުގައި ރޭ ޑިޔުޓީ ކުރަމުން ދިޔަ ޕްރިޒަން ޕްރައިވެޓް އާދަމް ނިއުޝާދަށް ކުއްލިއަކަށް ދިމާވި ސިއްހީ މައްސަލައަކާ ގުޅިގެން މާފުށީ ސިއްހީ މަރުކަޒަށް ގެންދެވިފައިވާ ކަމަށެވެ. އަދި އޭނާއަށް ފަރުވާ ދެމުންދަނިކޮށް ރޭ ނިޔާވެފައިވާ ކަމަށެވެ.
އަދި އާދަމް ނިއުޝާދު ނިޔާވުމަކީ އޭނާ އާއި މުޅި މުއައްސަސާގެ ހުރިހާ އޮފިސަރުންނާއި މުވައްޒަފުންނަށް ނުހަނު ފުން ހިތާމައެއް ކުރިމަތި ކުރުވި ހަބަރެއް ކަމަށްވެސް އަހުމަދު މުހައްމަދުފުޅު ވިދާޅުވިއެވެ.
ކަރެކްޝަނަލް ސާވިސްއިން ރޭ ކުރި ޓުވީޓެއްގައި ބުނީ ނިއުޝާދު އެ ސާވިސްއާ ގުޅުނީ 2014 ވަނަ އަހަރުގެ ފެބްރުއަރީ މަހުގެ ތިން ވަނަ ދުވަހު ކަމަށެވެ.
ޕްރިޒަން ޕްރައިވެޓްގެ މަގާމުގައި ހުރި ނައުޝާދު ވަނީ އޭގެ ފަހުން މާފުށީ ޖަލުގެ އެކި ޔުނިޓްތަކުގައި އިހުލާސްތެރިކަމާއެކު މަސައްކަތް ކޮށްފައި ކަމަށް ކަރެކްޝަނަލް ސާވިސް އިން ބުންޏެވެ. އަދި އޭނާގެ ވަކިވެ ދިޔުމަކީ އެ ސާވިސް އަށް ލިބުނު ފުން ހިތާމައެއް ކަމަށް ވެސް ބުނެފައިވެއެވެ.
ނައުޝާދުގެ ކަށުނަމާދު އޮންނާނީ މިއަދުގެ ހުކުރު ނަމާދަށް ފަހު މާފުށީ، ކަތީބު ހުސައިން މަނިކު މިސްކިތުގަ އެވެ.
Advertisement
This content is created and paid for by advertisers and does not involve Voice Journalists
