ހުޅުމާލެ ފޭސް ދޭއްގައި އިމާރާތްކުރި ފްލެޓުތަކުގެ ތެރެއިން މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން އިމާރާތްކުރި "އެއިރޯ ރެޒިޑެންސީ" ގެ ފްލެޓުތައް ލިބުނު މުވައްޒަފުންނާ އެތަންތަން މިއަދު ހަވާލުކޮށްފި އެވެ.

މިތަންތައް އެއަޕޯޓްސް ކޮމްޕެނީގެ މުވައްޒަފުންނާ ހަވާލުކުރީ މިއަދު ހެނދުނު އެކަމަށްޓަކައި ބޭއްވި ރަސްމިއްޔާތެއްގައެވެ. އެ ރަސްމިއްޔާތުގައި ޕްލޭނިން މިނިސްޓަރު މުހައްމަދު އަސްލަމާއި އެ ކުންފުނީގެ އެމްޑީ މަހުޖޫބު ޝުޖާއު ބައިވެރިވެވަޑައިގަތެވެ.

އެ ރަސްމިއްޔާތުގައި އެ ކުންފުނީގެ މެނޭޖިން ޑިރެކްޓަރު އަދި ސީއީއޯ، މަހްޖޫބް ޝުޖާއު ވިދާޅުވީ ގާތްގަނޑަކަށް 56 އަހަރުވެފައިވާ އެ ކުންފުންޏަކީ ސަރުކާރު ކުންފުނިތަކުގެ ތެރެއިން އެންމެ ރަނގަޅަށް މަސައްކަތްކުރާ އެއް ކުންފުންޏަށްވާނެ ކަމަށެވެ.

އެމްއޭސީއެލުން އިމާރާތްކޮށްފައި ވަނީ 14 ބުރީގެ ދެ ޓަވަރުގައި 384 އެޕާޓްމަންޓެވެ. އެއީ ދެ ކޮޓަރީގެ 240 އެޕާޓްމަންޓާއި އެއް ކޮޓަރީގެ 72 އެޕާޓްމަންޓެވެ.

އެއަޕޯޓްސް ކޮމްޕެނީގެ މުވައްޒަފުންގެ ފްލެޓްތައް މިއަދު ހަވާލުކޮށްފައިވާއިރު، ސްޓެލްކޯގެ ފްލެޓްތައްވެސް ނިންމައި މީގެ ދުވަސްކޮޅެއް ކުރިން ވަނީ ހަވާލުކޮށްފައެވެ.