އެމްއެމްޕީއާރުސީގެ ބޮޑު ހިޔާނާތުގެ މުގުލުގައި ތިބި މީހުންނާއެކު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން އެއްބަސްވުންތައް ހަދާފައިވަނީ ދައުލަތަށް ލިބެންޖެހޭ ފައިސާ ލިބޭގޮތަކަށް ނޫން ކަމަށް ކުރީގެ ޕްރޮސިކިއުޓަ ޖެނެރަލް އަހްމަދު މުއިއްޒު ތުހުމަތުކުރައްވައިފިއެވެ. 

މުއިއްޒު މިފަދަ ތުހުމަތެއް ކުރައްވާފައި ވަނީ، އެމްއެމްޕީއާރުސީގެ ބޮޑު ހިޔާނާތުގެ ތެރެއިން ޓޫރިޒަމަށް ދޫކޮށްފައިވާ ރަށްތަކާއި ފަޅުތަކުން ނުލިބި ހުރި ފައިސާ ހޯދަން ސަރުކާރުން މަސައްކަތް ކުރަމުން އަންނަ ކަމަށް، ގައުމީ ފަތުރުވެރިކަމުގެ ދުވަހުގެ މުނާސަބަތުގައި ރޭ ބޭއްވި ޖަލްސާގައި ރައީސް ޞާލިހު ވިދާޅުވުމާއި ގުޅިގެންނެވެ. 

އެވާހަކައަށް ރައްދު ދެއްވައި މުއިއްޒު ކުރެއްވި ޓްވީޓެއްގައި ވަނީ، އެމްއެމްޕީއާރުސީގެ ޚިޔާނާތުގެ ތެރެއިން ޓޫރިޒަމަށް ދޫކޮށްފައިވާ ރަށްތަކާއި ފަޅުތަކުން ނުލިބި ހުރި ފައިސާ ހޯދުމަށް ކޯޓަށް އެއްވެސް މައްސަލަ އެއް މިހާތަނަށް ހުށަހަޅާފައި ވޭތޯ ސުވާލު ކުރައްވާފައެވެ. އަދި އެ ޚިޔާނާތުގެ މުގުލުގައި ތިބި މީހުންނާއެކު މި ސަރުކާރުން އެއްބަސްވުންތައް ހަދާފައިވަނީ ދައުލަތަށް ލިބެންޖެހޭ ފައިސާ ލިބޭގޮތަކަށް ނޫން ކަމަށްވެސް މުއިއްޒު ވިދާޅުވި އެވެ. 

Advertisement

"އެމްއެމްޕީއާރުސީގެ މުގުލުގައި ތިބި މީހުންނާއެކު އެއްބަސްވުންތައް ހަދާފައިވަނީ ދައުލަތަށް ލިބެންޖެހޭ ފައިސާ ލިބޭގޮތަކަށް ނޫން. ދައުލަތުގެ މަސްލަހަތު ރައްކާތެރި ކުރެވިފައެއް ނުވޭ." މުޢިއްޒު ވިދާޅުވިއެވެ. 

ރާއްޖޭގެ އެންމެ ބޮޑު ހިޔާނާތް ހިންގި މީހުން ދެނެގަނެ، ދައުލަތަށް ގެއްލުނު ފައިސާ އަނބުރާ ހޯދުމަކީ މި ސަރުކާރުގެ ވައުދެކެވެ. އެކަމަށް ހާއްސަކޮށް ރިޔާސީ ކޮމިޝަނެއް އުފައްދާފައިވާ އިރު، ހިޔާނާތުގެ މައްސަލަތައް ބަަލަމުން އަންނަނީ ތަހުގީގީ އިދާރާތައް ގުޅިގެންނެވެ. އެހެން ނަމަވެސް ސަރުކާރުގެ ދައުރު ނިމެން ކައިރިވެފައި ވާއިރު ހިޔާނާތުގެ މައްސަލައިގައި އެކަށީގެންވާ ނަތީޖާއެއް ނުނެރެވެ އެވެ.

އެމްއެމްޕީއާރުސީ މެދުވެރިކޮށް ޓޫރިޒަމްގެ ބޭނުމަށް ރަށްތަކާއި ފަޅުތައް ދޫކޮށްގެން ހިންގި 3.3 ބިލިއަން ރުފިޔާގެ ޚިޔާނާތުގައި، މުގުލުގައި ހުންނެވި ކުރީގެ ނާއިބު ރައީސް އަހުމަދު އަދީބާ އެކު ދައުލަތުން ހެދީ ޕްލީ ބާގެއިން އެއްބަސްވުމެކެވެ. އެއީ، ކުށަށް އިއުތިރާފްވުމާ އެކު ތަހުގީގަށް އެއްބާރުލުން ދިނުމުން، ބަދަލުގައި 20 އަހަރަށް ވުރެ ދިގު ޖަލު ހުކުމެއް ނާންނަ ގޮތަށް އެއްބަސްވުމެވެ.

މި އިއުތިރާފްގެ އެއްބަސްވުމާ އެކު ދައުލަތަށް ގެއްލުނު ފައިސާ އަދީބުގެ އަތުން ނުލިބޭނެ އެވެ.