ޑްރިފްޓު ކުރުމަށް ބޭނުންވާ ކުދިންނަށް ހަވީރުގެ ވަގުތުތަކުގައި އެކަން ކުރުމަށް ހުއްދަ ދީފައިވާކަމަށާއި، މައްސަލަ ޖެހުނީ ދަންވަރު އެކަން ކުރުމަށް ހުއްދަ ނުދިނުމުންކަމަށް ޔޫތު މިނިސްޓަރު އަހުމަދު މަހުލޫފު ވިދާޅުވެއްޖެއެވެ. 

މަހުލޫފު މިފަދައިން މިވާދުޅީ މިއަދު މަޖިލީހަށް ހާޒިރުކޮށް މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު ކުރި ސުވާލަކަށް ޖަވާބުދެއްވަމުންނެވެ. 

މެމްބަރު ނަޝީދު ސުވާލުކުރައްވަމުން ވިދާޅުވީ ހުޅުމާލޭގައި ތާރސްޑޭ ނައިޓުގެ ނަމުގައި ކޮންމެ ހަފްތާއެއްގެ ބުރާސްފަތި ދުވަހުގެ ރޭ ޑްރިފްޓުކުރަމުންދަނިކޮށް ބަޔަކު އަޑީގައި އޮވެގެން އެކަން ހުއްޓުވާފައިވާކަމަށެވެ. އަދި އެ ކުދިންނަަށް އެފުރުސަތު ނުދިނުމުގެ ސަބަބުން މަޝްރަހު ގޯސްވެފައިވާކަމަށްވެސް މެމްބަރު ފާހަގަކުރެއްވިއެވެ. 

Advertisement

އެއާއެކު އޭނާ ވަނީ އެ މައްސަލަ ހައްލުކުރުމަށް މިނިސްޓްރީއިން ކުރައްވަމުން ގެންދަވާ މަސައްކަތަކީ ކޮބައިތޯ އައްސަވާފައެވެ. 

ނަޝީދުގެ ސުވާލަށް ޖަވާބުދެއްވަމުން ޔޫތު މިނިސްޓަރު މަހުލޫފު ވިދާޅުވީ ޑްރިފްޓް ކުރުމަކީ މަގުމަތީގައި ހިންގާކަމަކަށް ވާއިރު، އެކަން ކުރުމުގެ ހުއްދަ ޔޫތު މިނިސްޓްރީއަށް ދިނުމުގެ ބާރު ނޯންނަކަމަށެވެ. 

އެހެން ނަމަވެސް އެކަން ކުރުމަށް ހުއްދަ ދޫކޮށްފައިވަނީ އެޗްޑީސީއިންކަމަށް އޭނާ ފާހަގަކުރެއްވިއެވެ. އެއާއެކު މިނިސްޓަރު ވިދާޅުވީ ދަންވަރު އެކަން ކުރުމަކީ އާންމުންނަށް ވަރަށް ބޮޑެތި އުނދަގޫތައް ވަމުންދާ ކަމެއްކަމަށެވެ. އެކަމުގެ ޝަކުވާތައްވެސް ލިބިފައިވާކަން މިނިސްޓަރު ފާހަގަކުރެއްވިއެވެ. 

އެއާއެކު މިނިސްޓަރު ވިދާޅުވީ ޑްރިފްޓުކުރުމަށް ހަވީރު ވަގުތުތަކުގައި ހުއްދަ ދީފައިވާކަމަށެވެ. އެހެން ނަމަވެސް އެކަން ކުރާ ޒުވާނުން ބޭނުންވަނީ ބޭރު ދުނިޔޭގައި އެކަން ކުރާ ގޮތަށް ދަންވަރު ގަޑީ އެކަން ކުރަން ކަމަށާއި، އަދި މައްސަލަ ޖެހުނީ ދަންވަރު އެކަން ކުރުމަށް ހުއްދަ ނުދިނުމުންކަމަށް މިނިސްޓަރު މަހުލޫފު ވަނީ ވިދާޅުވެފައެވެ. 

ތާސްޑޭ ނައިޓުގެ ނަމުގައި ހުޅުމާލޭގައި ހިންގަމުންއައި ޑްރިފްޓު ހަރަކާތް އެޗްޑީސީއިން ހުއްޓުވުމާއި ގުޅިގެން އެ އެސޯސިއޭޝަނުން ވަނީ ބޮޑެތި ކަންބޮޑުވުންތައް ފާޅުކޮށްފައެވެ. އަދި އެ މައްސަލައިގައި ހައްލު ހޯދުމަށް ޔޫތު މިނިސްޓަރާއި ބައްދަލުކުރުމަށް އެތައް ފަަހަރެއްގެ މަތިން އެދިފައި ވީނަމަވެސް އެ ފުރުސަތު ލިބިފައި ނުވާކަމަށް ޑްރިފްޓު އެސޯސިއޭޝަނުން ވަނީ ބުނެފައެވެ. 

އެހެން ނަމަވެސް މިއަދުގެ މަޖިލީހުގެ ޖަލްސާގައި ޔޫތު މިނިސްޓަރު ވިދާޅުވީ ޑްރިފްޓް އެސޯސިއޭޝަންގެ ކަންބޮޑުވުންތަކާއެކު ރައީސުލް ޖުމްހޫރިއްޔާއާއި ބައްދަލުކޮށްފައިވާކަމަށެވެ. އަދި ގުޅިފަޅު ތަރައްގީކުރާއިރު އެތަނުގައި ރޭސް ޖެހޭނެ ޓްރެކަކާއި ޑްރިފްޓް ކުރެވޭނެ އިންތިޒާމުތައް ހަމަޖައްސާދެއްވާނެކަމަށް ރައީސް ވިދާޅުވެފައިވާކަމަށް ޔޫތު މިނިސްޓަރު ވިދާޅުވިއެވެ.