ހުޅުމާލޭ ދެވަނަ ފިޔަވަހިން ގެއްލުނު ޒުވާނާ ހޯދުމުގައި ހުރި ކަންބޮޑުވުންތައް ފާޅުކޮށް މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ހުށައެޅުއްވި ކުއްލި މައްސަލަ ބަލައިނުގަތުމަށް މަޖިލީހުގެ ސުޕަރ މެޖޯރިޓީ އޮންނަ އެމްޑީޕީގެ ޕާލަމެންޓްރީ ގްރޫޕުން ވިޕްލައިން ނެރެފައިވާކަމަށް އެމްޑީޕީގެ ކުރީގެ ޗެއާޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ހާމަކުރައްވައިފި

ހަސަން ލަތީފު މިފަދައިން ވިދާޅުވެފައިވަނީ އާދަމް ޝަރީފު ހުށައެޅުއްވި މައްސަލައަށް ވާހަކަދައްކަވަމުންނެވެ. އެ މައްސަލައަށް މަޖިލީހުގައި ތިއްބެވި 25 މެމްބަރުން ވޯޓު ދެއްވާފައިވާއިރު 11 މެމްބަރަކު ވަނީ އެ މައްސަލަ ބަލައިގަންނަން ނުފެންނަކަމަށް ވިދާޅުވެފައެވެ.

ހަސަން ލަތީފު ވިދާޅުވީ ގޮތް ނޭނގޭ މަރަކާއި ގުޅިގެން މަޖިލީހަށް ކުއްލި މައްސަލައެއް ހުށައެޅީމާ އެ މައްސަލަ ބަލައިނުގަތުމަށް އެމްޑީޕީގެ ޕީޖީ ގުރޫޕުގެ ލީޑަރޝިޕުން ވިޕްލައިން ނެރުމަކީ ކަންބޮޑުވާ ކަމެއްކަމަށެވެ. އަދި އެކަމަށްޓަކައި ލަދުގަންނަކަމަށް އޭނާ ވިދާޅުވިއެވެ.

ލަތީފު މިވާދުޅީ މަޖިލީހަށް ހުށައެޅި އެ މައްސަލައަކީ ދިވެހި ޒުވާނެއް ގެއްލިގެން 14 ދުވަސް ވިއިރު އޭނާ ނުފެނި، އޭނާ ހޯދަން ކުރި މަސައްކަތުގެ މައުލޫމާތެއް މަޖިލީހަށް ނޭގި އޮތް އޮތުމުގެ ވާހަކަކަމަށެވެ.

އަދި އެ ފަދަ މައްސަލަތުގައި ފުލުހުން ކުރާ މަސައްކަތާއި ގުޅޭގޮތުން ހުރި ކަންބޮޑުވުންތަކާއި ގުޅިގެން ބަހުސްކުރުމަށް މެމްބަރަކު އެފަދަ މައްސަލައެއް ހުށައެޅީމާ އެމްޑީޕީއިން އެ މައްސަލަ ބޭރުކުރަން އުޅުމަކީ ކަންބޮޑުވާކަމެއްކަމަށް ހަސަން ލަތީފު ވަނީ ވިދާޅުވެފައެވެ.

ހަސަން ލަތީފުގެ ވާހަކައިގައި ވަނީ ހުޅުމާލެއިން ގެއްލުނު ޒުވާނާ ހޯދުމުގެ މަސައްކަތް އެކަށީގެންވާ ވަރަށް ކޮށްފައިވާކަމަށް ފުލުހުން ބުނެފައިވީ ނަމަވެސް އެކަން ގަބޫލުނުކުރައްވާކަމަށް ވިދާޅުވެފައެވެ. އެހެން ކަމުން އެ މައްސަލައާއި ގުޅިގެން މަޖިލީހަށް ކުރެވެން ހުރި މަސައްކަތަކީ ކޮބައިތޯ ބެލުން މުހިންމުކަމަށާއި، އިހުމާލު ވާ ފަރާތްތަކާއި މެދު ފިޔަވަޅު އަޅަން ޖެހޭކަމަށް ހަސަން ލަތީފު ވިދާޅުވިއެވެ.

ހަސަން ލަތީފުގެ އިތުރުންވެސް މަޖިލީހުގެ އެމްޑީޕީއަށް ނިސްބަތްވާ ބައެއް މެމްބަރުން ވަނީ އެކަމާއި ގުޅޭގޮތުން ކަންބޮޑުވުން ފާޅުކުރައްވާފައެވެ.