2021 ފެބުރައީ މަހުން ފެށިގެން ދިވެހިރާއްޖޭގައި ދެމުންދާ ކޯވިޑް-19 ވެކްސިން ދިނުމުގައި ދިވެހިރާއްޖޭގެ ގާނޫނާއި ގަވައިދުތަކާއި ބައިނަލްއަގުވާމީ އުސޫލުތަކާއި މިންގަނޑުތަކާއި ޚިފާލު އަމަލުތަކެއް ދައުލަތުން ހިންގާފައިވާކަމަށް ތުހުމަތުކޮށް ކޯވިޑް-19 އާއި ގުޅޭ ނިންމުންތަކުގެ މައްސަލަ ބަލައިދިނުމަށް ޖުޑިޝަލް ރިވިއުގެ ދައުވާއެއް ސިވިލްކޯޓަށް ހުށައަޅައިފިއެވެ. 

އެ މައްސަލަ ކޯޓަށް ހުށައަޅާފައިވަނީ ލޯ އޮފީސް އޮފް އަފްރާ އުސްމާނުގެ ފަރާތުން އޮކްޓޫބަރުމަހުގެ ދެ ވަނަ ދުވަހުގައެވެ. އެ މައްސަލަ ވަނީ ސިވިލް ކޯޓުގައި ރަޖިސްޓްރީކޮށްފައެވެ. 

އެ ލޯފާމުން ބުނިގޮތުގައި ކޯވިޑް-19 ގެ ތަހުލީލީ ވެކްސިންތަކެއް ރޯލްއައުޓު ކުރެވުނު ފަހުން އާދަޔާ ޚިލާފަށް ކުއްލި މަރުތައް އިތުރުވެފައިވާތީ އާއި ދުނިޔޭގެ އެކި ކަންކޮޅުތަކުގައި އެފަދަ މަރުތައް އިތުރުވާކަން ފާހަގަކުރެވިފައިވާތީ ބައިނަލްއަގުވާމީ ޑޮކަޓަރުންނާއި ސައިންޓިސްޓުންގެ ޖަމުއިއްޔާތަކުން ކޯވިޑް-19 ތަހުލީލީ ވެކްސިންތައް ވަގުތުން ހުއްޓުމަށް ގޮވާލާތީ ސިވިލްކޯޓަށް ހުށައެޅިފައިވާ އެ މައްސަލައަށް ވަކި ގޮތެއް ކަނޑައަޅަންދެން ކޯވިޑް-19 ވެކްސިންތައް ދިނުން ވަގުތީ ގޮތުން ހުއްޓާލުމަށް ވަގުތީ އަމުރެއް ނެރެދިނުމަށްވެސް އެދިފައިވާނެ ކަމަށެވެ. 

މި ދަނޑިވަޅުގައި ރައްޔިތުންގެ ފުރާނައާއި ސިއްހަތު ސަލާމަތްކުރުމަށްޓަކައި ކޯވިޑް-19 ގެ ވެކްސިންތައް ދިނުން ހުއްޓާލެއްވުމަށާއި، ހިނގައިދިޔަ ކުއްލި މަރުތަކުގެ މިނިވަން ފުރިހަމަ ތަހުގީގެއް ކުރުމަށް އެ ލޯ ފާމުން ވަނީ ދައުލަތަށް އިލްތިމާސްކޮށްފައެވެ. 

ކޯވިޑް ނަވާރަ ފެތުރުން ކޮންޓްރޯލުކުރުމަށް ކޯވިޑް ވެކްސިން ޖެހުމަށް ސަރުކާރުން ވަނީ އޭރު މަޖުބޫރުކޮށްފައެވެ. އެގޮތުން ކޯވިޑްގެ ދެ ޑޯޒު ފުރިހަމަ ނުކޮށް ރަށްރަށަށް ނުދެވޭ އުސޫލުތައް ހަދާފައިވެއެވެ. އަދި އާބާދީގެ ބޮޑު ބަޔަކަށް އެ ވެކްސިން ސަރުކާރުން ވަނީ ފޯރުކޮށްދީފައެވެ.