ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މި ސަރުކާރުން ހދ.ނޭކުރެންދޫގައި ޤާއިމުކުރުމަށް ވައުދުވީ ޖަލުގެ މަސައްކަތާ ގުޅިގެން ހޯމް މިނިސްޓަރ ޢިމްރާން ރައްޔިތުންގެ މަޖިލީހަށް ފޮނުއްވި ޖަވާބުން ސިފަވަނީ އަނބޮއްފުޅާއި ދަބޮއްފުޅުގެ ވާހަކަ ކަމަށް ވިދާޅުވެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ފާޑުވިދާޅުވެއްޖެއެވެ. 

ނޭކުރެންދޫ ޖަލުގެ މަސައްކަތް މި ދައުރު ނިމުނުގެ ކުރިން ނިންމާލެވޭނެތޯ އަހައި އިމްރާނާ، މަކުނުދޫ ދާއިރާގެ މެންބަރު މުޙައްމަދު ރާއީ ލިޔުމުން ކުރެއްވި ސުވާލަށް ލިޔުމުން ދެއްވި ޖަވާބުގައި އިމްރާން ވިދާޅުވެފައިވަނީ، އެ ޖަލު އެޅުމަށް 2020 ވަނަ އަހަރުގެ ބަޖެޓުން ޖަލުގެ މަސައްކަތަށް ލިބުނު ފައިސާ ކޮވިޑާ ގުޅިގެން މަދުކުރުމުން ލިބުމުން ލިބުނީ އެންމެ ބައިލައްކަ ރުފިޔާ ކަމަށެވެ.

އެހެން ނަމަވެސް އެ ފައިސާއިން އެ ސަރަހައްދުގައި ހުރި ރުއްގަހަށް ބަދަލު ދެވޭތޯ ބެއްލެވި ނަމަވެސް އެ ފައިސާއިން އެކަން ވެސް ނުކުރެވޭނެ ކަމަށާ، ރުއްގަސް ބަދަލު ކުރަންވެސް ތިންލައްކަ ރުފިޔާއަށް ވުރެެ ގިނަ ފައިސާ ޚަރަދުވެފައިވާ ކަމަށެވެ. އަދި ޖަލުގެ ކޮންސެޕްޓް ޑިޒައިން މަސައްކަތް މި އަހަރުގެ މޭ މަހުގައި ނިމިފައިވާކަމަށާ، އެހެންނަމަވެސް، އަންނަ އަހަރު ނިމުމުގެ ކުރިން ޖަލުގެ މަސައްކަތް ނިންމައިލެވޭނެ ކަމުގައި ނުބެލެވޭ ކަމަށެވެ. ވުމާއެކު ކުރިއަށް އޮތް ދައުރުގައިވެސް އެ މަސައްކަތް ކުރިއަށްދާނެ ކަމުގައި ބެލެވޭ ކަމަށްވެސް އިމްރާން ވިދާޅުވިއެވެ.

Advertisement

"މި މަޝްރޫއު [ނޭކުރެންދޫ ޖަލުގެ މަޝްރޫއު] މި ދައުރުގެ ތެރޭގައި ކުރިއަށް ގެންގޮސް ނިންމުމަށް އުއްމީދުކޮށް އެ ޓާގެޓް ހާސިލުކުރުމަށް ގިނަ މަސައްކަތްތައް ކުރެވުނު ނަމަވެސް މި ފައިސާއިން 2023 ވަަނަ އަހަރުގެ ނިޔަލަށް ނިންމައިލެވޭނެ ކަމަށް އެސްޓިމޭޓްކުރެވެނީ ޖަލުގެ ވަށާ ފާރާއި އަދި ޖަލުގެ ކޮންސެޕްޓާއި ތަފްސީލުކޮށް ކުރެހުމުގެ މަސައްކަތްތައް،" އިމްރާންގެ ޖަވާބުގައި ވިދާޅުވިއެވެ.

އިމްރާން ލިޔުމުން ދެއްވި ޖަވާބު މަޖިލީހުގެ މިއަދުގެ ޖަލްސާގައި އަމީންއާންމު އިއްވަވައި ނިންމެވުމުން އެ ޖަވާބަށް ފާޑުވިދާޅުވެ ރައީސް ނަޝީދު ވިދާޅުވީ، ލިޔުމުން ޖަވާބު ހޯއްދެވުމަށް މެންބަރު ރާއީ ހޯމް މިނިސްޓަރަށް ފޮނުއްވީ ވަރަަށް ސާފު ސާދާ ކުރު ސުވާލެއް ކަމަށެވެ. ނަމަވެސް އެ ސުވާލުގެ ޖަވާބު ވީ އަނބޮއްފުޅާއި ދަނބޮއްފުޅުގެ ވާހަކައަށް ކަމަށެވެ.

''އަޅުގަނޑު ދެކޭ ގޮތުގައި މި ތަނުގައި މި ހުރިހާ ތަފާސްހިސާބު ކިޔުއްވަން ޖައްސުވައި އަދި އެ ކިޔާ ނިމުނުއިރުގައި މީ އަނބޮއްފުޅާއި ދަނބޮއްފުޅުގެ ވާހަކައަށް ވެ ދިއުން އެއީ އަޅުގަނޑު ހިތުން އިއްޒަތްތެރި މެންބަރުން ވަރަށް ގިނައިން ވާނީ އަނބޮއްފުޅާއި ދަނބޮއްފުޅުގެ ވާހަކަ ކިޔުއްވާފަ. އެ ވާހަކައިގަ ވީ ގޮތް އެނގިވަޑައިގަންނަވާނެ. މި އޮތީ ހަމަ ސީދާ އެ ގޮތްވެފަ.'' ނަޝީދު ވިދާޅުވިއެވެ.