ތިލަމާލެ ބްރިޖު އެޅުމުގެ މަސައްކަތް ކުރަމުން ދަނިކޮށް ވިލިމާލޭގެ ފަރަށް އެރި އިންޑިއާގެ އެފްކޮންސް ކުންފުނީގެ ޕްލެޓްފޯމުން އެ ފަރަށް ލިބިފައިވާ ގެއްލުން ބަލަން އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) އިން ހެދި ސާވޭއާ މެދު އެ ކުންފުނިން ހިތްހަމަނުޖެހިގެން، އެފްކޮންސް އިން އަމިއްލައަށް ސާވޭ ކުރަން އެދިފައިވާ ކަމަށް އީޕީއޭ އިން މިއަދު ބުނެފި އެވެ.

އޮގަސްޓު މަހުގެ 16 ވަނަ ދުވަހު އެންކަރ ކުރުމުގެ ތެރޭގައި ކަހާލައިގެން ފަރަށް އެރި ޕްލެޓްފޯމް ފުން ކުރެވުނީ އޭގެ 12 ދުވަސް ފަހުންނެވެ. ފްލެޓްފޯމް ފުންކުރުމުގައި މިހާ ގިނަ ދުވަސްތަކެއް ނެގި ސަބަބެއް ކަމަށް ބުރިޖުގެ މަސައްކަތްކުރާ އިންޑިއާގެ އެފްކޮންސް ކުންފުނިން ބުނެފައިވަނީ މޫސުން ގޯސްވުމެވެ.

ތިލަމާލެ ބްރިޖު އެޅުމަށްޓަކައި ހެދި ޕްލެޓްފޯމު ހައްޔަރުން ނެއްޓި ފަރަށް އެރުމާއި ގުޅިގެން ވިލިމާލޭ ފަރަށް ލިބުނު ގެއްލުންތަށް ދިރާސާކުރުމަށް އީޕީއޭއިން ކުރި ސާރވޭ އެ އިދާރާއިން ވަނީ އިންޑިއާގެ ކުންފުންޏާއި ހިއްސާކޮށްފައެވެ. 

Advertisement

އެކަމާއި ގުޅިގެން އީޕީއޭއިން ބުނީ އެ އިދާރާ އިން ހެދި ސާވޭއާ މެދު އެފްކޮންސް އިން ހިތްހަމަނުޖެހޭތީ އަމިއްލައަށް ސާވޭ ކުރަން މީގެ ދެހަފްތާ ކުރިން ހުށަހަޅާފައިވާ ކަމަށެވެ.

އެފްކޮންސް އިން ބުނީ ޑެމޭޖް އޭރިއާ ބަލާފައި ހުރި ގޮތް ބޮޑުކަމުން އެ މީހުން ބޭނުންވަނީ އެ ތަނަށް އެރި، އެ މީހުން އަމިއްލައަށް ސާވޭ ކުރަން ކަމަށެވެ. އަދި އީޕީއޭއިން އެތަނުގެ ސާރވޭ ކުރިއިރު އެފްކޮންސް އަށް ފުރުސަތުދިން ނަމަވެސް އެމީހުން ބައިވެރިނުވާ ކަމަށް އީޕީއޭއިން ބުނެއެވެ.

ޕްލެޓްފޯމް އަރާފައި އޮތް ސަރަހައްދަށް ޑައިވްކޮށްގެން ނަގާފައި ހުރި ފޮޓޯތައް އީޕީއޭއިން އާންމުކޮށްފައިވާއިރު، ފޮޓޯތަކުން ފަރުގެ ގިނަ މުރަކަތައް ހަލާކުވެ، އާނުގަނޑުގައި ހެދިފައިވާ ހަތަރު ވަޅުގަނޑެއް ފެނެއެވެ.