މި ސަރުކާރުން މާލޭގެ ރައްޔިތުންނަށް ޚާއްސަކޮށް ފަށާފައިވާ ބިންވެރިޔާ ޕްރޮގްރާމަށް ކުރިމަތިލާ ފަރާތްތަކުގެ އަތުން 750،000 ރުފިޔާ ނަގަމުންދާކަމަށް ރައްޔިތުންގެ މަޖިލީހުގެ މެންބަރުން ތުހުމަތުކުރައްވައިފިއެވެ.

މިއަދުގެ ރައްޔިތުންގެ މަޖިލީހުގެ ޖަލްސާގައި ފަނޑިޔާރުންނަށް ދޭ ލިވިން އެލަވަންސް ބޮޑުކޮށް، އެމީހުންނަށް ފުލެޓަށް ކުރިމަތިލެވޭ ގޮތަށް ދިވެހިރާއްޖޭގެ ފަނޑިޔާރުންނާއި ބެހޭ ގާނޫނަށް އިސްލާހު ހުށައެޅުމުގެ ބިލު މެންބަރަކުވަނީ މިހާރު ސަރުކާރުން އިއުލާނުކޮށްފައިވާ ބިންވެރިޔާ ޕްރޮގުރާމުގެ ތެރެއިން އާންމުންގެ އަތުން ރިޝްވަތު ނަގަމުން އަންނަކަމަށް ތުހުމަތުކުރައްވާފައެވެ.

އެގޮތުން ރައްޔިތުންގެ މަޖިލީހުގެ މާވަށު ދާއިރާގެ މެންބަރު މުޙައްމަދު ސައީދުގެ އިތުރުން މަހިބަދޫ ދާއިރާގެ މެންބަރު އަޙްމަދު ޠާރިޤު (ޓޮމް)ވެސްވަނީ ވަނީ ހިލޭ ބިން ދިނުމަށް އިއުލާނުކުރުމަށްފަހު ސަރުކާރުގެ ބައެއް ވެރިން ގުޅައިގެން އާންމުން އަތުން 750،000 ރުފިޔާ ހޯދަމުން އަންނަ ކަމަށް ތުހުމަތުކޮށް ވާހަކަ ދައްކަވާފައެވެ. 

Advertisement

އެގޮތަށް ވާހަކަދައްކަވަމުން ޠާރިގު ވަނީ ގޯތި ހޯދަން ކުރިމަތިލި ފަރާތްތަކުގެ އަތުން ރިޝްވަތުގެ ގޮތުގައި ގިނަ އަދަދެއްގެ ފައިސާ ހޯދައިގެން ގޯތި ބަހައިލުމުން، އާދައިގެ ނިކަމެތި މާލޭގެ ރައްޔިތުންނަށް ލިބޭނީ ކޯއްޗެއްތޯ ސުވާލު ކުރައްވާފައެވެ. 

ހަމައެހެންމެ އެތައްހާސް ރައްޔިތުން ގޯއްޗަށް ކުރިމަތިލާފައިވާއިރު، އެމީހުންގެ އަތުން މިހާ ގިނަ ފައިސާ ނެގުމުން ބޮޑެތި ގެއްލުންވާނެ ކަމަށްވެސް ޠާރިގް ވަނީ ފާހަގަކޮށްފައެވެ.