ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މި ސަރުކާރުން އަންނަނީ މަސްވެރިން ބާނާހާ މަހެއް ކިރަމުން ކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވެއްޖެއެވެ.
ޝިފާއު މިފަދައިން ވިދާޅުވެފައި ވަނީ، މިހާރު ކުރިއަށްދާ ރައްޔިތުންގެ މަޖިލީހުގެ ތިންވަނަ ދައުރުގެ 22 ވަނަ ޖަލްސާގައި، މަސްވެރިންނަށް މިސަރުކާރުން ވެފައިވާ ވަޢުދުތައް ނުފުއްދޭތީ މަސްވެރިންގެ ހައްގު ހޯދަންކަަމަށް ބުނެ އިއްޔެ ހަވީރު އިދިކޮޅު ޕީޕީއެމްއިން ކުރި މުޒާހަރާ ހާލަތާ ނުބައްދަލު ބާރުގެ ބޭނުންކޮށްގެން ރޫޅާލި ކަމަށް ބުނެ ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފް (ސެމްބެ)، ހުށަހެޅި މައްސަލަ ބޭރުކޮށްލުމާއި ގުޅިގެން އެކަމާ ކަންބޮޑުވުން ފާޅުކޮށް ސެމްބެ ދެއްކެވި ވާހަކަތަކާއި ގުޅިގެންނެވެ.
ސެމްބެ ވިދާޅުވީ ދިވެހިންގެ ހައްގުތައް ހޯދުމަށް ނުކުންނަ ކޮންމެ މީހަކާ މެދުވެސް އަދުގެ ސަރުކާރުން ކަންކަން ކުރަމުންދަނީ ވަރަށް އިހާނަތިކޮށް ކަމަށެވެ. އެގޮތުން، އިއްޔެ މަސްވެރިންގެ ހައްގުގައި އިދިކޮޅު ކޯލިޝަނުން ކުރިއަށް ގެންދިޔަ މުޒާހަރާ ތެރެއިންވެސް އަނިޔާވެރިކޮށް އަންހެނުންވެސް ހައްޔަރު ކޮށްފައިވާކަން ފާހަގަކޮށް އެމީހުން ވަގުތުން ވަގުތަށް ދޫކޮށްލުމަށް އޭނާ ވަނީ ގޮވާލާފައެވެ.
ސެމްބެގެ މި ވާހަކަތަކަށް ރައްދު ދެއްވައި ޝިފާއު ވިދާޅުވީ، އަންހެނުން ހިމެނޭހެން އިދިކޮޅުން އިއްޔެ މަސްމާރުކޭޓު ކުރިމަތީގައި ކުރި މުޒާހަރާ އިން މަސްވެރިންނަށް ކުރެވެނީ ފުރައްސާރަ ކަމަށެވެ. އަދި ޕީޕީއެމްގެ ސަރުކާރުން މަސްވެރިންނަށް ވީ ވައުދު ނުފުއްދުނު ނަމަވެސް މި ސަރުކާރުން ފުއްދަމުންދާ ކަމަށާ، މި ސަރުކާރުން އަންނަނީ މަސްވެރިން ބާނާހާ މަހެއް ކިރަމުން ކަމަށް ޝިފާއު ވިދާޅުވިއެވެ.
"އިރާދަކުރެއްވިޔާ މިއަދު މި ސަރުކާރުން މި ދަނީ ރާއްޖޭގެ މި ފާގަތި މަސްވެރިކަމުގެ ސީޒަން ގައިވެސް ބާނާހާ މަހެއް ގަންނަމުން. ބާނާހާ މަހެއް ކިރަމުން. ބާނާހާ މަހަކަށް ރުފިޔާ ދެމުން. ބަރާބަރަށް ފައިސާ ދެމުން."
މެންބަރު މުހައްމަދު ޝިފާއު
ޝިފާއު އިތުރަށް ވިދާޅުވީ ޕީޕީއެމްގެ ސަރުކާރު ނިމިގެން ދިޔަ އިރު 38 މިލިއަން ރުފިޔާ މަސްވެރިންނަށް ނުދީ ހުރި ކަމަށާ، އެ ފައިސާވެސް ދެއްކީ ރައީސް ޞާލިހު ގެ ސަރުކާރުން ކަމަށެވެ. އަދި ރަށްރަށުގައި ހުރި އައިސް ޕްލާންޓް ތައްވެސް މި ސަރުކާރު އައި އިރު ދަބަރަށް ވެފައި ވަނިކޮށް އެތަން ތަންވެސް ފެނަކައާއި ހަވާލު ކޮށްގެން ހިންގަންފެށީ މި ސަރުކާރުން ކަމަށް ޝިފާއު ވިދާޅުވިއެވެ.
މަސްވެރިން ބާނާހާ މަހެއް ސަރުކާރުން ކިރަމުންދާ ކަމަށް ޝިފާއު ވިދާޅުވި ނަމަވެސް، މަސްވެރިކަން ތިޔާގި ވީއިރު އެކަމަށް ތައްޔާރު ނުވެވުނު ކަމަށް ފިޝަރީޒް މިނިސްޓަރު ޑރ. ހުސެއިން ރަޝީދު ހަސަން ވަނީ ދާދިފަހުން މަޖިލީހުގައި އެއްބަސވެ ވަޑައިގެންފައެވެ. އަދި މަސްވެރިން ބާނާ މަސް ނުކިރިގެން ބައެއް ދޯނިތަކުން މަސްތައް ކަނޑަށް އަޅާލި އިރު، އަނެއްބައި ދޯނިތަކުން ވަނީ އެ މަސްތައް ރަށް ރަށުގެ ރައްޔިތުންނަށް ބަހާފައެވެ.
Advertisement
This content is created and paid for by advertisers and does not involve Voice Journalists
