ސްރީލަންކާ ބަނގުރޫޓުވީ ރައްޔިތުން އަތުން ނަގާ ޓެކްސް ބޮޑުކުރަންވީ ދަނޑިވަޅުގައި އެކަން ނުކުރެވުމުންކަމަށާއި، އެ ގޯސް ދިވެހި ސަރުކާރުން ހަދައިގެން ނުވާނެކަމަށް މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވެއްޖެއެވެ.
ރައްޔިތުން އަތުން ނަގާ ޓެކްސް ބޮޑުކުރުމަށް މަޖިލީހަށް ހުށައަޅާފައިވާ އިސްލާހަށް ވާހަކަދައްކަވަމުން ޝިފާއު ވިދާޅުވީ މި ބިލަށް ބަހުސްކުރެއްވި ގިނަ މެމްބަރުންތަކެއް ޖީއެސްޓީ ބޮޑުކުރުމާއި ދޭތެރޭގައި ކަންބޮޑުވުން ފާހަގަކުރެއްވި ނަމަވެސް މުޅި ބިލު ސްޓްރަކްޗާކޮށްފައިވާ ގޮތަށް ބަލާނަމަ ޖީއެސްޓީ ބޮޑުކުރެވެނީ އެންމެ 2 އިންސައްތަކަމަށެވެ.
ޝިފާއު ވިދާޅުވީ ޖީއެސްޓީ ނެގެނީ ނިސްބަތުން މަދު މުދަލަކުންކަމަށެވެ. އަދި އޭގެ ސަބަބުން ރައްޔިތު މީހާއަށް ކުރާނެ އަސަރު ވަރަށް ކުޑަވާނެކަމަށެވެ.
ޓެކްސްއަށް މި ގެނެވޭ ބަދަލާއެކު، 3 ބިލިއަން ރުފިޔާ އާމްދަނީއަށް އިތުރުވެގެންދާއިރު، އެ ތިން ބިލިއަން ރުފިޔާގެ ބޮޑު ޕަސެންޓަކީ ޓީޖީއެސްޓީކަމަށް ޝިފާއު ވިދާޅުވިއެވެ.
ޝިފާއު އިތުރަށް ވިދާޅުވީ ޖީއެސްޓީއާއި ޓީޖީއެސްޓީއަށް ގެނެވޭ ބަދަލަކީ އެއަށް ބައިނަލް އަގުވާމީ މާލީ އިދާރާތަކުން މަރުހަބާ ކިޔާ ބަދަލެއްކަމަށެވެ.
"މިއަދު ރާއްޖޭގެ އެތެރޭގެ ޚަރަދުތައް ހަމަޖެއްސުމަށްޓަކައި އެތެރޭގެ އާމްދަނީ ބޮޑުކުރަން ޖެހޭނެކަމަށް، ދުނިޔޭގެ މާލީ އިދާރާތަކުން ސަރުކާރަށް އެ އަންނަނީ ތަކުރާރުކޮށް ލަފާދެމުން. އެއީ މި ގެނެވޭ ބަދަލަކީ"
އިހަވަންދޫ ދާއިރާގެ މެމްބަރު މުހައްމަދު ޝިފާއު
ޝިފާއު ވިދާޅުވީ، މިފަދަ އިލްތިމާސްތައް ބައިނަލްއަގުވާމީ މާލީ އިދާރާތަކުން އަވައްޓެރި ސްރީލަންކާއަށްވެސް ތަކުރާރުކޮށް ދެމުން ގޮސްފައިވާކަމަށެވެ. އެހެން ނަމަވެސް އެ ފަލާތަކާއި އެއްގޮތަށް ޓެކްސް ބޮޑުކޮށްފައި ނުވުމުގެ ނަތީޖާއެއްގެ ގޮތުން ސްރީލަންކާ އިގްތިސާދީ އަނދަވަޅަކަށް ވެއްޓިގެން ދިޔަކަމަށް ޝިފާއުވަނީ ވިދާޅުވެފައެވެ.
"ޓެކްސް ބޮޑުކޮށް އެތެރޭގެ އާމްދަނީ ބޮޑުކުރަން ތަކުރާރުކޮށް ލަފާދިން އިރުވެސް އެ ލަފާ ބަލައެއް ނުގަތް، އެންމެ ފަހުން އެ އޮތީ ގައުމު އެގައުމުގެ ރައްޔިތުން އަންދާޒާ ނުކުރާ ވަރުގެ އިގްތިސާދީ އަނދަވަޅުގަނޑަކަށް ވެއްޓިފަ
އިހަވަންދޫ ދާއިރާގެ މެމްބަރު މުހައްމަދު ޝިފާއު
ޝިފާއުގެ ވާހަކައިގައި ވަނީ މި ވަގުތަކީ ރައްޔިތުން އަތުން ނަގާ ޓެކްސް ބޮޑުކުރުމަށް އެންމެ މުނާސަބު ވަގުތު ނޫންކަން ފާހަގަކުރައްވާ މެމްބަރުން ދައްކަވާފައިވާ ވާހަކަތަކަށްވެސް ރައްދުދެއްވާފައެވެ.
އެގޮތުން އޭނާ ވިދާޅުވީ ސަރުކާރުން މި ގެންނަ ބަދަލަކީ ރާއްޖޭގެ އިގްތިސާދު ކުރިއަރަމުން މި އަންނަ ވަގުތު، އިގްތިސާދު "ބޫސްޓު" ކުރުމަށް ގެނެވޭ ބަދަލެއްކަމަށެވެ.
ދުނިޔޭގެ އިގްތިސާދު މާލީ ބަލިމަޑުކަމަކުން އަރައިގަންނަން އަންނަ މި ވަގުތަކީ މި އިސްލާހު ގެނައުމަށް އެންމެ މުނާސަބު ވަގުތުތަކަށް ޝިފާއު ފާހަގަކުރެއްވިއެވެ. އަދި ޓެކްސް ނަގަނީ ރައްޔިތުންނަށް އަސާސީ ޚިދުމަތްތައް ފޯރުކޮށްދޭންކަމަށް ވާއިރު، މިއީ ރައްޔިތުންވެސް އުފަލާއެކު ބަލައިގަންނަ ކަމެއްކަމަށް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
