ކޮވިޑް-19 އާއި އެކު ކުރިމަތިވި އިގުތިސާދީ ދަތިތަކާ ގުޅިގެން މަގާމުގެ ކުރިއެރުން ނުދީ ހިފެހެއްޓި ސިވިލް ސާވިސް މުވައްޒަފަކަށް މަގާމުގެ ކުރިއެރުން ދޭން ވަޒީފާއާ ބެހޭ ޓްރައިބިއުނަލުން އަމުރުކޮށްފި އެވެ.
މަގާމުގެ ކުރިއެރުން ދޭން ވަޒީފާއާ ބެހޭ ޓްރައިބިއުނަލް އިން އަމުރުކޮށްފައިވަނީ ހެލްތު މިނިސްޓްރީގެ ލީގަލް އޮފިސަރު އިސްމާއިލް ޒާހިރަށެވެ. އިސްމާއީލް ޒާހިރު އެމައްސަލަ ހުށަހެޅުއްވީ ސިވިލް ސާވިސްގެ ލީގަލް އޮފިސަރުންގެ ވަޒީފާގެ އޮނިގަނޑުގައި ކަނޑައަޅާފައިވާ ޝަރުތު ހަމަވެ، އޭނާއަށް ވަޒީފާގެ ކުރިއެރުން ދީފއިނުވާތީ އެވެ.
ޝަރުތު ހަމަވެ، އޭނާ ހުށަހެޅި މައްސަލައިގައި ބުނީ 2017 އާއި 2019 އަދި 2021 ވަނަ އަހަރާ ހަމަ އަށް ވިދިވިދިގެން ދެ އަހަރު ދުވަހު މަސައްކަތްކޮށް، މަސައްކަތުގެ ފެންވަރު ބެލުމުގެ ނިޒާމުން 85 ޕަސެންޓަށް ވުރެ މަތިން ހޯދާފައިވާ ކަމަށެވެ.
އެހެން ނަމަވެސް ސިވިލް ސާވިސް ލީގަލް އޮފިސަރުންގެ ވަޒީފާގެ އޮނިގަނޑުގައި ކަނޑައަޅާފައިވާ ގޮތަށް އެ މުއްދަތުގައި އޭނާ އަށް ލިބެން ޖެހޭ ތިން ޕްރޮމޯޝަނެއް ނުދޭ ކަމަށް އިސްމާއީލް ޒާހިރު ހުށަހެޅި މައްސަލައިގައި ބުނެފައި ވެއެވެ.
އެމައްސަލައާއި ގުޅިގެން ސިވިލް ސާރވިސް ކޮމިޝަނުން ބުނީ މަގާމުގެ ކުރިއެރުން ނުލިބޭ ގިނަ އަދަދެއްގެ މުވައްޒަފުން އުޅޭ ކަމަށާއި، މުސާރަ އަށް ނުވަތަ އެއްވެސް އެލަވެންސަކަށް ބަދަލެއް އަންނަ ނަމަ، އެ ބަދަލެއް ގެނެވޭނީ ފިނޭންސް މިނިސްޓްރީ އަށް އެންގުމަށް ފަހު ކަމަށެވެ. އަދި މުސާރަ އާއި ކުރިއެރުން ދިނުމުގެ ކުރިން މިނިސްޓްރީއާ މަޝްވަރާކޮށް، ބަޖެޓުގައި އެ ފައިސާ ހުރިކަން ކަށަވަރު ކުރަން ޖެހޭ ކަމަށްވެސް އެ ކޮމިޝަނުން ބުނެއެވެ.
ހަމައެހެންމެ އެ މައްސަލަ ރައްދުވާ އިސްމާއީލް ޒާހިރު ހުށަހެޅި މައްސަލާގައި ބަޔާންކޮށްފައިވާ ދުވަސްވަރަކީ ކޮވިޑްގެ ބަލިމަޑުކަމުގެ ހާލާތާ ގުޅިގެން ދައުލަތުގެ ހަރަދު ކުޑަކުރުމުން ދިޔަ ދުވަސްވަރު ކަމަށާއި އެހާތަނަށް މުވައްޒަފުންނަށް ދޭން ފަށާފައި ނުވާ އެއްވެސް އެލަވެންސެއް ނުދިނުމަށް ފިނޭންސް މިނިސްޓްރީން އޭރު އަންގާފައި އޮތް ކަމަށް އެ ކޮމިޝަނުން ވަނީ ބުނެފައެވެ.
އަދި ވަޒީފާއާ ބެހޭ ޓްރައިބިއުނަލް އިން ނިންމީ ސިވިލް ސާރވިސް ކޮމިޝަނާ ދެކޮޅަށް މުހައްމަދު އިސްމާއީލަށް މަގާމުގެ ކުރިއެރުން ދިނުމަށެވެ. އިސްމާއީލް ޒާހިރު އެދިފައިވާ ގޮތަށް އެ ތިން އަހަރުން ފެށިގެން އޭނާ އަށް ލިބެން ޖެހޭ ކުރިއެރުމާއި އެ ކުރިއެރުންތަކާ އެކު އޭނާގެ މުސާރަ އަށް އަންނަ ބަދަލާ ގުޅިގެން ލިބޭ މުސާރަ އާއި ސްޕެޝަލް ޑިއުޓީ އެލަވަންސާއި އިތުރު ގަޑީގެ ފައިސާ އިން އުނިވެފައިވާ ފައިސާ ނަގައިދިނުމަށް ކަނޑައަޅައި އެ ފައިސާ ރަސްމީ ބަންދު ނޫން 30 ދުވަހުގެ ތެރޭގައި އޭނާ އަށް ދިނުމަށް ސީއެސްސީގެ މައްޗަށް ޓްރައިބިއުނަލުން ވަނީ އަމުރުކޮށްފައެވެ.
Advertisement
This content is created and paid for by advertisers and does not involve Voice Journalists
