މަސްތުވާތަކެތޯގެ ވިޔަފާރިކުރާ އިސް މީހެއް ކަމަށް ފުލުހުން ބުނާ ގދ. ހޯޑެއްދޫ، އަލޯރާ، އަރުޝަދު ހާލިދު ދުބާއީ އަށް ދިޔަ ތަނުން އެއާޕޯޓުން މިދިޔަ ހަފުތާގައި ހިފަހައްޓައި އަނބުރާ ސްރީ ލަންކާ އަށް ފޮނުވައިލުމުން ރޭ ރާއްޖެ އައުމާއެކު، ފުލުހުންގެ ބެލުމުގެ ދަށަށް ގެންގޮސްފި އެވެ.

މިދިޔަ އަހަރުގެ ޑިސެމްބަރު 12 ވަނަ ދުވަހު ފުލުހުން އަތުލައިގަތް 119 ކިލޯގެ މަސްތުވާތަކެތި ރާއްޖެ އެތެރެ ކުރުމަށް އެންމެ އިސްކޮށް މަސައްކަތް ކުރި މީހަކީ އަރުޝަދެވެ. 

މީގެ އިތުރުން 9 ކިލޯގެ މަސްތުވާތަކެތީގެ މައްސަލައެއްވެސް އަރުޝަދުގެ މައްޗަށް ވަނީ އުފުލައިފައެވެ. މިމައްސަލާގައި ކުށުގެ ވެށިން ގިނަ ޢަދަދެއްގެ ފައިސާވެސް ފުލުހުންގެ ބެލުމުގެ ދަށަށް ގެނެވިފައިވެއެވެ.

Advertisement

މި މައްސަލާގައި އަރުޝަދު ދޫކޮށްލާފައިވަނީ އޭނާއާއި ގުޅޭ އެއްވެސް ތަނަކުން މަސްތުވާތަކެތި ފެނިފައިނުވާ ކަމަށް ހެކިންގެ ގޮތުގައި ހުށަހެޅި ފުލުހުން ކޯޓުގައި ބުނުމާ ގުޅިގެންނެވެ. އެއަށްފަހު އޭނާ ވަނީ ދޫކޮށްލާފައެވެ.

މިމައްސަލައާއި ގުޅިގެން ފުލުހުން ވިދާޅުވީ، ހައިކޯޓުގެ އަމުރެއް ތަންފީޒު ކުރުމަށްޓާކައި އަރުޝަދު މިވަގުތު ހުރީ ފުލުހުންގެ ބެލުމުގެ ދަށުގައި ކަމަށެވެ.