މިދިޔަ އަހަރު ނިމުނު އިރު ރިސޯޓުތަކުގެ ބިމު ކުލީގެ ގޮތުގައި ސަރުކާރަށް ދައްކަންޖެހޭ ފައިސާ 39 ރިސޯޓަކުން ނުދައްކާ ކަމަށް ޓޫރިޒަމް މިނިސްޓްރީން ބުނެފި އެވެ.

ޓޫރިޒަމް މިނިސްޓްރީގެ މިދިޔަ އަހަރުގެ އަހަރީ ރިޕޯޓާ ގުޅިގެން މިއަދު ރައްޔިތުންގެ މަޖިލީހުގެ އިގްތިސާދީ ކޮމިޓީގައި އެ މިނިސްޓްރީގެ ޑެޕިއުޓީ ޑިރެކްޓާ ޖެނެރަލް އަލީ ސިނާން ވިދާޅުވީ، ރިސޯޓުތަކުން ދައުލަތަކަށް ދައްކަންޖެހޭ ފީތައް ދައްކާ ތަންތަނުގެ ނިސްބަތް އަހަރުން އަހަރަށް އިތުރުވަމުންދާ މިންވަރު މިނިސްޓްރީން ބަލަމުންދާ ކަމަށާއި، ފީ ނުދައްކާ ފަރާތްތަކަށް ނޯޓިސްދީ އިތުރު ވަގުތު ދީފައިވާ ކަމަށް ވިދާޅުވިއެވެ.

އެގޮތުން މީރާއިން ލިބުނު ރިޕޯޓަށް ބަލާއިރު، މިދިޔަ 2021 ވަނަ އަހަރު 39 ރިސޯޓަކުން ކުލި ދައްކާފައިނުވާކަން ފާހަގަކުރެއްވިއެވެ. އެހެން ނަމަވެސް އެ ރިސޯޓުތަކާއި، ބިމު ކުލީގެ ގޮތުގައި ދައުލަތަށް ނުލިބި އޮތް ޖުމްލަ ފައިސާގެ ތަފްސީލު މިނިސްޓްރީން ހާމަކޮށްފައެއް ނުވެއެވެ.

Advertisement

އެ ފައިސާގެ އަދަދު މަދުވި ސަބަބެއްކަމަށް މީރާއިން ފާހަގަކުރީ ރިސޯޓު ކުލި ނެގުމުގެ ގަވާއިދަށް 2020 ވަނަ އަހަރު ސަރުކާރުން ގެނެސްފައިވާ އިސްލާހުގެ ދަށުން ރިސޯޓު ކުލި ނުދެއްކުމުން ޖޫރިމަނާކުރާ ނިސްބަތް ކުޑަކުރަން ނިންމުމާއި ގުޅިގެންނެވެ.