ހެންވޭރު ގައި ހުރި ގެއަކުން ދުން އަރާތީ އެގެއަށް ވަދެ ބެލި ބެލުމުން، އެއީ ބަނގުރާ ކައްކާތީ އެރު ދުމެއް ކަން އެނގިފައިވާ ކަމަށް ފުލުހުން ބުނެފިއެވެ.
ފުލުހުންގެ މީޑިއާ އޮފިޝަލް މިއަދު ވިދާޅުވީ، ހެންވޭރު ރޯޝަނީ މަގުގައި ހުރި ގެއަކުން ދުން އަރާ ކަމަށް މިއަދު 06:12 ކަން ހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ.
އަދި ރިޕޯޓްކުރުމާއި ގުޅިގެން އެމްއެންޑީއެފް އާއި ފުލުހުން އެގެއަށް ގޮސް ދޮރުގައި ތެޅުމުން އެއްވެސް މީހަކު ދޮރު ނުހުޅުވުމުން ބާރުގެ ބޭނުން ކޮށްގެން އެގެއަށް ވަދެފައިވާ ކަމަށް މީޑިއާ އޮފިޝަލް ވިދާޅުވިއެވެ.
މީގެ އިތުރުން، އެގެއަށް ވަދެ ބެލި ބެލުމުން އެގޭ ތެރެއިން ދުން އަރަމުން ދިޔައީ ބަނގުރާ ކައްކަމުން ދާތީކަންވެސް އެނގިފައިވާ ކަމަށާ، ބަނގުރާ ކައްކަން ބޭނުންކުރާ ގިނަ ސާމާނު ތަކެއް އެގެއިން ފެނިފައިވާކަމަށްވެސް ފުލުހުންގެ މީޑިއާ އޮފިޝަލް ވިދާޅުވިއެވެ.
ފުލުހުން އިތުރަށް ވިދާޅުވީ، އެ ސަރަހައްދުގައި މިހާރު ފުލުހުން ހަރަކާތްތެރިވަމުން އަންނަ ކަމަށެވެ. އެހެން ނަމަވެސް، އެ މައްސަލަ އާއި ގުޅިގެން މީހަކު ހައްޔަރުކޮށްފައިވާ ކަމެއް ވިދާޅުވެފައި ނުވާއިރު, އެގެއިން މީހަކު ފެނުކަމެއް ނުވަތަ ނޫން ކަމެއް ކަމެއް ވެސް ވިދާޅު ނުވެއެވެ.
Advertisement
This content is created and paid for by advertisers and does not involve Voice Journalists
