ކުލަބް މޯލްޑިވްސް ކަޕް 2022 ގައި މާލޭ ސިޓީ ކައުންސިލް ކުޅުނު ދެވަނަ މެޗުގައި މޯލްޑިވިއަން އަތުން ބަލިވެ މުބާރާތުން ކަޓައިފި އެވެ.

ބަލިނުވެ ފަރުޖައްސާލަން ސިޓީ ކައުންސިލަށް މަޖުބޫރުވި މި މެޗުން އެ ޓީމު ބަލިވީ 2-1 ގެ ނަތީޖާއަކުންނެވެ. މާލެސިޓީ ކައުންސިލުން ކުޅުނު ފުރަތަމަ މެޗުގައި ބަލިވީ ރޯޑް ރެކްރިއޭޝަން ކްލަބް (އާރްއާރްސީ) އަތުން 4-1 ގެ ނަތީޖާއަކުންނެވެ.

މި ނަތީޖާއާ އެކު ސިޓީ ކައުންސިލް ހިމެނޭ ގްރޫޕުން ދެވަނަބުރަށް ދަތުރުކުރީ އެންމެ ފަހުގެ ޗެމްޕިއަން ރޯޑް ރެކްރިއޭޝަން ކުލަބާއި މޯލްޑިވިއަން އެވެ.

ރެހެންދި ފުޓްސަލް ދަނޑުގައި ކުޅުނު މި މެޗުގެ ހަތް ވަނަ މިނިޓްގައި، މޯލްޑިވިއަން އަށް ލީޑުނަގައިިދިނީ ހުސެއިން އަފްސަލް (އޮޒިލް) އެވެ. މިއީ އިބްރާހިމް ނަދާދު (ކުޑައްޓޭ) ނެގި ހުރަހަކުން އޭނާ ކާމިޔާބުކުރި ލަނޑެކެވެ.

ސިޓީ ކައުންސިލް ކޮޅަށް މޯލްޑިވިއަންގެ ދެވަނަ ލަނޑު ޖަހާފައިވަނީ ފުރަތަމަ ހާފުގެ ކުޅުން ނިމެން ފަސް މިނެޓަށްވެފައި ވަނިކޮށެވެ. މި ލަނޑު އެ ޓީމަށް ކާމިޔާބުކޮށްދިނީ ހަމްޒާ މުހައްމަދު (ހަމްޕު) އެވެ.

މެޗުގައި ސިޓީ ކައުންސިލްގެ ހަމައެކަނި ލަނޑު ކާމިޔާބުކޮށްދިނީ މުހައްމަދު ނާއިމެވެ. މިއީ އޭރިއާ ރޮނގު ކައިރިން ފޮނުވާލި ބާރު ހަމަލާއަކުން އޭނާ ކާމިޔާބުކުރި ލަނޑެކެވެ.

މެޗުން މޯލްޑިވިއަން މޮޅަށް ކުޅުނު ނަމަވެސް ސިޓީ ކައުންސިލް ވަނީ މި މެޗުގައި ގިނަ ހަމަލާތަކެއް އުފައްދާފައެވެ. އެ ހަމަލާތަކުގެ ހުރަހަކަށް ވީ މޯލްޑިވިއަންގެ ކީޕަރު މުހައްމަދު ސިޔާޒެވެ.

މީގެއިތުރުން ބުރާސްފަތި ދުވަހުގެ ރޭ ކުޅުނު ދެވަނަ މެޗުން އެމްޓީސީސީ ވަނީ މޮޅުވެފައެވެ. ގްރޫޕް އޭގައި ކުޅުނު މި މެޗު އެމްޓީސީސީ ކާމިޔާބުކުރީ މިފްކޯ އަތުން 3-2 ގެ ނަތީޖާއަކުންނެވެ.

މި މުބާރާތުގައި މާލެ ސިޓީ ކައުންސިލްގެ ޓީމްގެ ކޯޗުކަން ކޮށްދިނީ ދިވެހި ފުޓްބޯޅައިގައި ގިނަ ކާމިޔާބީތަކެއް ހޯއްދަވާފައިވާ ތަޖުރިބާކާރު ކުޅުންތެރިއެއް ކަމަށްވާ ކްލަަބް ޓީނޭޖްގެ ކެޕްޓަން އަހުމަދު މުޙައްމަދު (އަންމަޑޭ) އެވެ.

މާލެ ސިޓީ ކައުންސިލް ޓީމުގެ މީޑީއާ ޕާޓްނަރަކީ ވޮއިސްއެވެ