އއ މާޅޮހުގެ ދެކުނުން ބަންޑުން ޖަހާލި ލޯންޗުން ގެއްލުނު ސ. ހިތަދޫ މިންހާ، މުހައްމަދު މިންހާޖު އާއެކު ދަތުރުކުރި ޅ. ހިންނަވަރު، އަލީ އަހުމަދު ތަހުގީގަށް ދެމުން އަންނަނީ މުޅިން ތެދު މައުލޫމާތުތަކެއް ނޫންކަމަށް ފުލުހުން ބުނެފިއެވެ. 

މިންޖާހު ގެއްލިގެން ފުލުހުންނަށް ރިޕޯޓުކޮށްފައިވަނީ އޮކްޓޫބަރު 5 ވަނަ ދުވަހުގައެވެ. އަދި އެފަހުން މި މަހުގެ 7 ވަނަ ދުވަހުގެ ވަގުތެއްގައި މަހަށް ނުކުމެ އުޅުނު ބަޔަކަށް ލޯންޗު ބަންޑުންޖަހާލާފައި އޮތްވާ ފެނުނެވެ. އަދި މިންހާޖާއި އެކު އެ ލޯންޗުގައި ދަތުރުކުރި އަލީ އަހުމަދު ފެލިދޫ ފުއްޓަރު ފަރާތުން ފެނިފައިވެއެވެ. 

އެ ހާދިސާއާއި ގުޅޭގޮތުން ނޫސްވެރިންނަށް މައުލޫމާތު ދިނުމަށް ބޭއްވި ޕްރެސް ކޮންފަރެންސްގައި ވާހަކަދައްކަވަމުން، ޗީފް ސްޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވީ، ލޯންޗު ބަންޑުން ޖަހާލީ މަހަށް ނިކުމެނެގެން އުޅެނިކޮށް އިންޖީނު ހުއްޓިގެންކަމާއި، އަދި ލޯންޗު ބަންޑުންޖަހާލީ ކަނޑު ގަދަވެގެންކަމަށް އެ ލޯންޗުން ދަތުރުކުރި އަލީ އަހުމަދު ކިޔައިދީފައިވާކަމަށެވެ. 

ލޯންޗު ބަންޑުން ޖަހާލުމަށްފަހުވެސް މިންހާޖު ފެންނަން އޮތް ކަމަށާއި، އެހެން ނަމަވެސް ހެނދުނު ވިއިރު ފެންނަން ނެތްކަމަށް އަލީ އަހުމަދު ތަހުގީގަށް ކިޔައިދީފައިވާކަމަށް ފުލުހުން ބުންޏެވެ. 

އެކަން ފާހަގަކުރައްވާ ސްޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވީ މުޅި މައްސަލައިގައި މިހާތަނަށް ފެންނަން ހުރި ކަންތައްތަކަށް ބަލާއިރު، އަލީ އަހުމަދު ކިޔައިދިން ވާހަކަތަކަކީ މުޅިން ހަގީގަތްކަމަށް ގަބޫލު ނުކުރެވޭކަމަށެވެ. އެގޮތުން އެގޮތުން އެމީހުން ދަތުރު ކުރި ލޯންޗުން ގިނަ އަދަދެއްގެ ޕެޓްރޯލު ފެނިފައިވާކަމަށް ބަޝީރު ވިދާޅުވިއެވެ. 

އެ ދެމީހުންނަކީވެސް މަސްތުވާތަކެތީގެ ރިކޯޑު އޮތް ދެމީހުންކަމަށް ވާތީ، މި ހާދިސާއާއި މަސްތުވާތަކެއްޗާއި އެއްވެސް ގުޅުމެއް އޮތްތޯ ބެލުމުގެ މސައްކަތްވެސް ކުރެވެމުންދާކަމަށް ބޝީރު ވިދާޅުވިއެވެ. އަދި ވިދާޅުވީ ބަންޑުން ޖަހާލި ލޯންޗުން މަސްތުވާތަކެތި ފެނިފައި ނުވާކަމަށެވެ. 

އެ ލޯންޗު ބަންޑުން ޖަހާލީ ކިހާ ހިސާބަކުންކަން ލޯންޗުގެ ޖީޕީއެސް އިން ދެނެގަނެވިފައިވާ ކަމަށާއި މޫސުމުގެ ގޮތުން ލޯންޗު އަންނާނީ ކޮން ދިމާލަކަށްކަން ފުލުހުންގެ ޓެކްނިކަލް ޓީމަށް ދެނެގަނެވިފައިވާ ކަމަށް ބަޝީރު ވިދާޅުވެފައިވެ އެވެ. އެހެން ނަމަވެސް ލޯންޗު ދަތުރުކުރި ރޫޓްތައް ދެނެގަނެވިފައި ނުވާ ކަމަށާއި އެކަމަކު ސީދާ ހާދިސާ ހިނގި ލޮކޭޝަންވެސް ދެނެގަނިފައި ނުވާކަމަށް އޭނާ ވަނީ ވިދާޅުވެފައެވެ. 

މިންހާޖު ހޯދުމަށްޓަކައި ގައުމީ ދިފާއީ ބާރައި ގުޅިގެން 78 ގަޑިއިރު މަސައްކަތްކޮށްފައިވާކަން ފުލުހުން ވަނީ ބުނެފައެވެ. އަދި އެއަށްފަހު ސާޗު ހުއްޓާލާފައިވާކަމަށާއި، އެހެން ނަމަވެސް އެ މައްސަލައިގެ ތަހުގީގު މިހާރުވެސް ކުރަމުންދާކަމަށް ފުލުހުން ބުންޏެވެ.