ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް ޔާމީން އަބްދުލްގައްޔޫމު ބޮޑުތިލަދުންމައްޗަށް ކުރައްވާ ދަތުރުފުޅުގައި ހއ ތުރާކުނަށް ވަޑައިގަތުމުން ހޫނު މަރުހަބާއެއް ދަންނަވައިފިއެވެ.
އެމަނިކުފާނު ތުރާކުނަށް ވަޑައިގެންފައިވަނީ މިއަދު މެންދުނުފަހުގައެވެ. އެއާއެކު ތުރާކުރުން ވަނީ ރައީސް ޔާމީންއަށް ހޫނު މަރުހަބާއެއް ދަންނަވާފައެވެ.
އެމަނިކުފާނުގެ އިސްތިގުބާލުގައި ގިނަ އަދަދެއްގެ ބަޔަކު ބަނދަރު ސަރަހައްދުގައި ތިބި މަންޒަރު ފެނިގެން ދިޔައެވެ.
ރައީސް ޔާމީން ތުރާކުނަށް ވަޑައިގެން އެމަނިކުފާނަށް މަރުހަބާ ދެންނެވުމަށް ބަނދަރު ސަރަހައްދުގައި ތިއްބެވި އެންމެނާއި ވަނީ ސަލާމްކުރައްވާފައެވެ. އެއަށްފަހު އެރަށުގެ ރައްޔިތުންނާއި ބުޚާތަބުކުރައްވާ ރައީސް ޔާމީން ވާހަކަފުޅުވެސް ދައްކަވާފައިވެއެވެ.
ރައީސް ޔާމިންގެ އިތުރުން އެމަނިކުފާނުގެ ޒައާމަތުގައި އިކޮނޮމިކް މިނިސްޓަރުކަން ކުރެއްވި މުހައްމަދު ސައީދުވެސް ރައްޔިތުންނާއި މުޚާތަބުކުރައްވާ ވާހަކަދެއްކެވިއެވެ.
ރައީސް ޔާމީން ބޮޑު ތިލަދުންމައްޗަށް ކުރައްވާ މި ދަތުރުފުޅަކީ ޕީޕީއެމްގެ ރިޔާސީ ޓިކެޓު އެމަނިކުފާނަށް ލިބިވަޑައިގެންނެވުމަށްފަހު ކުރައްވާ ދެވަނަ ދަތުރުފުޅެކެވެ.
މި ދަތުރުފުޅުގައި ހއ ގެ 5 ރަށަކަށް އެމަނިކުފާނު ވަޑައިގެންނެވުމަށް ވަނީ ހަމަޖެހިފައެވެ. ރައީސް ޔާމީން މިއަދު ހއ ތުރާކުނަށް ވަޑައިގެންފައިވަނީ އިހަވަންދޫގައި މަޑުކުރެއްވުމަށްފަހުގައެވެ.
އެމަނިކުފާނު ތުރާކުނުން ދެއް ވަޑައިގަންނަވާނީ ހއ ކެލާއަށެވެ. އަދި ކެލާގައި މިރޭ ރައީސް ޔާމިން ވަޑައިގަންނަވާ ޚާއްސަ ޖަލްސާއެއް ބޭއްވުމަށް ވަނީ ހަމަޖެހިފައެވެ. މި ޖަލްސާގައިވެސް އެމަނިކުފާނު ވާހަކަފުޅުދައްކަވާނެއެވެ.
ރައީސް ޔާމީން ބޮޑުތިލަދުންމައްޗަށް ކުރައްވާ މި ދަތުރުފުޅުގެ މަގްސަދުތަކުގެ ތެރޭގައި ރައްޔިތުންނާއި ބައްދަލުކޮށްލެއްވުމުގެ އިތުރުން، ޕީޕީއެމްގެ ރިޔާސީ މެނިފޮސްޓޯއަށް ބޭނުންވާ ޚިޔާލާއި މަޝްވަރާތައް ހޯއްދެވުން ހިމެނެއެވެ.
Advertisement
This content is created and paid for by advertisers and does not involve Voice Journalists
