ދުނިޔޭގެ ވަރުގަދަ ބީޗް ވޮލީބޯޅައިގެ ތަރިންނާއެކު ރާއްޖޭގައި މިހާރު ކުރިޔަށްދާ އެފްއައިވީބީ ބީޗް ޕްރޯ ޓުއާ 2022 މޯލްޑިވްސް ޗެލެންޖުން ރާއްޖޭގެ އިސްމާޢީލް ސާޖިދު (ކުޑަ ކާއްޓޭ) އާއި އާދަމް ނަސީމް (އެޑަމާ) ކަޓައިފިއެވެ.

ސަން އައިލޭންޑް ރިސޯޓުގައި ކުރިޔަށްދާ މުބާރާތުން ކުޑަ ކާއްޓޭ އާއި އެޑަމާ ކެޓީ މުބާރާތުގެ މެއިން ޑްރޯގައެވެ. މެއިން ޑްރޯ ގައި ޖުމްލަ 24 ޕެއާ ވަނީ ވާދަކޮށްފައެވެ. 

ފުރަތަމަ މެޗުގައި ބައްދަލުކުރީ ދުނިޔޭގެ ބީޗު ވޮލީގެ މަޝްހޫރު ބްރެޒިލް އާއި ދެކޮޅަށެވެ. އެ ގައުމުގެ ވަރުގަދަ ޕެއާއެއް ކަމަށްވާ ވިނިޝިއަސް އާއި އިވަންދްރޯގެ ޕެއާ އަތުން ކުޑަ ކާއްޓޭ އާއި އެޑަމާ ބަލިވީ ސީދާ ދެ ސެޓުންނެވެ. 

ބްރެޒިލް އިން ފުރަތަމަ ސެޓު ގެންދިޔައީ 21-10 އިންނެވެ. މި ސެޓުގައި ދިވެހި ޓީމަށް ގޯސްތަކެއް ހެދުނެވެ. އޭގެ ފައިދާ ނަގައިގެން ބްރެޒިލްގެ ޕެއާ ވަނީ މޮޅު ކުޅުމެއް ކުޅެފައެވެ. 

ފުރަތަމަ ސެޓުގައި ލިބުނު ތަޖުރިބާގެ އަލީގައި ދެވަނަ ސެޓުގައި ރާއްޖޭން ކުޅުން ރަނގަޅުކުރި އެވެ. ވާދަވެރި ކުޅުމަކަށް ފަހު ދެވަނަ ސެޓު ބްރެޒިލްގެ ޕެއާ ކާމިޔާބުކުރީ 21-18 އިންނެވެ. 

ދެވަނަ މެޗުގައި ރާއްޖެ ބައްދަލުކުރީ ތައިލޭންޑާއެވެ. އެ ގައުމުގެ އެއްވަނަ ޕެއާ އާއި ދެކޮޅަށް ރާއްޖެއިން ވަރުގަދަ ފައިޓެއް ދިނެވެ. ތައިލޭންޑުގެ ބަންލުއީ އަދި ސުރީން އާއި ދެކޮޅަށް ކުޅުނު މި މެޗުގެ ފުރަތަމަ ސެޓުގެ ކުރީކޮޅު ރާއްޖެއިން ލީޑުގައި އޮތް ނަމަވެސް މި ސެޓުގެ ފަހުކޮޅު ހެދުނު ގޯސްތަކުގެ ފައިދާ ނަގައިން ތައިލޭންޑުން ވަނީ 22-20 އިން މި ސެޓު ކާމިޔާބުކޮށްފައެވެ. 

މެޗުގެ ދެވަނަ ސެޓުގައި ރާއްޖޭގެ ފަރާތުން ފެނުނީ ދަށް ކުޅުމެކެވެ. މި ސެޓު ތައިލޭންޑުން ކާމިޔާބުކޮށްފައި ވަނީ 21-06 އިންނެވެ. 

މި މުބާރާތް ސަން އައިލޭންޑުގައި ކުރިޔަށްދަނީ މި މަހު 13-16 އަށެވެ. ދުނިޔޭގެ ބީޗު ވޮލީގައި ފާހަގަކޮށްލެވޭ 80 އަށްވުރެ ގިނަ ޕެއާ މި މުބާރާތުގައި ވާދަކުރެއެވެ.