ރައީސް ޔާމީންގެ ޒައާމަތުގައި ދަރަނި ނެގުމުން، އެއީ ބޮޑު ފާފައެއްކަމަށް ރައްޔިތުންނަށް ވިސްނައިދިން މީހުން ވެރިކަމާއި ހަވާލުވެ މިވީ މުއްދަތުގެ ތެރޭގައި ކޮންމެ ދިވެއްސެއްގެ ބޮލުގައި އެއްލައްކަ އައްޑިހަހާސް ރުފިޔާގެ ދަރަނި އަޅުވާފައިވާކަމަށް ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް، ރައީސް ޔާމީން އަބްދުލްގައްޔޫމު ވިދާޅުވެއްޖެއެވެ. 

ރައީސް ޔާމީން މިފަދައިން ވިދާޅުވެފައިވަނީ ހއ ތުރާކުނަށް ވަޑައިގެން އެ ރަށުގެ ރައްޔިތުންނާއި މުޚާތަބުކުރައްވާ ވާހަކަފުޅުދައްކަވަމުންނެވެ. 

ރައީސް ޔާމީން ވިދާޅުވީ އެމަނިކުފާނުގެ ޒައާމަތުގައި ލޯނު ނެގީ ބޮޑެތި މަޝްރޫއުތައް ކުރިއަށް ގެންދިއުމަށެވެ. އަދި އެއީ ރާއްޖޭގެ ތަރައްގީއަށް މުހިންމު މަޝްރޫއުތަކުގެ ގޮތުގައި އެމަނިކުފާނު ފާހަގަކުރެއްވިއެވެ. 

Advertisement

ލޯނުނަގައިގެން ކުރިއަށް ގެންދިޔަ އެއް މަޝްރޫއަކީ އެއަރޕޯޓު ތަރައްގީ ކުރުމުގެ މަޝްރޫއުކަން އެމަނިކުފާނު ފާހަގަކުރެއްވިއެވެ. އަދި އެ މަަސައްކަތް އެމަނިކުފާނު ނުކުރެއްވިނަމަ ރާއްޖެއަށް އަންނަ ފަތުރުވެރިން އިތުރު ނުކުރެވި އަދިވެސް އެއަރޕޯޓު އޮންނާނީ މީގެ އެތައް އަހަރެއް ކުރިން އޮތް ހާލަތުގައިކަމަށް އެމަނިކުފާނު ވިދާޅުވިއެވެ. 

އެހެން ހުރިހާ ސަރުކާރުތަކާއި ޚިލާފަށް އެމަނިކުފާނު ލޯނު ނެންގެވީ އިގްތިސާދީ މަސައްކަތްތައް ފުޅާކޮށް ހަލުވިކަމާއެކު ކުރިއަށް ގެންދިއުމަށްކަންވެސް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ. 

އެއާއެކު އެމަނިކުފާނު ވިދާޅުވީ، އެމަނިކުފާނުގެ ޒައާމަތުގައި ލޯނު ނަގަން ފެށުމުން، އޭރު އިދިކޮޅުގައި ތިއްބެވި ފަރާތްތައް ވަރަށް ބޮޑެތި ފާޑުކިޔުންތަކެއް އަމާޒުކުރިކަމަށެވެ. އަދި އެއީ ރައްޔިތުންގެ ބޮލުގައި އަޅުވާ ދަރަނިކަމަށް ވިސްނައިދީ، އެއީ ފާފައެއްގެ ގޮތަށް ސިފަކުރަމުން ދިޔަކަމަށެވެ. 

އޭރު އެގޮތަކަށް ސިފަކުރި މީހުން މިއަދު ވެރިކަމުގައި ތިބިއިރު، ރައީސް ޔާމިންގެ ޒައާމަތުގައި ނެގި ދަރަންޏަށްވުރެ ބޮޑު ދަރަނި ނަގާ ރައްޔިތުން ދަރަނިވެރި ކުރުވާފައިވާކަމަށް ރައީސް ޔާމީން ވިދާޅުވިއެވެ. 

ރައީސް ޔާމީން ވިދާޅުވީ މިހާ ބޮޑު ދަރަންޏެއް ރައްޔިތުންގެ ބޮލުގައި މި ސަރުކާރުން އަޅުވާފައި އޮތް އިރުވެސް އެކަށީގެންވާ މަޝްރޫއުތަކެއް ހިނގަމުން ނުދާކަމަށެވެ. ޚާއްސަކޮށް ލޯނު ނަގައިގެން އިގްތިސާދީ މަސައްކަތްތަކެއް ކުރަމުންދާތަން ނުފެންނަކަމަށް ރައީސް ޔާމީން ވިދާޅުވިއެވެ. 

އެކި ދާއިރާތަކަށް ވަކި ވަކިން ބަލާލިކަމުގައި ވީނަމަވެސް ސަރުކާރުން އިންވެސްޓުކޮށްގެން ކުރިއަރުވާފައި އޮތް ހަމަ އެއްމެ ދާއިރާއެއް ނެތްކަމަށް ރައީސް ޔާމީން ވަނީ ވިދާޅުވެފައެވެ.