ސްޕެނިޝް ލީގުގެ އެންމެ މަޝްހޫރު އެއް ކުރިމަތިލުން ނުވަތަ އެލް ކްލަސިކޯ މެޗު ކާމިޔާބުކޮށް ރެއާލް މެޑްރިޑުން ތާވަލުގެ އެއްވަނައަށް ޖެހިލައިފިއެވެ.
ރެއާލް މެޑްރިޑުގެ ދަނޑުގައި ކުޅުނު މި މެޗު އެ ޓީމު ކާމިޔާބުކޮށްފައި ވަނީ 3-1 ގެ ނަތީޖާއަކުންނެވެ. މި މެޗުން މޮޅުވެގެން ބާސާއަށް އެއްވަނައިގައި ލީޑު ނެގެން އޮތެވެ.
މި ނަތީޖާއާއެކު އެންމެ ފަހުގެ ޗެމްޕިއަން ރެއާލް އެއްވަނައިގައި އޮތީ ކުޅުނު 9 މެޗުން ލިބުނު 25 ޕޮއިންޓާއެކު އެވެ. މި މެޗުގެ ކުރިން ބާސާ އެއްވަނައިގަ އޮތީ ރެއާލް އާއި އެއް އަދަދަކަށް ޕޮއިންޓް ހޯދާ ފައިދާ ލަނޑުގެ ތަފާތުންނެވެ. ނަމަވެސް މި މެޗުން ބަލިވުމާއެކު ބާސެލޯނާ ދެވަނައިގައި އޮތީ ރެއާލް އާއި އެއް އަދަދަކަށް މެޗު ކުޅެގެން 22 ޕޮއިންޓާއެކު އެވެ.
ރެއާލްގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ރެއާލުންނެވެ. މެޗުގެ 12 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ކަރިމް ބެންޒެމާ އެވެ.
އޭގެފަހުން މެޗުގެ 35 ވަނަ މިނެޓުގައި ރެއާލްގެ ވަލްވާޑޭ އެ ޓީމަށް ލީޑު ފުޅާކޮށްދިން އިރު ފުރަތަމަ ހާފު ނިމުނީ މި ނަތީޖާގަ އޮވެގެންނެވެ. މެޗުގެ 83 ވަނަ މިނެޓުގައި ފެރާން ޓޮރޭސް ބާސާއަށް ސުން ކަނޑުވާލަދިން ނަމަވެސް ލިބުނު ޕެނަލްޓީއަކުން ރޮޑްރިގޯ ވަނީ ރެއާލްގެ ތިންވަނަ ލަނޑު ޖަހާދީފައެވެ.
Advertisement
This content is created and paid for by advertisers and does not involve Voice Journalists
