ވައްކަމާއި ކޮރަޕްޝަންގެ ތެރެއިން ދައުލަތަށް ގެއްލުނު ފައިސާަގެ ތެރެއިން މިހާތަނަށް އެންމެ ރުފިޔާއެއްވެސް ހޯދިފައި ނުވާކަން ފިނޭންސް މިނިސްޓަރު އިބުރާހިމް އަމީރުގެ ވާހަކަފުޅުން ހާމަވެއްޖެއެވެ.
ފިނޭންސް މިނިސްޓަރު އަމީރު މިއަދު ރައްޔިތުންގެ މަޖިލީހަށް ހާޒިރުކުރައްވާ މެމްބަރުންވަނީ ރާއްޖޭގެ އިގްތިސާދާއި ދައުލަތުގެ އާމްދަނީ އާއި ގުޅިގެން ގިނަ ސުވާލުތަކެއް މިނިސްޓަރާއި ކުރައްވާފައެވެ.
އެގޮތުން ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ކުރެއްވި ސުވާލެއްގައި ވަނީ ޚިޔާނާތުގެ ތެރެއިން ދައުލަތަށް ގެއްލުނު ފައިސާގެ ތެރެއިން އަނބުރާ ކިހާ މިންވަރެއް މިހާތަނަށް ހޯދުނުތޯ މިނިސްޓަރު އަރިހުން އައްސަވާފައެވެ.
"ކޯވިޑް ނިމިދިޔަ އިރުވެސް ވެންޓިލޭޓަރުކޮޅު ނުލިބިވުމުގެ އިތުރަށް، 30 މިލިއަނުގެ ވެންޓިލޭޓަރުގެ ޚީޔާނާތުން ދައުލަތަށް ލިބެންޖެހޭ ކިތަށް ބައި ރުފިޔާފޮތި މިހާރު ދައުލަތަށް ހޯދިއްޖެތޯ؟ އަދި އެ ނޫންވެސް ސަރުކާރުތަކުން ހިންގާފައިވާ ބޮޑެތި ޚިޔާނާތްތަކުގެ ތެރެއިން މި ސަރުކާރުން ވީ ވައުދާއި އެއްގޮތަށް އެއްވެސް ފައިސާއެއް މިހާރު ދައުލަތަށް ވެއްދިއްޖެތޯ؟
މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ
ވެންޓިލޭޓަރު ކޮރަޕްޝަނާއި ގުޅިގެން އެއްސެވި ސުވާލަށް ޖަވާބުދެއްވަމުން މިނިސްޓަރު އަމީރު ވިދާޅުވީ މިހާރު އެ މައްސަލަ އޮތީ އާބިޓްރޭޝަން މަރުހަލާގައިކަމަށެވެ. އަދި ދައުލަތުން އެ ފައިސާ ހޯދުމުގެ މަސައްކަތް ކުރަމުންދާކަމަށެވެ.
މީގެ ކުރީގެ ސަރުކާރުތަކުން ހިންގާފައިވާ ކޮރަޕްޝަންގެ މައްސަލަތަށް، ޚާއްސަކޮށް ކުރީ ސަރުކާރުގެ ތެރެއިން ފެންމަތިވި އެމްއެމްޕީއާރުސީގެ ޚިޔާނާތް ބަލާ، އެ ޚިޔާނާތުގެ ތެރެއިން ދައުލަތަށް ގެއްލުނު ފައިސާ ހޯދުމަށް އެސެޓް ރިކަވަރީ ކޮމިޝަނެއް ހެދި ނަމަވެސް، މިހާރު އެ ކޮމިޝަންގެ މަސައްކަތް އޭސީސީއަށް ބަދަލުކޮށްފައިވާކަމަށް މިނިސްޓަރު ވިދާޅުވިއެވެ. އަދި އޭސީސީއިން މިހާރު އެ މަސައްކަތް ކުރަމުންދާކަންވެސް މިނިސްޓަރު ފާހަގަކުރެއްވިއެވެ.
"މިސާލަކަށް އެމްއެމްޕީއާރުސީގެ މައްސަލައިގެ ތެރެއިންވެސް ހޯދަން ޖެހޭ ފައިސާ ހޯދުމުގެ މަސައްކަތް މިހާރު އޭސީސީގެ ތެރެއިން، ކުރީގައި އެސެޓް ރިކަވަރީ ކޮމިޝަނެއް ހެދި، އޭގެ މަސައްކަތް މިހާރު އޭސީސީއަށް ޓްރާންސްފާވެ، އޭސީސީގެ ތެރެއިން ޕީޖީއާ އެއްކޮށްވެސް އޭގެ މަސައްކަތްތަކެއް އެބަ ކުރެވޭ، ހޯދޭނެ ފައިސާ ހޯދުމުގެ މަސައްކަތް އެބަ ކުރެވޭ"
ފިނޭންސް މިނިސްޓަރު އަމީރު
މިނިސްޓަރުގެ ޖަވާބު ކުރުކޮށްލެއްވި އިރުވެސް ޚިޔާނާތުގެ ތެރެއިން ދައުލަތަށް ގެއްލުނު ފައިސާގެ ތެރެއިން ހޯދުނީ ކިހާ މިންވަރެއްކަމަށް ބަޔާންކުރައްވާފައެއް ނުވެއެވެ. އަދި އެއްވެސް މިންވަރަކަށް ފައިސާ ހޯދިފައިވާކަންވެސް ހާމަކުރައްވާފައެއް ނުވެއެވެ.
އެހެން ނަމަވެސް އެމްއެމްޕީއާރުސީގެ ޚިޔާނާތުގެ ތެރެއިން ދައުލަތަށް ގެއްލުނު ފައިސާ ހޯދުމަކީ ވެރިކަމަށް ވަޑައިގަންނަވާތާ ފުރަތަަމަ 2 އަހަރު ދުވަހުގެ ތެރޭގައި ފުއްދަވާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވެ ވަޑައިގެންނެވި ރިޔާސީ ވައުދުފުޅެކެވެ.
އެކަމަށްޓަކައި އެސެޓް ރިކަވަރީ ކޮމިޝަނެއް ހައްދަވާ، އެ ކޮމިޝަނަށް ބޮޑެތި ޚަރަދުތަކެއްވެސް ކުރައްވާފައެވެ. އެހެން ނަމަވެސް ގާތްގަނޑަކަށް 3 އަހަރުފަހުން އެ ކޮމިޝަން އުވާލައްވާފައިވާއިރު، ދައުލަތަށް ގެއްލުނު ފައިސާގެ ތެރެއިން އެއްވެސް މިންވަރެއް އެސެޓް ރިކަވަރީ ކޮމިޝަނަށް ހޯދާދެވިފައެއް ނުވެއެވެ.
ހަމަ އެގޮތަށް، ވެންޓިލޭޓަރު ގަތުމުގެ ނަމުގައި ހެލްތު މިނިސްޓްރީއިން ހިންގާފައިވަނީ ބޮޑު ކޮރަޕްޝަނެއްކަމަށް އޯޑިޓް ރިޕޯޓުތަކުން ހާމަކޮށްފައި ވީނަމަވެސް، އެ މައްސަލައިގައި ޝާމިލުވާ މީހުންގެ މައްޗަށް ދައުވާ ނުކުރުމަށް ނިންމާ އޭސީސީއިން މިހާރު ވަނީ މައްސަލަ ފައިލުކޮށްފައެވެ.
Advertisement
This content is created and paid for by advertisers and does not involve Voice Journalists
