ރައްޔިތުން އަތުން ނަގާ ޓެކްސް ބޮޑުކުރުމަށް ހުށައަޅާފައިވާ ބިލު މަޖިލީހުން ރަބަރު ސްޓޭމްޕު ޖަހާ އުސޫލުން ފާސްކޮށްގެން ނުވާނެކަމަށް ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެއްޖެއެވެ.
ހަސަން ލަތީފު މިފަދައިން ވިދާޅުވެފައިވަނީ މުދަލާއި ޚިދުމަތުން ނަގާ ޓެކްސް ބޮޑުކުރުމަށް ސަރުކާރުގެ ފަރާތުން މަޖިލީހަށް ހުށައަޅާފައިވާ ބިލާއި ގުޅިގެން ވާހަކަދައްކަވަމުންނެވެ.
ހަސަން ލަތީފު ވިދާޅުވީ ރައްޔިތުން މިހާރުވެސް ދައްކަމުންދާ ޓެކްސްއެއް ބޮޑުކުރުމަށް ސަރުކާރުން ހުށައަޅާފައިވާއިރު، ސަރުކާރުން އެފަދައިން އަމަލުކުރަން ޖެހުނު ސަބަބު ސާފުކޮށްދެއްވަން ޖެހޭކަމަށެވެ.
އެ ބިލުގެ މަގްސަދުތަކުގެ ތެރޭގައި ސަރުކާރުގެ އާމްދަނީ އިތުރުކުރުންކަމަށް ލިޔެފައި އޮތްނަމަވެސް އޭގެ އެއްވެސް ތަފްސީލެއް ދީފައި ނުވާކަން އޭނާ ފާހަގަކުރެއްވިއެވެ. އެގޮތުން، ޓެކްސް ބޮޑުކޮށްގެން ދައުލަތަށް ލިބޭނީ ކިހާ އާމްދަނީއެއް ތޯ އާއި، އެ ފައިސާ ލިބޭނެ ދިމަ ދިމާ ކަނޑައެޅިގެން ބަޔާންކޮށްދޭން ޖެހޭނެކަމަށް ހަސަން ލަތީފު ވިދާޅުވިއެވެ. އަދި ރައްޔިތުން އަތުން ނަގާ ޓެކްސް ބޮޑުކުރުމަށް މިހާރަށްވުރެ ފުޅާކޮށް ކަމާ ގުޅުންހުރި އިދާރާތަކާއި މަޝްވަރާކޮށް ރައްޔިތުންގެ ޚިޔާލުވެސް ހޯދަން ޖެހޭކަމަށް އޭނާ ވިދާޅުވިއެވެ.
"ހުށައެޅި ބިލުގެ މަގްސަދުގެ ތެރޭގައި އެބަ ހިމެނޭ، ދައުލަތުގެ އާމްދަނީ އިތުރުކުރުންކަމަށް. އެއީ ދެން އަޅުގަނޑުމެންނަށް ސާފުވާ ކަމެއް. ކިހާ ފައިސާއެއްތޯ މި ދެންނެވި ގޮތަށް އެ ޓެކްސް ބޮޑުކުރީމާ ލިބެނީ، އަދި އެއީ ކޮން ގޮތްތަކަކުން ހޯދި ފައިސާއެއްތޯއާއި، އަދި އެ ނޫން ގޮތަކަށް، މި ދެންނެވި ޓެކްސްތައް އިތުރުކޮށްގެން ބޮޑުކޮށްގެން ނޫން ގޮތަކަށް އެ ބޭނުންވާ އަދަދަށް ފައިސާ ނުހޯދެނީތޯއާއި އަދި ހަމަ އެހެންމެ ކުޑަ ފަރީ ކައުންސިލުން ފޮނުވާފައިވާ ސިޓީގައި އެ ބުނާހެން ދައުލަތުން ކުރަމުންދާ ބޭކާރު ޚަރަދުތައް ހުއްޓާލައިގެން އެ ދެކޮޅު ނުޖެއްސެނީ ތޯއާއި މި ދެންނެވި ކަންކަމަކީ މަޝްވަރާ ކުރުމަށްފަހުގައި ނޫނީ ގޮތެއް ނިންމޭނެ ކަމެއްކަމަށް އަޅުގަނޑަށް ގަބޫލެއް ނުކުރެވޭ"
މެމްބަރު ހަސަން ލަތީފު
ހަސަން ލަތީފު ވިދާޅުވީ އަނެއްކާވެސް ރިޔާސީ އިންތިޚާބު ބޯމަތިވަމުން އަންނައިރު، ސަރުކާރުން ކަންކަން ކުރަންވާނީ ރައްޔިތުންގެ އިތުބާރު ނުގެއްލޭ ގޮތަށްކަމަށް ހަސަން ލަތީފު ވިދާޅުވިއެވެ.
އެމްޑީޕީގެ ސުޕަރ މެޖޯރިޓީ މަޖިލީހުގައި އޮތުމަކީ ސަރުކާރުން ފޮނުވާހާ ބިލެއް ފޮނުވާ ގޮތަށް ފާސްކުރުމަށް އޮތް ހުއްޖަތެއް ނޫންކަމަށް ހަސަން ލަތީފު ވިދާޅުވިއެވެ.
"އަޅުގަނޑު މި ދަންނަވާ ވާހަކައަކީ ހަމަ މިހެން ތިބެފަ ޓެކްސް ބޮޑުކުރަން 2 ޕަސެންޓު މަޖިލީހަށް ލާފައި، ސަރުކާރުން ފޮނުވީތީ ރަބަރު ސްޓޭމްޕް ކުރާ ގޮތަށް އަޅުގަނޑުމެން މި ފާސް ކުރާ ކަމެއް ނޫން މިއީ"
މެމްބަރު ހަސަން ލަތީފު
އޭނާ އިތުރަށް ވިދާޅުވީ ޓެކްސް ބޮޑުކުރަން ސަރުކާރުން ބިލު ހުށައަޅާފައިވަނީ ރައްޔިތުންގެ މަޖިލީހުގެ 84 ވަނަ މާއްދާގެ ހ ގައި ބުނާ އުސޫލުން ނޫންކަމަށެވެ. އެގޮތުން ބިލު ހުށައަޅާއިރު ކޮސްޓް އެސްޓިމޭޓެއް ހުށައަޅަން ޖެހޭކަމަށް ސާފުކޮށް ބަޔާންކޮށްފައިވާކަން އޭނާ ފާހަގަކުރެއްވިއެވެ. އެ ކޮސްޓް އެސްޓިމޭޓު ހުށައަޅަން ޖެހޭ ފޯމެޓުވެސް ރައްޔިތުންގެ މަޖިލީހުގެ ގަވައިދުގައި ބަޔާންކޮށްފައިވާކަންވެސް ހަސަން ލަތީފު ފާހަގަކުރެއްވިއެވެ.
އެހެން ނަމަވެސް ސަރުކާރުން ބިލުތައް ފޮނުވާއިރު އެ ގަވައިދަށް އެއްވެސް ފަރުވާލެއް ނުބަހައްޓާކަމަށް އޭނާ ވިދާޅުވިއެވެ. ހަސަން ލަތީފު ވިދާޅުވީ މަޖިލީހުންވެސް ޒިންމާދާރު ކަމާއެކު މަސައްކަތް ކުރުމަށް ސަރުކާރުން ހުށައަޅާ ހުރިހާ ބިލުތަކަށް ތާއީދުކުރުމުގެ ބަދަލުގައި ކަންކަން އިސްލާހުކުރުމަށް އޮންނަ އުސޫލުގެ ތެރެއިން މަސައްކަތް ކުރަން ޖެހޭކަމަށެވެ.
ސަރުކާރަށްވެސް އަދި އެމްޑީޕީއަށްވެސް ރައްޔިތުންގެ އިތުބާރު އޮންނާނީ އެ އުސޫލުތަކުގެ ތެރެއިން މަސައްކަތް ކުރެވިގެންކަމަށް ހަސަން ލަތީފުގެ ވާހަކައިގައި ވަނީ ވިދާޅުވެފައެވެ
Advertisement
This content is created and paid for by advertisers and does not involve Voice Journalists
