ވޯލްޑްކަޕް މެޗުތައް ބެލުމަށް މީޑިއާނެޓުން ޚާއްސަ ޕެކޭޖުތައް އެކުލަވާލާ، ރިސޯޓުތަކަށް އެ ޕެކޭޖުތައް 5000 ޑޮލަރަށް ވިއްކުމަށް ނިންމައިފިއެވެ. 

މީޑިއާނެޓުން ވޯލްކަޕް މެޗުތައް ދައްކާ ޗެނަލްތައް ރިސޯޓުތަކަށް ފެންނާނީ އެ ޕެކޭޖުގެ ދަށުންނެވެ. އެއީ މީޑިއާ ނެޓުގެ ދަށުން ހިންގާ އައިސް ޓީވީ އާއި ޕީއެސްއެމްގެ ޔެސް ޓީވީ އަދި ރާއްޖެ ޓީވީ އެވެ.

ވޯލްޑް ކަޕްގެ މި ސަރަހައްދުގެ ބްރޯޑްކާސްޓިން ރައިޓްސް ގަނެފައި ވަނީ އިންޑިއާގެ 'ވަޔާކޮމް18' އިންނެވެ.

Advertisement

ރާއްޖޭގެ މީޑިއާ ނެޓުން ވަނީ އެއް މިލިއަން ޑޮލަރުގެ އަގަކަށް ރާއްޖޭގެ ރީބްރޯޑްކާސްޓިން ރައިޓްސް އެ ކުންފުނިން ގަނެފަ އެވެ. މީޑިއާ ނެޓުން ނިންމާފައި އޮތީ ގިނަ ވެގެން ތިން ޗެނަލަކަށް ރައިޓްސް ވިއްކާލާށެވެ.

ޕީއެސްއެމްއިން ވޯލްޑްކަޕް ދެއްކުމުގެ އެއްބަސްވުމުގައި މީޑިއާނެޓާއެކު ސޮއިކުރުމުގެ މަސައްކަތް މިހާރު ދަނީ ކުރެވެމުނެވެ. މީގެ ކުރިން އެމީހުން ވަނީ 'ވަޔާކޮމް18' އަތުން ވަކިން ރައިޓްސް ގަންނަން ވެސް މަސައްކަތް ކޮށްފަ އެވެ. އެކަމަކު އެ ކުންފުނިން ރައިޓްސް ވިއްކަނީ ދެ މިލިއަން ޑޮލަރަށް ކަމަށް ވުމުން، އެ އަގު މާ ބޮޑުވެ، ރާއްޖޭގެ ތިން ކުންފުންޏަކުން ގުޅިގެން ފައިސާ ދައްކާ ގޮތަށް އެއްބަސްވީ އެވެ.

ދައުލަތުގެ މީޑިއާއިން މީގެކުރިން ހިލޭ ދެއްކި ވޯލްޑް ކަޕްގެ ރައިޓްސް ޕީއެސްއެމުން ގަންނަނީ 333،000 ޑޮލަރު ނުވަތަ 5.4 މިލިއަން ރުފިޔާއަށެވެ. ހަމަ އެ ވަރު ރާއްޖެ ޓީވީ އާއި އައިސް ޓީވީއިން ދައްކަން ޖެހޭނެއެވެ. 

މޯލްޑިވްސް ބްރޯޑްކާސްޓިން ކޮމިޝަނުން އެކުލަވާލާފއިވާ ގާނޫނުގައި ވާ ގޮތުން ވޯލްޑް ކަޕްގެ މެޗުތައް ގައުމީ ޓީވީއިން ހިލޭ ދައްކައިދޭން ޖެހެއެވެ. އެހެން ނަމަވެސް އެ ގާނޫނުގައިވާ އެއްވެއް އެހެން ގޮތަކަށް ޕީއެސްއެމްގެ މެނޭޖިން ޑިރެކްޓަރު އަލީ ޚާލިދު ވަނީ މާނަކުރައްވާފައެވެ. 

އެގޮތުން ޚާލިދު ވިދާޅުވީ ދައުލަތުގެ މީޑިއާއިން ހިލޭ ރައްޔިތުންނަށް ދައްކަން ޖެހެނީ ހަމައެކަނި ވޯލްޑް ކަޕް އޯޕަނިން ސެރަމަނީ އާއި ހުޅުވާ މެޗު އެކަނިކަމަށެވެ.