ރަށްރަށުގައި ފުޓްސެލް ދަނޑުތައް ގިނަ އަދަދަކަށް އަޅަމުންދާތީ، "ފުޓް ސެލް މިނިސްޓަރޭ" ކިޔާ ނަން ހަރުކުރަމުންދާކަމަށް ޔޫތު މިނިސްޓަރު އަހުމަދު މަހުލޫފު ވިދާލުވެއްޖެއެވެ.
މަހުލޫފު މިފަދައިން ވިދާޅުވެފައިވަނީ ރައްޔިތުންގެ މަޖިލީހަށް އޭނާ ހާޒިރުކޮށް މެމްބަރަކު ކުރި ސުވާލަށް ޖަވާބުދެއްވަމުންނެވެ.
އޭނާ ވިދާޅުވީ ގިނަ ރަށްރަށުގައި ޒުވާނުން ކުރާނެ ކަމެއް ނެތިފައި ތިބޭކަން ފާހަގަކުރެވޭކަމަށެވެ. އެގޮތުން އިރުއޮއްސުމަށްފަހު ކޮފީއެއް ބޯލަން ދާނެ ތަނެއްވެސް ނުހުންނަ ރަށްރަށް ރާއްޖޭގައި ހުރިކަމަށް މިނިސްޓަރު ވިދާޅުވިއެވެ.
އެހެންކަމުން ރަށްރަށަށް ކުރާ ދަތުރުތަކުގައި ޒުވާނުންނާއި ބައްދަލުވުމުން، އެންމެ ފުރަތަމަވެސް އެދެނީ އެމީހުން ކުޅެލަންދާނެ ދަނޑެއް އަޅާދިނުމަށްކަމަށް މިނިސްޓަރު ފާހަގަކުރެއްވިއެވެ. އަދި ކައުންސިލްތަކުންނާއި މަޖިލިސް މެމްބަރުންވެސް އެ ގޮތަށް އެދެމުންދާކަމަށް މިނިސްޓަރު ވިދާޅުވިއެވެ.
އެއާއެކު މިނިސްޓަރު ވިދާޅުވީ އެމަނިކުފާނު ގަބޫލކުރާ ގޮތުގައި އެންމެ ފުރަތަމަ ކުރަންވީ ކަމަކީ ރަށްރަށުގައި ދަނޑުތައް އަޅާ ނިންމުމުގެ މަސައްކަތްކަަމަށެވެ. އަދި އެމަނިކުފާނުގެ ޔޫތު މިނިސްޓަރުކަމުގެ ދަށުން ރާއްޖޭގައި ގިނަ އަދަދަކަށް ދަނޑުތައް އަޅާފައިވާނެކަންވެސް ފާހަގަކުރެއްވިއެވެ.
މިނިސްޓަރު އިތުރަށް ވިދާޅުވީ ވޭތުވެ ދިޔަ 4 އަހަރު ދުވަހުގެ ތެރޭގައި ޔޫތު މިނިސްޓްރީއިން ގިނ އަދަދަކށް ދަނޑުތައް އަޅާފައިވާތީ، އަދި މިހާރުވެސް އެ މަސައްކަތް ކުރަމުންދާތީ މިނިސްޓަރާއި ދިމާލަށް "ފުޓްސެލް މިނިސްޓަރޭ" ބައެއް ފަރާތްތައް ކިޔަމުންދާކަމަށެވެ.
"އަޅުގަނޑު މި ފުޓްސެލް ދަނޑު އަޅާތީ، ފުޓުބޯޅަ ދަނޑު އަޅާތީ ވަރަށް ފާޑުވެސް ކިޔާނެ، ތިޔައީ ފުޓު ބޯޅަ މިނިސްޓަރުއޭ، ފުޓުސެލް މިނިސްޓަރުއޭ ކިޔާފަ"
ޔޫތު މިނިސްޓަރު މަހުލޫފު
މިނިސްޓަރު ވިދާޅުވީ އެފަދަ ނަންނަން މިނިސްޓަރާއި މުޚާތަބު ކުރައްވާ ވިދާޅުވި ނަމަވެސް، ރަށްރަށުގައި ފުޓްސެލް ދަނޑު ބޭނުންވެފައިވާ މިންވަރު ރަނގަޅަށް ވަޒަންކުރެވޭކަމަށެވެ.
ޒުވާނުން ކުޅެލާ މުނިފޫހި ފިލުވާލުމަށް ރަށްރަށުގައި އަޅާ ދަނޑުތަކަކީ ޒުވާނުން އުފަލާއެކު ބަލައިގަންނަ ކަމެއްކަމަށާއި، އެ ޚިދުމަތަކީ ޚާއްސަ އަހަންމިއްޔަތުކަމެއް ދީގެން ކުރަންޖެހޭ ކަމެއްގެ ގޮތުގައި މިނިސްޓަރު ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
