މަސްތުވާތަކެތީގެ ވިޔަފާރީގައި އިސްކޮށް އުޅޭކަމުގެ ތުހުމަތު އޮތް އަރުޝަދު ޚާލިދު ބަންދުން ދޫކޮށްލުމަށް ފުލުހުން ނިންމި މައްސަލަ ޕްރޮސެކިއުޓާ ޖެނެރަލްގެ އޮފީހުގެ ފަރާތުން އިސްތިއުނާފުކޮށް ސުޕްރިމް ކޯޓަށް ހުށައެޅި މައްސަލަ ބަލައިގެންފިއެވެ.
އެ މައްސަލަ ޕީޖީ އޮފީހުން ސުޕްރިމްކޯޓަށް ހުށައަޅާފައިވަނީ މި މަހުގެ 16 ވަނަ ދުވަހުގައެވެ.
އަރުޝަދު އެންމެ ފަހުން ހައްޔަރުކޮށްފައިވަނީ ސްރީ ލަންކާއިން ދުބާއީއަށް ދިއުމުން، ދުބާއީއަށް އެތެރެވިޔަނުދީ އަނބުރާ ފޮނުވާލުމުންނެވެ. އޭނާ ހައްޔަރުކުރީ ރާއްޖެ އައުމުންކަމަށް އޭރު މަޢުލޫމާތު ލިބިފައިވެއެވެ. އަދި ހައިކޯޓުގެ އަމުރެއް ތަންފީޒުކުރުމަށް އަރުޝަދު ބަންދުކޮށްފައިވާކަމަށް ފުލުހުންވެސް އޭރު ބުނެފައިވެއެވެ.
އެހެން ނަމަވެސް ފުލުހުންވަނީ އެ ފަހުން މި މަހުގެ 12 ވަނަ ދުވަހުގެ ރޭ އަރުޝަދު ބަންދުން ދޫކޮށްލާފައެވެ. އަދި އެއީ ހައިކޯޓުގެ އަމުރާއި ޚިލާފަށް ފުލުހުން އަމިއްލައަށް ނިންމި ނިންމުމެއްކަމަށް ޕީޖީ އޮފީހުން ވަނީ ބުނެފައެވެ.
އެކަން ފާހަގަކޮށް ޕީޖީ އޮފީހުން ބުނީ އަރުޝަދު ޚާލިދު ހައްޔަރުކޮށް، ބަންދުކޮށްގެން ކޯޓަށް ހާޟިރުކުރުމަށް ދިވެހިރާއްޖޭގެ ހައިކޯޓުން ދިވެހި ފުލުހުންގެ ޚިދުމަތުގެ މައްޗަށް އަމުރުކޮށްފައިވަނިކޮށް، 12 އޮކްޓޫބަރު 2022 ދުވަހުގެ 19:45އަށް އަރުޝަދު ޚާލިދު އެ ކޯޓަށް ޙާޟިރުކޮށްފައިވަނީ ހައްޔަރުން ދޫކޮށްލައި، އެކަމާ ގުޅޭ ލިޔުމެއް އޭނާއަށް ރައްދުކުރުމަށްފަހުގައި ކަމަށެވެ.
އެ މައްސަލައިގައި ފުލުހުން ހައިކޯޓުގެ އަމުރާއި ޚިލާފުވެފައިވާކަން ފާހަގަކުރައްވާ ޕީޖީ އޮފީހުން ވަނީ އެ މައްސަލަ ފުލުހުންގެ ބޯޑުގެ ސަމާލުކަމަށްވެސް ގެނެސްފައެވެ.
ޕީޖީ އޮފީހުން ބުނި ގޮތުގައި މަސްތުވާތަކެތީގެ ވިޔަފާރީގައި އިސްކޮށް އުޅޭކަމުގެ ތުހުމަތު އޮތް އަރުޝަދު ޚާލިދު ހައްޔަރުކުރުމަށް ދިވެހިރާއްޖޭގެ ހައިކޯޓުން އަމުރު ނެރުމާއެކު، ޕީޖީ އޮފީހުން ގެންދިޔައީ މިކަމުގައި ޢަމަލުކުރަންވީގޮތުގެ އިރުޝާދު ދިވެހި ފުލުހުންގެ ޚިދުމަތަށް އެ އޮފީހުގެ ފަރާތުން ދެމުން ގޮސްފައިވާނެއެވެ.
އެހެން ނަމަވެސް އަރުޝަދު ބަންދުން ދޫކޮށްލާފައިވަނީ ޕީޖީ އޮފީހާއި އެއްވެސް ވަރަކަށް މަޝްވަރާކުރުމަކާއި ނުލާ، ނުވަތަ އެންގުމަކައިވެސް ކުލާކަމަށް އެ އޮފީހުން ވަނީ ހާމަކޮށްފައެވެ.
އަރުޝަދު މިދިޔަ އަހަރުގެ ތެރޭގައި ރާއްޖެ ދޫކޮށް ދިޔައީ، އޭނާގެ މައްޗަށް ތުހުމަތުކުރެވުނު މަސްތުވާތަކެތީގެ މައްސަލައެއް ސާބިތުނުވެ އޭނާ ދޫކޮށްލުމުންނެވެ.
މިދިޔަ އަހަރުގެ ފަހުކޮޅު މާލެއާއި ހުޅުމާލެއިން އަތުލައިގަތް 119 ކިލޯގެ މަސްތުވާތަކެތީގެ އެންމެ އިސްމީހަކީވެސް އަރުޝަދުކަމަށް ފުލުހުން ތުހުމަތުކުރެއެވެ. ނަމަވެސް އޭރު އޭނާ ރާއްޖެއިން ބޭރުގައި ހުރުމުން ހައްޔަރެއް ނުކުރެވެއެވެ.
Advertisement
This content is created and paid for by advertisers and does not involve Voice Journalists
