ރައްޔިތުން އަތުން ނަގާ ޓެކްސް ނުވަތަ ޖީއެސްޓީ ބޮޑުކޮށްގެން ނޫނީ ދައުލަތަށް އާމްދަނީ ހޯދޭނެ ސިޔާސަތެއް ސަރުކާރުން ނުގެންގުޅުއްވާކަން ފިނޭންސް މިނިސްޓަރު އިބްރާހިމް އަމީރުގެ ވާހަކަފުޅުން ހާމަވެއްޖެއެވެ. 

ޓެކްސް ބޮޑުކުރަން ސަރުކާރުން ނިންމުމާއި ގުޅިގެން މިއަދުގެ މަޖިލީހަށް ފިނޭންސް މިނިސްޓަރު ހާޒިރުކޮށް މެމްބަރުން ވަނީ ގިނަ ސުވާލުތަކެއް އަމާޒުކުރައްވާފައެވެ. 

ޓެކްސް ބޮޑުކުރުމާއި ގުޅޭގޮތުން މަޖިލީހުގެ މެދު ހެންވޭރު ދާއިރާގެ މެންބަރު ޢަލީ އާޒިމް ވަނީ ރައްޔިތުންގެ އަތުން ނުނަގާ ސަރުކާރަށް އާމްދަނީ އިތުރު ކުރެވޭނެ ގޮތެއް ނެތީތޯ އައްސަވާ ސުވާލުކުރައްވާފައެވެ. 

Advertisement

އާޒިމްގެ އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ ސަރުކާރުގެ ރިކަރެންޓު ޚަރަދުތައް ފޫބެއްދުމަކީ ޓެކްސް ބޮޑު ކުރަން ހުށައެޅި ސަބަބުތަކުގެ ތެރެއިން އެއް ސަބަބުކަމަށެވެ. ދައުލަތަށް މިހާރު ލިބޭ އާމްދަނީއިން ރިކަރެންޓު ޚަރަދުތައް މިހާރު ހަމަޖެއްސުމަކީ ފިސްކަލް ޕޮލިސީގެ އަމާޒުކަމަށް ހިމަނާފައިވާނެކަމަށެވެ. 

އާޒިމްގެ ސާފު ސުވާލަށް ޖަވާބު ނުދެއްވާ މިނިސްޓަރު އިތުރު ވާހަކަދައްކަވަމުން ދިއުމާއި ގުޅިގެން އާޒިމް ވަނީ ނިޒާމީ ނުގުތާއެއް ނަގަންވާ އޭނާ ކުރެއްވި ސުވާލަށް ސާފު ޖަވާބެއް ދެއްވުމަށް މިނިސްޓަރު އަރިހުން އެދިލައްވާފައެވެ. 

މެދު ހެންވޭރު ދާއިރާގެ މެމްބަރު އަލީ އާޒިމް

އެއަށްފަހު އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ މިހާރު ފިނޭންސްއިން އެކުލަވާފައިވާ ފިސްކަލް ސްޓްރެޓެޖީގެ އަމާޒަށް ވާސިލްވުމަށް ޖީއެސްޓީއާއި ޓީޖީއެސްޓީ ބޮޑުކުރަން ޖެހޭކަމަށެވެ. 

މިނިސްޓަރުގެ ޖަވާބުގައި މެދު ހެންވޭރު ދާއިރާގެ މެމްބަރު އެއްސެވި ސުވާލަށް ސާފު ޖަވާބެއް ދެއްވާފައެއް ނުވެއެވެ. ޖީއެސްޓީ ބޮޑުކޮށްގެން ދައުލަތަށް ލިބޭނެކަމަށް އަންދާޒާކުރާ 2.5 ބިލިއަން ރުފިޔާ އެ ނޫން ގޮތަކަށް ހޯދުމުގެ ސިޔާސަތެއް ސަރުކާރުން ނުގެންގުޅުއްވާކަން މިކަމުން ހާމަވެގެންދެއެވެ.

އަދި ސަރުކާރަށް އާމްދަނީ ހޯދުމަށް ޓެކްސް ނެގުން ނޫން ގޮތެއް، ނުވަތަ އެފަދަ ވިސްނުމެއް ނުގެންގުޅުއްވާކަންވެސް މިނިސްޓަރުގެ ޖަވާބުން ފާހަގަވެގެން ދިޔައެވެ.