ހދ. ހަނިމާދޫގައި ތިބި އިންޑިއާ ސިފައިން ގެނައީ ކުރީގެ ރައީސް ޔާމީން އަބްދުލްގައްޔޫމް ގެ ސަރުކާރުން ކަމަށް ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ވިދާޅުވެއްޖެއެވެ.
ޣަފޫރު މިފަދައިން ވިދާޅުވީ، ޗާގޯސް ޖަޒީރާތަކަކީ މޮރިޝަސްގެ ސިޔާދަތީ ބާރު ހިނގާ ސަރަހައްދަކަށް ހަދަން ބައިނަލްއަގުވާމީ ކަނޑުތަކާ ބެހޭ ކޯޓުގައި އެގައުމުން ކުރާ ދައުވާގައި މޮރިޝަސްއާ އެއްކޮޅަށް ރާއްޖޭގެ ސިޔާސަތު ދީލައިނުލަން ގޮވާލައި މަޑުއްވަރީ ދާއިރާގެ މެންބަރު އާދަމް ޝަރީފް މިއަދު މަޖިލީހަށް ހުށަހެޅި ކުއްލި މައްސަލައަށް ބަހުސް ކުރައްވަމުންނެވެ.
ޣަފޫރު ވިދާޅުވީ، މިއަދާއި ހަމައަށް އައި އިރުވެސް ރާއްޖޭގެ ބޯޑަރު އޮތީ ކަނޑަނޭޅި ކަމަށެވެ. އަދި މިގައުމަށް އައި ހުރިހާ ސަރުކާރަކުންވެސް އެކަން ކުރުމަށް ނުކުޅެދިފައިވާ ކަމަށް އޭނާ ވިދާޅުވިއެވެ.
އެވާހަކަ އާއި ގުޅުވައިގެން ޣަފޫރު ވިދާޅުވީ، ހަނިމާދޫގައި އިންޑިއާ ސިފައިން ތިބޭ ވާހަކަ ރައްޔިތުންގެ މަޖިލީހުގައި އިދިކޮޅު ފަރާތްތަކުން ދައްކަވާ ކަމަށެވެ. އެހެން ނަމަވެސް އެ ރަށުގައިވެސް އަދި އެހެން ރަށެއްގައި ވެސް ބޭރުގެ ބަޔަކު ތިބި ނަމަ ތިބީ، ކުރީގެ ރައީސް ޔާމީން ގެ ސަރުކާރުން ހެދި އެގްރިމެންޓްގެ ދަށުން ކަމަށެވެ.
"ރާއްޖެއާއި އިންޑިއާއާއި ކުރެވުނު އެގްރީމެންޓް އެއްގެ ދަށުން ޑިފެންސް ކޯޕަރޭޝަން އެގްރީމެންޓް ގެ ދަށުން، އެ އެގްރީމަންޓް ގައި ސޮއި ކުރީ ޔާމީންގެ ވެރިކަމުގައި މިހާރުގެ މަޑުއްވަރީ ދާއިރާގެ އިއްޒަތްތެރި މެންބަރު، އޭރުގެ ޑިފެންސް މިނިސްޓަރު. ރާއްޖެއަށް ޑޯނިއާ ފްލައިޓެއްް އޭގެ ޓެކްނިކަލް ސަޕޯޓާ އެއްކޮށް ގެނެސް ބާއްވަން. އެހެންވީމާ ސުވާލަކީ މިއަދު ހަނިމާދޫގައި ތިބި އިންޑިއާ ސިފައިންނަކީ އިބްރާހީމް މުހައްމަދު ޞާލިހު ގެނައި ސިފައިން ތޯ؟ ނޫން. އެއީ ޔާމީނު ގެނެސްދީފައި ތިބި ސިފައިން. އެއީ ހަގީގަތަކީ."
އަބްދުލްޣަފޫރު މޫސާ
މިއާއެކު އޭނާ ވިދާޅުވީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މޮ ސަރުކާރުން ރާއްޖެ ގެނައި ބޭރުގެ އެއްވެސް ބަޔަކު ރާއްޖޭގައި ނުތިބޭނެ ކަމަށެވެ.
"މިސަރުކާރުން ކޮށްފައި ހުރި އެގްރީމެންޓް އެއްގެ ދަށުން، މި ގައުމަށް އައިސް ތިބި އެއްވެސް ބޭރު ބަޔަކު ނުތިބޭނެ. އަދި އައްޑޫގައިވެސް، ފުވައްމުލަކު ގައި ބަޔަކު ތިބި ނަމަ އެއީ ކުރީގެ ސަރުކާރުން ކޮށްފައި އޮތް ކަންތައްތައް އެއީ. އެހެންވީމާ ހަގީގަތް އޮޅޭ ގޮތަށް މިތަނުގައި ވާހަކަދެކެވިގެން ނުވާނެ."
އަބްދުލްޣަފޫރު މޫސާ
ފޯޅަވައްސަކީ ރާއްޖޭގެ ބައެއް ކަމުގައި ރާއްޖޭގެ އެއްވެސް ސަރުކާރަކުން ނުވަތަ ދުނިޔޭގެ އެއްވެސް ތަނަކުން ހުށަހަޅާފައި ނުވާ ކަމަށާ، އެހެން ކަމުން އެއީ ރާއްޖޭގެ ބައެއް ކަމުގައި ރައްޔިތުންގެ މަޖިލީހުންވެސް ކަނޑައެއް ނޭޅޭނެކަމަށް ޣަފޫރު ވިދާޅުވިއެވެ. އަދި އެފަދަ ވާހަކަ ދައްކައިގެން ފިތުނަ އުފެއްދުން ނޫން ކަމެއް ނުވާނެ ކަމަށް ވެސް އޭނާ ވިދާޅުވިއެވެ.
ޣަފޫރު އިތުރަށް ވިދާޅުވީ، އަދުގެ ސަރުކާރުން ގާނޫނާއި ޚިލާފު އެއްވެސް ކަމެއް ނުކުރާނެ ކަމަށާ، ރާއްޖޭގެ ބިމުން އެއްވެސް ކައިވަތެއް ބޭރުގެ ބަޔަކަށް މިސަރުކާރުން ދޫނުކުރާނެ ކަމަށެވެ. އެހެންނަމަވެސް، ރާއްޖޭގެ ސަރަހައްދެއް އަދި މިވީހާތަނަށް ވެސް ކަނޑަނޭޅޭ ކަމަށާ، އަމިއްލައަށް އެގޮތަށް ކަނޑައެޅި ކަމުގައިވިޔަސް އެކަން އެގޮތަށް ނުވާނެ ކަމަށްވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
