ޗާގޯސްގެ މައްސަލައާއި ގުޅޭގޮތުން އދ.ގެ އާންމު މަޖިލީހަށް ގަރާރެއް ހުށަހަޅައިފިނަމަ އެ ގަރާރާއި ދެކޮޅު ނުހެދުމަކީ ރާއްޖެއިން މޮރިޝަސް އާއި ދެކޮޅަށް ޓްރައިބިއުނަލްގައި ވަކާލާތު ކުރަމުންގެންދާ މައްސަލާގައި ޖަވާބުދާރީވަމުން އައިސްފައިވާ އެއްވެސް ކަމަކަށް ބަދަލެއް ނާންނާނެ ކަމަށް މޮރިޝަސް ސަރުކާރަށް އަންގާފައިވާނެ ކަމަށް ފޮރިން މިނިސްޓްރީން ބުނެފިއެވެ.
އެ މިނިސްޓްރީ ނެރުނު ނޫސް ބަޔާނެއްގައި ބުނެފައިވަނީ އދ.ގެ އާންމު މަޖިލީހުގައި ދޭ ވޯޓުގެ މައްސަލަ އާއި ރާއްޖޭގެ އިން ކަނޑައެޅުމާއި ގުޅޭ ގޮތުން މިހާރު ޓްރައިބިއުނަލުގައިކުރިޔަށްދާ މައްސަލައަކީ ތަފާތު ދެ މައްސަލައެއް ކަމަށެވެ.
ފޮރިން މިނިސްޓްރީން ބުނީ ޗާގޯސްގެ މައްޗަށް ސިޔާދަތީ ބާރުހިންގާ ގައުމުގެ މައްސަލައަކީ މޮރިޝަސް އާއި އިނގިރޭސިވިލާތާއި ދެމެދު އޮތް މައްސަލައެއް ކަމަށާއި، ރާއްޖޭގެ ސީދާ ބައިވެރިވުން އޮތް މައްސަލައެއް ނޫން ކަމަށެވެ.
އަދި 1965 ވަނަ އަހަރު ރާއްޖެއަށް ފުރިހަމަ މިނިވަންކަންލިބި 21 ސެޕްޓެމްބަރުގައި އދ ގެ މެންބަރު ގައުމަކަށް ވުމަށްފަހު ބައިނަލްއަގްވާމީ ދުނިޔޭގައި އިސްތިއުމާރާއީ އަޅުވެތިކަމާއި ދެކޮޅަށް ރާއްޖޭގެ ހުރިހާ ސަރުކާރާކުންވެސް ވަނީ އަޑުއުފުލާފައި ކަމަށްވެސް މިނިސްޓްރީން ބުނެއެވެ.
އެގޮތުން ރާއްޖެއަށް އދ.ގެ މެންބަރުކަން ލިބުމަށްފަހު ދުނިޔޭގެ އެކި ބައްރުތަކުގައި އިސްތިއުމާރީ އަޅުވެތިކަމުގެ ދަށުގައި ހުރި އެތައް ގައުމެއް މިނިވަންވެ، އދ.ގެ މެންބަރުންގެ ގޮތުގައި އެބަތިބި ކަމަށާއި، އެހުރިހާ މައްސަލަތަކަށް ރާއްޖެއިން މިހާތަނަށް ތާއީދުކޮށްފައިވާ ކަމަށްވެސް މިނިސްޓްރީން ބުނެއެވެ.
މޮރިޝަސް އާއި އެފްރިކާގެ ގައުމުތަކާއި ވަކި ފަރާތަކަށް ނުޖެހޭ ހަރަކާތް (ނޮން އައިލެންޑް މޫވްމެންޓް) ގެ ގައުމުތަކާއި ގުޅިގެން 22 މެއި 2019 ގައި އދ ގެ އާންމު މަޖިލީހަށް ގަރާރެއްވެސް ވަނީ ހުށަހަޅާފައެވެ. މި ގަރާރުގައި 6 މަސް ދުވަހުގެ ތެރޭގައި ޗާގޯސް މޮރިޝަސް އާއި ހަވާލުކުރުމަށް ވަނީ ގޮވާލާފައެވެ. އެހެން ނަމަވެސް ރާއްޖެއިން ވަނީ އެގަރާރާ ދެކޮޅަށް ވޯޓުދީފައެވެ.
މިނިސްޓްރީން ބުނީ 2019 ވަނަ އަހަރު ރާއްޖެއިން އެގަރާރާއި ދެކޮޅަށް ވޯޓު ދިނީ ރާއްޖޭގެ ކޮންޓިނެންޓަލް ޝެލްޕް200 ނޯޓިކަލް މޭލަށްވުރެ އިތުރުކުރުމަށް ކޮމިޝަން އޮފް ދަ ލިމިޓްސް އޮފް ދަ ކޮންޓިނެންޓަލް ޝެލްފް (ސީއެލްސީއެސް) އަށް 26 ޖުލައި 2010 ގައި ރާއްޖެއިން ހުށަހެޅި ހުށަހެޅުމަށް މޮރިޝަސްއިން އިއުތިރާޒުކޮށް، 24 މާޗް 2011 ގައި ފޯމަލް ޕްރޮޓެސްޓް ހުށަހަޅާފައިވާތީ ކަމަށެވެ.
Advertisement
This content is created and paid for by advertisers and does not involve Voice Journalists
