ހެއްކާ ބެހޭ ގާނޫނަށް އިސްލާހު ގެންނަން މަޖިލީހަށް މިހާރު ހުށަހަޅާފައިވާ ބިލުގައި ވެސް ނޫސްވެރިންގެ އެންމެ ބޮޑު ކަންބޮޑުވުމަށް ހަލެއް ނެތްކަމަށް ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެމްބެ) ވިދާޅުވެއްޖެ އެވެ.
ގައުމީ ސަލާމަތައް ނުރައްކާވާ ހާލަތްތަކުގައި ނޫސްވެރިންގެ މަސްދަރު ހާމަކުރަންޖެހޭ ގޮތަށް ހެއްކާ ބެހޭ ބިލު ފާސްކޮށް، އެ ބިލު ރައީސުލްޖުމްހޫރިއްޔާ ވަނީ މިދިޔަ ޖުލައި މަހުގެ ތެރޭގައި ތަސްދީގުކޮށްފައެވެ.
ހެއްކާ ބެހޭ ގާނޫނު އިސްލާހުކުރަން މިހާރު މަޖިލީހަށް ހުށަހަޅާފައިވާ ބިލަށް ބަހުކުރައްވަމުން މުހައްމަދު ލަތީފް ވިދާޅުވީ މިހާރު އިސްލާހު ގެންނަން ހުށަހަޅާފައިވާ ގޮތުން ވެސް ނޫސްވެރިން އެންމެ ބޭނުންވާ ކަންކަން ހާސިލެއް ނުވާނެ ކަމަށެވެ.
އޭނާ ވިދާޅުވީ، އެ އިސްލާހު ސަރުކާރުން ހުށަހެޅީ ރައްޔިތުންނަށް ދަޅަދެއްކުމާއި އޮޅުވާލުމަށް ކަމަށެވެ.
މުހައްމަދު ލަތީފް ވިދާޅުވީ، ގާނޫނުގެ ވަކި ހިސާބެއްގައި މަސްދަރު ހާމަކުރަން ޖެހޭނީ ޕީޖީ ހުށަހަޅާ ހުށަހެޅުމުގެ މައްޗަށް ކަމަށެވެ. އަދި ހައިކޯޓުން ކުރާ އަމުރަކުން ކަމަށް ކަނޑައެޅުމަށާއި، އަދި އެފަދަ އަމުރެއް ނެރުމުގައި ކޯޓުން ރިއާޔާތްކުރަންޖެހޭ ކަންކަން ގާނޫނުގައި ކަނޑައަޅަން ހުށަހަޅާ އިސްލާހު ގެންނަން ޖެހޭ ކަމަށްވެސް އޭނާ ވިދާޅުވިއެވެ.
އޭނާ ވިދާޅުވި ގޮތުގައި ޖޭއެސްސީއާއި، ކޯޓުތަކާއި، މަޖިލީހުގެ އިތުރުން، ގައުމު ހިންގުމުގެ ބާރު މަސްހުނިވެފައި އޮތްވައި އޮތްވައި ނޫސްވެރިންނާމެދު އެގޮތަށް އަމަލުކުރޭ ގޮތަށް ގާނޫނު ފަރުމާކޮށްގެން ނުވާނެ ކަމަށެވެ.
Advertisement
This content is created and paid for by advertisers and does not involve Voice Journalists
