ރައްޔިތުންގެ މަޖިލީހުގެ ރައީސް މުހައްމަދު ނަޝީދު ގެ އިތުރުން، ދެންވެސް މަޖިލީހުގައި ތިއްބަވަނީ ކޮންމެވެސް ވަރަކަށް ތަންދޮރު ދަންނަ ބޭފުޅުންކަން ހަނދާން ބެހެއްޓެވުމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އިކްރާމް ހަސަން، ރައީސް ނަޝީދުގެ އަރިހުން އެދިވަޑައިގެންފިއެވެ. 

އިކްރާމް މިފަދައިން ވިދާޅުވެފައި ވަނީ، ޖީއެސްޓީއާއި ޓީޖީއެސްޓީ ބޮޑު ކުރުމަށް ސަރުކާރުން ހުށަހަޅާފައިވާ ބިލާ ގުޅޭގޮތުން ކަމާ ގުޅުންހުރި ފަރާތްތައް މަޖިލީހަށް ހާޒިރުކޮށް ކުރިއަށްދާ މަޖިލީހުގެ އާންމު ކޮމެޓީގައި އިކްރާމް ދެއްކެވި ވާހަކަތަކުގެ ތެރެއިން ކުށެއް ބުނެވިފައިވާ ކަމަށް ވިދާޅިވެ އެ ކުށް ރައީސް ނަޝީދު އިސްލާހު ކޮށްދެއްވުމާއި ގުޅިގެންނެވެ. 

ޖީއެސްޓީއާއި ޓީޖީއެސްޓީ ބޮޑު ކުރުމަށް ހުށަހަޅާފައިވާ ބިލާއި ގުޅިގެން ވާހަކަދައްކަވަމުން އިކްރާމް ވިދާޅުވީ، އެ ބިލާއި ދެކޮޅަށް ވާހަކަ ދައްކަވާ މެންބަރުން ވާހަކަދައްކަވަނީ ސިޔާސީ މަންފާއަށްޓަކައި ރައްޔިތުންގެ ހިތަށް ތަދު ކުރާން ކަމަށެވެ. އެހެން ނަމަވެސް، އެގޮތަށް ކަންތައް ނުކޮށް، ގައުމަށް ފައިދާ ހުރި ކަންކަމުގައި ސިޔާސީ ފިކުރު އެއްކިބާކޮށް، ރައްޔިތުންނަށް ވިސްނައިދޭން މަސައްކަތް ކުރަންޖެހޭ ކަމަށްވެސް އޭނާ ވިދާޅުވިއެވެ.  

މިއާއެކު އިކްރާމް ވިދާޅުވީ ޖީއެސްޓީއާއި ޓީޖީއެސްޓީ ބޮޑު ކޮށްގެން ރައްޔިތުންނަށް މާބޮޑު ގެއްލުމެއް ނުވާނެ ކަމަށެވެ. 

"ސަބަބަކީ ޖީއެސްޓީ ޒީރޯ ރޭޓެޑް ފޫޑް އައިޓަމްސް ތަކެއް އެބައުޅޭ. އެއީ އާއްމުކޮށް ޒަރޫރީ ބޭނުންތަކަށް ރައްޔިތުން ބޭނުންކުރާ އައިޓަމް ތައް." އިކްރާމް ވިދާޅުވިއެވެ. 

އިކްރާމްގެ ވާހަކަ އެ ހިސާބަށް ގެންދެވުމާއި އެކު އެވާހަކަ މެދުކަނޑާލައްވައި ރިޔާސަތުގައި އިންނަވައި ރައީސް ނަޝީދު ވަނީ، އެތަކެއްޗަކީ ޖީއެސްޓީ ޒީރޯ އެއްޗެއްސެއް ނޫން ކަމަށާ، އެއީ ޑިއުޓީ ޒީރޯ އެއްޗެހި ކަމަށް ވިދާޅުވެފައެވެ. 

"އެތަކެއްޗަކީ ޖީއެސްޓީ ޒީރޯ އެއްޗެއްސެއް ނޫން، އެއީ ޑިއުޓީ ޒީރޯ އެއްޗެހި. އައި ޑިއުޓީ ޒީރޯ." ރައީސް ނަޝީދު ވިދާޅުވިއެވެ. 

ރައީސް ނަޝީދު މި ވާހަކަފުޅާއި ނުރުހުންވެ ވަޑައިގެން އިކްރާމް ވަނީ، "ދެންވެސް މިތާ ތިއްބަވަނީ ހަމަ ކޮންމެވެސް ވަރަކަށް ތަންދޮރު ދަންނަ ބޭފުޅުންކަން" ހަނދާން ބެހެއްޓެވުމަށް އެދިފައެވެ.